¹ ''Pantu ubufumu bwa mu mulu bwaba ngo mwine webala uwafumine lucelo celo mukufwaya abancito abakubomba mwibala lya myangashi. ² Panuma yaku mfwana na bancito ukubalipila amalipilo ya pa bushiku bumo, abatumine mwibala lya myangashi. ³ Nakabili afumine panse pa nsa yalenga shitatu kabili amwene ababomfi bambi nabeminina fye pa mushiika ⁴ kuli bena atile, 'Na imwe, kabiyeni mwibala lya myangashi, kabili ndeisa mupela amalipilo ayalingile.' Eico baile mu kubomba. ⁵ Nakabili alifumine pa nsa iyalenga mutanda na kabili pa nsa iyalenga pabula, kabili acitile cimo cine. ⁶ Nakabili pa nsa iyalenga ikumi limo na imo alifumine kabili asangile nabambi nabeminina fye. Atile kuli bena, 'Cinshi mwiminine fye pano inshita yonse iyi?' ⁷ ''Batile kuli ena, ''Pantu tapali nangu uumo uwakutwingisha incito, ''Atile kuli bena, 'Kabiyeni naimwe mwibala lya myangashi.' ⁸ Ilyo icungulo cafikile, umwine we bala lya myangashi atile ku mukalamba waba bomfi bakwe, 'Ita ababomfi kabili ubalipile amalipilo yabo, ukwambila pawa kulekesha ukufika pawa ntanshi.' ⁹ ''Ilyo ababomfi abo baingishe pansa ikumi limo naimo baishile, cilaumo apokelele denari. ¹⁰ Ilyo aba bomfi bantanshi baishile, bantontonkenye balapokelela amalipilo ayengi, lelo bapokelele denari umo wine. ¹¹ Ilyo bapokelele amalipilo yabo, bailishenye pa mwine webala. ¹² Batile, 'Aba ababomfi bakulekelesha babombafye insa imo, lelo waba linganya cimo cine naifwe, ifwe fwe babomba akasuba konse kabili twacululuka mukubomba akasuba konse nokupya ku kasuba.' ¹³ ''Lelo umwine ayaswike kuli umo pali bena, 'Cibusa, nshi ku citile icibi iwe. Bushe tatwa cisuminishanya pali denari umo? ¹⁴ Senda icobe nokuya inshila yobe. Nasala ukupeela aba bomfi aba kulekelesha fimo fine naiwe. ¹⁵ Bushe tacili icasuminishiwa kuli ine ukucita ico ndefwaya kucintu icandi? Bushe wamfimbila pamulandu ndi musuma?' ¹⁶ Eico aba lekelesha bakaba abantanshi, nabantashi bakaba aba lekelesha.'' ¹⁷ Ilyo Yesu aleya ku Yerusalemu, asendele abasambi ikumi nababili pambali, kabili na munshila asosele kuli bena, ¹⁸ ''Lelosheni, tuleya ku Yerusalemu, no Mwana Wamuntu alinokupeelwa muminwe yabashimapepo mukalamba naba kalemba. Akasekwa ukufika na kumfwa ¹⁹ nokumupeela ku bena Fyalo mukumucusha, mu kumupumya, mu kumukapaula, kabili no kumutanika. Lelo pa bushiku bwalenga shitatu akabushiwa bushiwa.'' ²⁰ Elyo nyina wabana baume bakwa Zebbede aishile kuli Yesu nabana abaume bakwe. Awile panshi nokwipushako cimo kuli ena. ²¹ Yesu atile kuli ena, ''Cinshi ico ulekabila?'' Ayaswike kuli ena, '' Konkomesha ukuti aba bana bandi babili abaume bekaleko, umo ku kulyo kwa kuboko kobe naumbi ku kuboko kwa kuso kobe mu bufumu bobe.'' ²² Lelo Yesu alyaswike no kutila, ''tawishibe ico ulelomba. Bushe kuti mwakuma ku lukombo luntu nde kwata ukunwa?'' Bali mwaswike, ''tuli aba ipekanya.'' ²³ Atile kuli bena, ''Ulukombo cine mwalanwa. Lelo ukwikala ku kuboko kwa kukulyo kwandi no kuboko kwa kukuso kwandi teine ukupeela, lelo cili kuli abo ca pekanishiwa na Tata.'' ²⁴ Ilyo abasamba bambi ikumi baumfwile ici, bali kalipe nganshi pali ba munyina babili. ²⁵ Lelo Yesu alibetile kumwine no kusosa,'' Mwalishiba ukuti bakateeka ba bena Fyalo balikwata amaka pali bena, naba shimucindikwa babo balabomfya insambu pali bena. ²⁶ Lelo ici cimusango tacifwile caba pakati kenu. Lelo uyo onse ulekabila ukuba umukalamba pali baimwe afwile aba umusha wenu, ²⁷ Kabili onse ulekabila ukuba uwa ntanshi afwile aba umusha, ²⁸ Nga fintu Umwana wa Muntu taishile mukubombelwa, lelo aishile mukubomba, nokupeela umweo wakwe ngece lambo ku bengi.'' ²⁹ Ilyo balefuma mu Yeriko, ibumba ilikalamba lyali mukonkele. ³⁰ Kwali impofu shibili ishaume ishaikele ku mbali ya musebo. Ilyo shaumfwile ukuti Yesu alepita, shabilikishe, ''Shikulu, Mwana Dabidi, tubelele uluse,'' ³¹ Ibumba lyalishikalipile, ukubeba ukutila babe tondolo, lelo babilikishe apakalamba, ''Shikulu, Mwana Dabidi, tubelele uluse,'' ³² Elyo Yesu aiminine no kubeta no kutila, ''Cinshi mulefwaya ukuti imicitile?'' ³³ Batile kuli ena, ''Shikulu, ukutila amenso yesu yesuke.'' ³⁴ Elyo Yesu, aisushiwemo ne nkumbu, aikete pamenso yabo. Palya pene bashibwilwe amenso yabo no ku mukonka.