¹ Panuma ya ifi fintu naumfwile icaleumfwika kwati lishiwi ilikalamba ilya mpendwa ya bantu iyikalamba mu mulu lilebilikisha, ''Aleluya ! Ipusukilo, ubukata, na maka fyaba kuli Lesa wesu. ² Ubupingushi bwakwe bwa cine no mulinganya, pantu ena napingula cilende mukalamba uyo waonawile icalo na bucilende bwakwe. Wena na landula umulopa wa babomfi bakwe uwali ku minwe ya mwanakashi.'' ³ Bene ba sosele umuku wa cibili: "Aleluya! Icushi cifutumuka ukufuma muli ena umuyayaya no muyayaya." ⁴ Abakalamba amakumi yabili- na bane ne fyamweo fine bawile pamo no kushinshimuna Lesa, uyo waikele pa cipuna ca bufumu. Bena balesosa abati, ''Ameni. Aleluya!'' ⁵ Elyo ishiwi lya fumine mu cipuna ca bufumu, lileti, ''Lumbanyeni Lesa wesu, mwe babomfi bakwe bonse, imwe mwebatina wene, bonse abanono na bakalamba.'' ⁶ Elyo naumfwile icaleumfwika kwati lishiwi ilikalamba ilya bantu, kwati kupongoloka kwa menshi ayengi, kabili kwati ku punkana kwa kubulukuta, lileti, ''Aleluya! Pantu Shikulu aleteka, Lesa wesu, Uwamaka yonse. ⁷ Lekeni tusekelele no kusansamuka kabili no kumupela ubukata! Ico ukusefya kwa bwinga bwa Mwana wa mpanga kwaisa, kabili na nabwinga wakwe ali uwaiteyanya. ⁸ Alisuminishiwa ukufwala ishabenge shima kabili ishawama insalu shatelela'' (pantu insalu shatelela emilimo ya bulungami iya bantu bashila bakwa Lesa). ⁹ Malaika atile kuli ine, ''Lemba ifi : Balipalwa abo abaitwa ku mutebeto wa bwinga bwa Mwana wa mpanga.'' Kabili atile kuli ine, ''Aya mashiwi yacine aya kwa Lesa.'' ¹⁰ Nawilile pa nkasa shakwe ukumushinshimuna, lelo asosele kuli ine ukutila, ''Wicita ici! naine wine ndi mu bomfi munobe kabili na ba munonko abaikatilila ubunte bwa pali Yesu .Shishimuna Lesa,pantu ubunte bwapali Yesu mupashi wa busesemo.'' ¹¹ Elyo namwene umulu waisuka, elyo na loleshe kabili kwali kabalwe uwabuta .Uyo uwali pali kabalwe aleitwa uwacishika kabili icine. Niku mulinganya eko apingwila kabili no kulwa nkondo. ¹² Amenso yakwe yaba kwati lubingu lulebilima umulilo, kabili na ku mutwe wakwe kwaba ifilongwe ifingi. Ena alikwata ishina ilyo takwaba nangu umo uwalishiba kanofye umwine eka. ¹³ Afwala umwingila uyo uwatubikwa mu mulopa, kabili ishina lyakwe litwa ukutila Icebo cakwa Lesa. ¹⁴ No mulalo wa mu mulu walemukonka wene pali bakabalwe ba buta, nabafwala insalu shatelela, ishabuta ubusaka. ¹⁵ Mukanwa kakwe mufuma ulupanga ulwatwa ulo ominaka inko, kabili ashiteka ne nkoto ya cela. Wene anyantaula mucakufininamo imyangashi iya cipyu ca bukali bwakwa Lesa wa Maka yonse. ¹⁶ Wene aba neshina ilyalembwa pa mwingila wakwe kabili na pe tanta lyakwe: ''Imfumu ya shamfumu kabili Shikulu waba shikulu.'' ¹⁷ Namwene malaika na iminina mu kasuba. Wene aitile ne shiwi ilikalamba ku fyuni fyonse ifyalepupuka pamulu, ''Iseni, longaneni pamo ku mutebeto ukalamba uwa kwa Lesa. ¹⁸ Iseni mulye imibili ya shamfumu, imibili yaba mushika, imibili ya mpalume, Imibili ya bakabalwe naba pali bakabalwe, kabili ne mibili ya bantu bonse, bonse abantungwa na basha, abanono nabakalamba.'' ¹⁹ Namwene iciswango ne shamfumu sha pa calo ne milalo yabo. Bene balelongana ukutila balwe inkondo noyo uwali pali kabalwe no mulalo wakwe. ²⁰ Iciswango caliyikatwa pamo na kasesema wabufi uyo walecita ifishibilo mu ceni ca ciswango. Kuli fi fishibilo wene alufishe abo abapokelele ululembo lwa ciswango kabili abapepele icipasho ca ciko. Ifi fibili fyaposelwe ifituntulu muli bemba wa mulilo uwalepya no lubingu lwa libwe. ²¹ Abashele bonse baipaiwe kulupanga ulo lwafumine mu kanwa ka uyo uwali pali kabalwe. Ifyuni fyonse fyalile imibili yabo iyafwa.