¹ Ishiwi lyakwa Yawe lyaishile kuli Mika, uwaikele mu mushi wa Moresheti, pa nshita Yotamu ateekele icalo ca Yuda, na pa nshita Ahasi nao akonkelepo ukuciteeka, na pa nshita Hesekia nao aciteekelepo. Yawe alisokolwelele Mika ifi fintu palwa musumba wa Samaria na palwa musumba wa Yerusalemu mu cimonwa. Ubupingushi bwa musumba wa Samaria no wa Yerusalemu. ² Umfweni kuno imwe mwe bantu ba mitundu yonse. Kutikeni imwe bonse mwe baikala pano isonde. Lekeni Imfumu Yawe amushinine imwe. Umfweni Imfumu iyilelanda ukufuma mwi Tempele lyaiko ilyamushilo. ³ Moneni, Yawe ulya alefuma mwisano lyakwe ilyamushilo, alaika, alenyantaula na pa mulu wa mpili sha pano calo. ⁴ Ilyo akulapitapo, impili shakulasunguluka nge pula ilili ku mulilo, ne mipokapoka yakulalepuka kwati menshi ayalefumfumuka mu kapili ku mutentemuko. ⁵ Ifi fyonse filecitika pantu abakwa Yakobo balipula amafunde, kabili ni pa mulandu wa fyabubifi fya bena Israeli. Bushe kwena cinshi calenga ukuti abakwa Yakobo balebifya ifi? Ala musumba wine uwa Samaria. Nge calenga ukuti abantu ba mu calo ca Yuda balepepa utulubi, bushe cinshi? Ala musumba wine uwa Yerusalemu. ⁶ E mulandu wine kanshi Yawe alesosela ati, “Umusumba wa Samaria ine nkausangula umupili wa fitantala mu mpanga, nkausangula incende iyakulimamo imyangashi. Amabwe ayo bakuulila umusumba, ine nkayakunkulushisha mu mukonko, ne mifula yauko ine nkaisha pa mbilibili. ⁷ Tulya tulubi utwabamo utwamutengo tukasansaika tonse, ne mituulo yauko yonse ikapya, ifimpashanya fyonse ifya milungu yabo bakafyonaula. Ifintu ifyo batuula mu musumba fyafumine ku banakashi bacilende, eico nkalenga bambi nabo bakafibomfye ukupeela amalipilo ku banakashi bacilende.” Ukuloosha umusumba wa Yerusalemu na Yuda ⁸ Elyo Mika nao asosa ati, “Ine nakulaililila ubulanda, no kuloosha pa mulandu wa ici cintu. Ine nshakulafwala nsapato, kabili nakulaendafye ubwamba pakulanga ubulanda. Nakulabosa nga mumbwe no kulalosha nge ntitimushi. ⁹ Impumo sha bena Samaria teshakupola iyoo, nashifika na ku bena Yuda, efyo nabo bali nokulacula. Uboni nabufika na ku mpongolo sha musumba wa Yerusalemu wine, umwaikala abantu bandi.” Abalwani bapalama ku musumba wa Yerusalemu ¹⁰ Mwishimikilako balwani besu mu Gati, mwileka balemonako uko imwe mulelila. Imwe mwe bena Beti Leafula, mulealanganafye mu lukungu pakulanga ubulanda. ¹¹ Imwe mwe ba mu mushi wa Shafiri muleya muli bunkole, muleyafye ubwamba ne nsoni nashimwikata. Abaikala mu musumba wa Sanani tabakafumemo mu musumba wabo. Ilyo mukomfwa uko abena Beteseli baleloosha, mukeshibefye ukuti tekwakuyashina iyoo. ¹² Abena Maroti balenyongolokafye ku bukali, balelolela ukupemwinako, pantu Yawe napalamika icinkunka ku musumba wa Yerusalemu. ¹³ Imwe mwe baikala mu musumba wa Lakishi, kakileni bakabalwe ku maceleta no kubutuka. Imwe nimwe mwalenga umwana mwanakashi Sioni alebifya, pantu muli imwe mwali ukupepa utulubi ku bena Israeli. ¹⁴ Kanshi nomba imwe muli nokupeela umushi wa Moresheti Gati, ifyabupe fyakushalikana pamo. Umushi wa Akisibu ukasangwa ukuti, ewalebepaika ishamfumu sha mu calo ca Israeli. ¹⁵ Imwe mwe bena Maresha, nkamuposa ku mulwani umo uukapoka umushi wenu. Imfumu iyateeka icalo ca Israeli ikafulumuka, ikaya fisama na mu lucengo lwa Adulamu. ¹⁶ Beyeni imishishi pakuloosha abana benu abo mwatemwisha, ku mitwe yenu kwishala mishishi. Lekeni imitwe yenu ibefye nge mitwe ya makubi, pantu bakamupoka abana, bakabasenda na bunkole.