¹ Yawe atile kuli Mose, ² “Eba Aroni na bana bakwe abaume na bonse abena Israeli nokutila kuli bena, ‘Ifi efyo Yawe akonkomeshe ifyakutila, ³ onse umwina Israeli uwaipaya iŋombe nangu impaanga nangu imbushi, mu nkambi nangu kunse ya nkambi, ⁴ ukwabula ukuti ailete pa mwinshi we Tenti Lyakukumaninamo no kupeela ngo mutuulo kuli Yawe, pantanshi ye Tenti lyakwa Lesa, uyo muntu ninshi ali no mulandu wakusumya umulopa. Nasumya umulopa, eico ena uyu wakutamfyafye mu bantu bandi. ⁵ Ifi emukutila abena Israeli baleke ukuleta inama isho bepaile kumbi ukuba ishe lambo, lelo baleleta inama she lambo lyakwa Yawe pa mwinshi we Tenti Lyakukumaninamo kuli shimapepo no kwisa fituula nge lambo lya mutuulo wakwampana. ⁶ Shimapepo nao ali nokukana umulopa ku bulambo bwakwa Yawe, pa mwinshi we Tenti Lyakukumaninamo, no koca amafuta ukuba umutuulo wa cena icisuma icisekesha Yawe. ⁷ Ifi ni pakuti tabafwile kabili ukutuula imituulo imbi iya malambo ku tulubi twa mbushi uto baicitileko bucilende pakutukonka. Ili e funde lyamuyayaya kuli bena na ku nkulo shonse ishili nokukonkapo.’ ⁸ “Sosa kuli bene auti, ‘Uyo onse umwina Israeli nangufye mwinafyalo uo mwikala nankwe, nga atuula ilambo lyakoca, nangu ilambo limbifye, ⁹ nomba nga taletele ifi ku mwinshi we Tenti Lyakukumaninamo no kutuula ili lambo kuli Yawe, uyo muntu wakutamfyafye mu bantu bandi.’ ¹⁰ “Uyo onse umwina Israeli nangufye mwinafyalo uo mwikala nankwe uulya umulopa onse, Yawe ali nokumupeela umulandu pakulya umulopa kabili ena wakutamfyafye mwibumba lya bantu bakwe. ¹¹ Pantu ubumi bwa cibumbwa conse bwaba mu mulopa, kabili eico ngupeelela kuli imwe ukuba icakumufutilako pa bulambo. Ala mulopa eufutilako ubumi bwa muntu. ¹² Eico ndeeba abena Israeli ukuti, ‘Takuli umuntu nelyo umo uufwile ukulya umulopa, nangu umwinafyalo uo mwikala nankwe.’ ¹³ “Umwina Israeli onse, nangufye mwinafyalo uo mwikala nankwe, uwaipaya inama nangufye icuni ico abantu balya, afwile asumisha umulopa panshi no kushiikapo ne loba. ¹⁴ Pantu ubumi bwa cintu conse icamweo bwaba mu mulopa. Uyu wine e mulandu naebela abana ba Israeli ukuti, ‘Tamufwile ukulya umulopa wa camweo conse, pantu ubumi bwa cintu conse bwaba mu mulopa.’ Eico na onse uwalya umulopa, wakutamfyafye mwibumba lya bantu bakwe. ¹⁵ “Uyo onse umwikalacalo nangufye mwinafyalo uwalya inama iyaifwila, nangu iyaikatwa ku fiswango, afwile acapa insalu shakwe no kowa umubili onse na menshi, kabili ali nokuba uwakowela mpaka icungulo, elyo ninshi engaba uwasangululwa. ¹⁶ Nga cakuti tacapile ifyakufwala fyakwe elyo no kowa umubili onse, awe ali nokupeelwa umulandu.”