¹ Israeli aikele mu Shitimu, na baume batendeke ubulalelale na banakashi baku Moabu, ² pantu abena Moabu balitileko abantu ku malambo ya kuli tulesa twabo. Eico abantu balile kabili bakontamine kuli tu lesa twabena Moabu. ³ Abaume baku Israeli baisankenye muku shinshimuna Baali waku Peori, ne cipyu cakwa Yawe caishile pali Israeli. ⁴ Yawe aeba Mose ati, “Buula intungulushi shonse isha aba bantu, ushipaye pa lwalala pa cinso cakwa Yawe, pakuti icipyu icikali icakwa Yawe cifume pa bena Israeli.” ⁵ Mose aeba abapingushi ba mu Israeli ati, “Umupingushi onse ali nokwipaya abo bonse abaume bakwe abailundanya mukupepa Baali wa ku Peori.” ⁶ Elyo umwina Israeli umwaume aishile no mwanakashi umwina Midiani ku lupwa lwakwe, ninshi Mose no lukuta lonse ulwa bena Israeli balelila pa mwinshi we Tenti Lyakukumaninamo. ⁷ Ilyo Fineasi umwana umwaume wakwa Eleasa umwana umwaume uwakwa Aroni shimapepo amona ifi, ena afuma pa lukuta, abuula ifumo mu minwe yakwe, ⁸ akonka no mwina Israeli mwi tenti. Abapulinkanya ifumo bonse babili, lyapula mu mwaume umwina Israeli lyalasa no mwanakashi. Awe apopene ne cikuko caleka no kuleka icaleipaya abena Israeli. ⁹ Lelo abafwile ku cikuko bali amakana amakumi yabili na yane. ¹⁰ Elyo Yawe aebele Mose ati, ¹¹ “Fineasi umwana mwaume wakwa Eleasa umwana mwaume wakwa Aroni shimapepo, atalusha ubukali bwandi pa bena Israeli. Pantu napamfiwa nga ne mwine wine pakuncindika pa kati kabo, epakuti mu kupamfiwa kwandi nibalofya. ¹² Eico kanshi mwebeni ukuti ine nalapangana nankwe icipangano camutende. ¹³ Umwine pamo na ba mu lupwa lwakwe abakamukonkapo, bakakwata icipangano cakuba bashimapepo ba pe na pe, pantu alipamfiwe ukucindika Lesa wakwe, kabili ewafutila abena Israeli pa bubifi bwabo.” ¹⁴ Ishina lya mwina Israeli baipeye pamo no mwanakashi umwina Midiani, ni Simuri mwana Salu, intungulushi ya mu lupwa lwakwa Simeoni. ¹⁵ Kabili no mwanakashi umwina Midiani untu bakomene nao ali ni Kosibi mwana Suli, uwali intungulushi imo mu lupwa lwa bena Midiani. ¹⁶ Yawe aebele Mose ati, ¹⁷ “Lwisheni abena Midiani nga balwani benu no kubepaya. ¹⁸ Pantu nabo bamucitile nga balwani benu pakumubepa pa fyali kuno ku Peori, pa mulandu wakwa nkashi yabo Kosibi, umwana umwanakashi wa ntungulushi ya bena Midiani, uo baipeye ilyo kwali icikuko kuno ku Peori.”