¹ Kabili namwene mukuboko kwa kulyo kwa uwaikele pa cipuna cabufumu umufungilo naulembwa pantanshi elyo napanuma, naukakatikwa nefikakatiko cine lubali. ² Namwene na malaika uwabulamba alebilikisha ne shiwi likalamba, ''Nani ulingile ukwisula umufungilo nokulepula ifikakatiko fyauko?'' ³ Tapali nelyo umo mumulu nangu pesonde nangu panshi ye sonde uli namaka yakwisula umufungilo nangu ukubelenga. ⁴ Ine nalilile icibi pamulandu takwali nelyo umo uwasangilwe uwalinga ukwisula umufungilo nangu ukubelenga. ⁵ Lelo umo paba kalamba atile kuli ine, ''Wilila. Mona! Inkalamo ya mukowa yakwa Yuda, umushila wakwa Dabidi, nacifya. Ali uwalinga ukwisula umufungilo elyo nefikakatiko fyauko cine lubali.'' ⁶ Namwene umwana wampanga naiminina pakati kacipuna cabufumu elyo napa ifyamweo fine elyo nabakalamba. Amoneke kwati nalimo naipaiwa. Alikwete insengo cine lubali elyo namenso cine lubali, ayali emipashi cine lubali iya kwa Lesa iya tumwa mwisonde lyonse. ⁷ Aile no kusenda ukwikata umufungilo ukufuma mukuboko kwa kulyo muli uyo waikala pa cipuna cabufumu. ⁸ Ilyo asendele umufungilo, ifya mweo fine elyo na bakalamba amakumi yabili -na bane bawile panshi ku Mwana wapanga .Cila umo alikwete isese elyo ne nweno sha golide umwaiswile ifye fungo, emapepo ya bantu ba mushilo bakwa Lesa. ⁹ Balimbile ulwimbo ulupwa: ''Naulinga ukusenda umufungilo elyo nokwisula ifikakatiko fyauko. Pantu waliipaiwe ,elyo ku mulopa obe washitile abantu kuli Lesa ukufuma ku mitundu yonse, ululimi, abantu, elyo noluko. ¹⁰ Walibapanga ubufumu elyo bashi mapepo ukupyungile Lesa wesu, elyo bakateka pe sonde.'' ¹¹ Naliloleshe elyo naumfwile ciunda caba malaika abengi abashinguluka ku cipuna cabufumu elyo ifya mweo elyo na bakalamba. Impendwa yali amakana ikumi na makana ikumi elyo na makana ya makana. ¹² Basosele mwi shiwi ilikalamba, ''Nalinga Umwana wa mpanga, uwaipaiwe, mukapokelela amaka, ubucindami, amano, ubukose, umucinshi,ubukata, elyo na malumbo.'' ¹³ Naumfwile conse icibumbwa icali mumulu elyo na pesonde elyo napanshi yesonde elyo napali bemba -fyonse ifyabamo -filetila, ''Kuli uyo uwaikala pacipuna cabu fumu naku mwana wampanga amalumbo, ubucindami, ubukata, elyo nabukateka umuyayaya elyo no muyayaya.'' ¹⁴ Ifya mweo fine fyasosele , ''Ameni ! '' elyo abakalamba bawile panshi elyo bali mushinshimwine.