¹ Panuma ilyo Yesu afyelwe ku Betelehemu mu Yudeya panshita Herodi ali imfumu, abamano bamo bafumine ku kabanga bafikile mu Yelusalemu nokutila, ² "Bushe umwana afyalwa imfumu yaba Yuda alikwi? Twamwene ulutanda lwakwe ku kabanga eico twaisa mukumu pepa ?" ³ Elyo imfumu Herodi yaumfwile ifi, yasakamene, kabili na Yerusalemu onse capamo. ⁴ Herodi akolonganike bonse bashimapepo mukalamba naba kalemba ba bantu, kabili alibepwishe, "Nikwi Kristu ali nokufyalilwa?" ⁵ Nabo bamwebele abati, "Ni mu Betelehemu wa mu Yudeya, pantu efyo na kasesema alemba, ⁶ 'Lelo iwe, Betelehemu, mu calo cakwa Yuda, tawacepesha nakalya muli bakateka bakwa Yuda, pantu ni muli iwe mukafuma kateeka, uukucema abantu bandi abena Israeli."' ⁷ Elyo Herodi aitile abasambilila mu bumfisolo ku kubepukisha pa nshita ilyo ulutanda lwamoneke. ⁸ Alibatumine ukuya ku Betelehemu, abebele ati, "Kabiyeni muyefwailisha bwino palwa uyu mwana umunono. Elyo nga mwamusanga, mukese njishibisha pakuti naine nkaye mupepa." ⁹ Panuma yakumfwa ku mfumu, balimine balaya mu nshila yabo, elyo ulutanda bamwene ku kabanga lwaba tangilile lwasuka lwaisa iminina na paali umwana umunono. ¹⁰ Cilya bamona ulutanda, basansamuka apakalamba. ¹¹ Baingile mu nganda no kumona umwana na nyina Maria. Bawile panshi noku mupepa. Bakakwile ifyabupe ifikankala basendele bamutulile golide, ifyacena cisuma, na muri. ¹² Lesa abasokele mu ciloto ukuti bebwelela kuli Herodi, eico batolele ne nshila imbi babwelelamo na ku mwabo. ¹³ Panuma bafumineko, malaika wakwa Shikulu amonekele kuli Yosefu mu ciloto no kumweba ati, "Ima, buula umwana na nyina, butukila ku Egupto. Eko uli nokwikala mpaka nkakwebe, pantu Herodi alefwaya ukonaula umwana." ¹⁴ Bulya bwine ubushiku Yosefu alimine abuulile umwana na nyina nokuya ku Egupto. ¹⁵ Eko aikele mpaka ne mfwa yakwa Herodi. Ifi fyafikilishe ifyo Shikulu asosele ukupitila muli kasesema, ukutila, "Naitile umwana wandi umwaume ukufuma mu Egupto." ¹⁶ Ilyo Herodi, amwene ukuti abasambilila ba mupumya, afulilwe nganshi. Atumine mu Betelehemu na mu mishi iyali mu mbali yonse abakwipaya abana baume bonse abali ne myaka ya kufyalwa ibili no kucepapo, ukulingana nomo aumfwilile palwa nshita ku basambilila. ¹⁷ Epakufikilishiwa ifyo kasesema Yeremia asosele, ukutila, ¹⁸ "Mu Rama mwaumfwika ishiwi, ukulila no kulosha uku kalamba, Ni Rakeli eulelosha bamwane, nakana no kutalalikwa, ico bashilipo." ¹⁹ Ilyo Herodi afwile, moneni, malaika wakwa Shikulu amonekele kuli Yosefu mu ciloto mu Egupto no kumweba ati, ²⁰ "Ima buula umwana na nyina bwelele ku calo ca Israeli, pantu abalefwaya ukwipaya umwana nabafwa." ²¹ Yosefu epakwima, abula umwana na nyina, abwelela na ku calo ca Israeli. ²² Lelo ilyo aumfwile ukuti Akeleo euleteeka mu Yudeya pa malo yakwa wishi Herodi, ali tinine ukuya kulya. Panuma Lesa amusokele mu ciloto, aile ku calo ca Galili ²³ elyo aya ikala na mu musumba uo batila Nasaleti. Ici cafikilishe ifyasoselwe na bakasesema, ukuti bakalamwita umwina Nasaleti.