¹ Itete lyapelwe kuli ine ukulibomfya nge nkonto yakupiminako. Nalyebelwe, "Ima no kupima itempele lyakwa Lesa ne cipailo, nabo aba shinshimunamo. ² Lelo wipima ulubansa lwa panse ye tempele, pantu nalupelwa ku bena fyalo. Bakanyantaula umusumba wa mushilo pa myenshi amakumi yane na ibili. ³ Nkapela inte shandi shibili amaka ya kusesema panshiku 1,260, nabafwala ifyakufwala fya masaka." ⁴ Ishi inte fimuti fya miolife fibili na ifyakutekapo inyali fibili ifyo ifyaiminine ku ntanshi yakwa Shikulu wapa calo. ⁵ Nga umo afwaya ukufisansa, umulilo ufuma mukanwa kabo no konaula abalwani babo. Onse uyo uwafwaya ukufisansa afwile aipaiwa muli iyi inshila ⁶ Ishi inte shalikwata amaka yakwisala umulu pakutila takuli imfula iikaloka munshiku isho bakalasesema. Nabakwata amaka yakupilibula amenshi mu mulopa no kuponesha pa calo ne cinkunkuma camusango uli onse ilyo lyonse bafwaya. ⁷ Ilyo bakapwisha ubunte bwabo, iciswango ico cisa ukufuma ku cilindi cabula mpela cikaleta ubulwi pali bena .Akabacimfya no kubepaya. ⁸ Imibili yabo ikalala mu musebo wa musumba ukalamba (ico icileimininako ukwitwa Sodoma na Egypto) uko Shikulu wabo atanikwe. ⁹ Panshiku shitatu na citika bamo ukufuma ku bantu abali bonse, imitundu, ululimi, ne inko bakamona pa mibili yabo. Tabakabasuminishe ukubabika mu nindi. ¹⁰ Abo abekala pa calo bakasangalala pali bena no kusefya. Bakatuma ne fyabupe kuli cila umo pantu aba bakasesema babili balicushishe abo abaikele pa calo. ¹¹ Lelo panuma ya nshiku shitatu na citika umupu wa mweo ukufuma kuli Lesa uka bengila, kabili bekeminina pa makasa yabo. Umwenso ukalamba ukaponena pali abo abale bamona. ¹² Elyo bakomfwa ishiwi ilikalamba ukufuma ku mulu lilanda kuli bena ati, "Iseni kuno !" Elyo bakanina mu mulu mu makumbi, ninshi abalwani babo baleloleshako. ¹³ Pali ilya insa kukaba icinkukuma icikalamba, icipande cimo ne fipande ikumi ifya musumba fikabongoloka. Abantu amakana cine lubali bakepaiwa mu cinkukuma, na abakapusuka bakomfwa umwenso no kupela ubukata kuli Lesa wa mu mulu. ¹⁴ Ubulanda bwa cibili bwapita. Mona! Ubulanda bwa citatu buleisa mukwangufyanya. ¹⁵ Elyo malaika wakulenga cinelubali alishishe ipenga lyakwe, na mashiwi ayakalamba yalandilwe mu mulu no kutila, "Ubufumu bwa pano calo bwayaluka bwaba bwakwa Shikulwifwe na Kristu wakwe, kabili akateka umuyayaya no muyayaya." ¹⁶ Elyo abakalamba amakumi yabili na ine, abaikala pa fipuna fyabo mu ceni cakwa Lesa, bakontamike ifinso fyabo no kushinshimuna Lesa. ¹⁷ Batile, "Twapela ukutotela kuli iwe, Shikulu Lesa wa maka yonse ,uyo ulipo kabili uwalipo, pantu walisenda amaka yobe ayakalamba kabili walitendeka ukuteka. ¹⁸ Inko shalikalipe apakalamaba ,lelo ubukali bobe nabwisa. Inshita naisa pakutila abafwa bapingulwe na pakuti wingalambula ababomfi bobe bakasesema na bantu bamushilo abakwa Lesa, nabo abaletina ishina lyobe, bonse abaice na bakalamba. Inshita naifika iyo walaonaula abo abale onaula icalo." ¹⁹ Elyo Itempele lyakwa Lesa mu mulu lyaiswilwe ne mbokoshi ya cipangano cakwe yalimoneke mukati ke tempele lyakwe .Kwali ukumyasha kwa nkuba, icilulumo, ukupanta kwa mfula, ne cinkunkuma, na imfula ya mabwe iikalamba.