¹ Ubu busokololo bwakwa Yesu Kristu ubo Lesa amupele kukulanga abasha bakwe ifili no kucitika. Alilengele ici ukwishibikwa pa kutuma malaika wakwe ku musha wakwe Yohane, ² uwapele ubunte palwa cebo cakwa Lesa no bunte bwakwa Yesu Kristu, nefintu fyonse ifyo amwene. ³ Alipalwa uyo ubelenga alebilikisha ubusesemo kabili nabo abomfwa ku mashiwi ya busesemo ubu na uyo uubela ifya lembwamo, pantu inshita naipalama. ⁴ Yohane, ku nkuta cine lubali isha mu Asia: Lekeni ukusenaminwa kube naimwe no mutende ukufuma kuli umo uuliko, kabili uwaliko, kabili uuli nokwisa, kabili ukufuma ku mipashi cine lubali ishaba pacinso cacipuna cakwe, ⁵ no kufuma kuli Yesu Kristu, uuli ni nte ya cishinka, ibeli ukufuma ku bafwa, kabili kateka wa shamfumu shapano isonde. Kuli uyo umo uwa tutemwa kabili atifumishe ukufuma ku masambi yesu ukupitila mumulopa wakwe- ⁶ atupangile ubufumu, bashimapepo bakwa Lesa wakwe kabili Shifwe-kuli ena kube ubukata na maka umuyayaya no muyayaya. Ameni. ⁷ Mona, aleisa na makumbi; ilinso lyonse likamumona, ukubikako nabo abamulashile. Yonse imitundu ya pe sonde ika lalosha pamulandu wakwe. ⁸ "Ninebo Alfa kabili Omega,'' efyasosa Shikulu Lesa, "umo uyo uuliko, kabili uwaliko, kabili uyo uuli no kwisa, Uwamaka yonse." ⁹ Ine, Yohane- muninenwe kabili umo uwakana nenu mukucula kabili mubufuma no kushipikisha mumutekatia kwaba ifyaba muli Yesu- cali pacishi icitwa Patimosi pamulandu wa cebo cakwa Lesa a pabunte bwakwa Yesu. ¹⁰ Nali mu Mupashi pa bushiku bwakwa Shikulu naumfwile kunuma yandi ishiwi ilikalamba kwati lipenga. ¹¹ Lyali sosele ati, ''Lemba ifyo ulemona mu citabo, kabili ucitume ku nkuta cine lubali- ku Efeso, ku Simina, ku Pegamo, ku Tiyotila, ku Sadisi, ku Filadelfia na ku Laodikea." ¹² Nalipilibwike ukuti mbone ishiwi lyakwa nani lyalesosa kuli ine, kabili ilyo napilibwike namwene ifya kutekapo inyali cine lubali isha golide. ¹³ Pakati ka cakutekapo inyali pali umo kwati mwana umwaume wa muntu, nafwala umwingila uutali uyo wafikile panshi ya makasa yakwe no mushipi wa golide washungulwike icifuba cakwe. ¹⁴ Umutwe wakwe no mushishi wali uwabuta nga ubutonge-uwabuta nga ubunga bwa mfula- na menso yakwe yali kwati lubingu lwamulilo. ¹⁵ Amakasa yakwe yali kwati mukuba uyo uwalopololwa,kwati mukuba uyo uwalopololwa mwi lungu, ne shiwi lyakwe lyali nge ciunda ca menshi ayengi aya lepongoloka. ¹⁶ Akwete intanda cinelubali mu kuboko kwa kulyo, no lupanga ulwatwa konse kubili lwalefuma mukanwa kakwe. Icinso cakwe cale bengeshima kwati kasuba kabalikishe sana. ¹⁷ Ilyo namumwene, naponene pa makasa yakwe ngo muntu uwafwa. Abikile ukuboko kwakwe ukwa ku kulyo pali ine no kusosa ati, "Wiba no mwenso. Nine uwa ntanshi kabili uwa kulekelesha ¹⁸ kabili umo uwamweo. Nali uwafwa, lelo mona, ndi uwamweo umuyayaya no muyayaya! Kabili ninkwata ne mfungulo shamfwa ne sha Kumbo. ¹⁹ Eico lemba panshi ifyo iwe wamona, cili nomba, ne fikacitika panuma ya ici. ²⁰ Nomba pabupilibulo ubwa fiswa ubwa ntanda cine lubali wa mwene mukuboko kwandi ukwa ku kulyo, ne fya kutekapo inyali cine lubali ifya golide: Intanda cinelubali ni bamalaika cinelubali aba nkuta, ne fya kutekapo inyali cine lubali ni nkuta cine lubali."