¹ Penka nalyalulukile no mwinuna amenso angi kabili nalimwene amakalaki ane alefumina pakachi kampili shibili, kabili neshi mpili shali sha lubemba. ² Ikalaki ilyakutanga lyali na ba kabalwe abakukashika, ikalaki ilya bubili lyali naba kabalwe aba kufita, ³ ikalaki lya butatu lyali naba kabalwe abakutuba, kabili ne kalaki ilya bune lyali na ba kabalwe aba kubalala. ⁴ Penka nalyasukile nokulabila ku nkalamba u-walelabila nanemo achi, ''Nisa fintu ifi, mwe Shikulu?'' ⁵ Inkalamba yalyasukile nokulabila kuli nemo achi, ''Ishi emyela shine isho ishaimya ulwendo ukufuma mu mpunsha umo shaimakene ku menso aba Shikulu abapano pa kyalo kyonse. ⁶ Ilili nabakabalwe abakufita lileya ku kyalo kyakukabeta kakubuyeke; bakabalwe bakutuba baleya ku kyalo ikikalile ukuponena akasuba; kabili na bakabalwe abakubalala baleya ku kyalo ikya kukabeta kakubulenga.'' ⁷ Aba bakabalwe balile nakupitañana pa kyalo, penka inkalamba yalilabile achi kabiyeni mukapitañane pa kyalo!'' kabili balile mu kyalo kyonse. ⁸ Penka balingichile nokulabila kuli nemo achi, ''Mona balya abaleya ku kyalo ikikalile kukabeta kakubuyeke; bakasekesha umuchima wangi ku kyalo ikya kukabeta kakubuyeke.'' ⁹ Ishiwi lya ba Yawe lyalishile kuli nemo achi, ¹⁰ ''poka umulambu ukufuma ku basha - ukufuma kuli Helidai, Tobiya, na Yedaya kabili uleya lelo lyenka utwale mu ñanda ya kwa Yosaya umwana wakwa Zefaniya, uwafuma mu Babiloni. ¹¹ Penka utwale Siliva na Golide, upange ne kitebo kabili umufwike ku mutwi wakwe Yoshiwa umwana wakwa Yehozadaki, umupapatilishi umukulu. ¹² Ulabile kuliye achi, ''ba Yawe abamabumba balabilefi, uyu muntu, ishina lyakwe musampi! Akasapuka kwenkoku ali kabili akasompa ne tempele ilya ba Yawe! ¹³ Eukasompa itempele lya ba Yawe, akafwikwa ubuleme bwa bufumu, kabili akekala napetebe mukubutungulula ubufumu. Akaba mupapatilishi ili akaba pa bufumu, kabili isho shonse nkito shibili shikaluku bombewa bwino. ¹⁴ Ikitebo kikapelwa kuli Helidai, Tobiya, Yedaya, kabili nakuli Heni umwana waka Zefaniya koti kyakwa nukilako ikya mwitempele lya ba Yawe. ¹⁵ Penka balya abali ukutali bakesa mukusompa iñanda yaba Yawe, kanshi mukeshiba achi ba Yawe aba mabumba ebantuma nemo kuli mwebo; kino kikamoneka kani mwebo mukomfwikishe kwishiwi ilya ba Yawe ba Lesa wenu!