¹ Yawe aitile Mose ukufuma mwi Tenti Lyakukumaninamo, alamupeela ifikomo ati, ² “Sosa ku bena Israeli utile, ‘Umuntu onse ilyo aleleta umutuulo kuli Yawe, nabuulepo ica mu fitekwa fyakwe, iŋombe, impaanga nangu imbushi.’ ³ “Ngo mutuulo uli lilambo lyakoca ilya ŋombe, afwile apeela iyilume iyabula akalema. Ali nokuileta pa mpongolo ye Tenti Lyakukumaninamo, lyena elyo Yawe ali nokupokelela. ⁴ Kabili natambalike ukuboko kwakwe pa mutwe we lambo lyakoca, elyo lyena lili nokupokelelwa nge cakufutilwako pa bubifi bwakwe. ⁵ Elyo panuma yakwipaya cilume wa ŋombe pa cinso cakwa Yawe, bashimapepo bamwana Aroni abaume babuule umulopa no kulakana mu mbali shonse isha bulambo ku mpongolo ye Tenti Lyakukumaninamo. ⁶ Uuletele inama ye lambo lyakoca, afwile ukufunda no kuiputaula mu fipimfya finono finono. ⁷ Bamwana Aroni shimapepo abaume bali nokukosha umulilo pa bulambo no kupekanya inkuni shakukoseshapo. ⁸ Bamwana Aroni abaume bashimapepo bali nokubikapo ifipimfya elyo no mutwe ne fya mafuta pa cininkwa ca mulilo wa nkuni icili pa bulambo. ⁹ Kabili ifya munda fyonse pamo pene na molu afisamfye no kufyocela pamo pa bulambo kuli shimapepo. Nili line ilambo lyakoca, e mutuulo wa cakoca kuli Yawe, uwa cena cisuma icisekesha Yawe. ¹⁰ “Ngo mutuulo alepeela uli lilambo lyakoca ilyafuma pa mukuni wa mpaanga, nangu ukufuma pa mbushi, ifwile yaba iyilume iyabula akalema. ¹¹ Uuletele nama ye lambo afwile aipaila ku kapinda ka ku kuso ka bulambo pa cinso cakwa Yawe. Bashimapepo bamwana Aroni abaume bali nokukana umulopa waiko mu mbali shonse isha bulambo. ¹² Ilyo uyu muntu apwisha ukuputaula iyi nama, shimapepo ali nokubika ifipimfya fyonse pa cininkwa ca mulilo wa nkuni icili pa bulambo, kumo kwine no mutwe na mafuta. ¹³ Kabili ifya munda fyonse, pamo pene na molu afisambe na menshi, elyo shimapepo afilonganike pamo no kufyocela pa bulambo. Nili line ilambo lyakoca, e mutuulo wa cakoca kuli Yawe, uwa cena cisuma icisekesha Yawe. ¹⁴ “Ngo mutuulo alepeela kuli Yawe uli lilambo lyakoca ilya cuni, alingile ukutuula icipele nangu utubondo twa nkunda. ¹⁵ Shimapepo ali nokucileta ku bulambo, acinyongotola no kucocela pa bulambo. Umulopa waciko auleke ukonkolokele mumbali ya bulambo. ¹⁶ Uyu shimapepo, nafumye icituka na fyonse ifilimo elyo na masako no kufiposa ku kabanga ka bulambo uko betila imito. ¹⁷ Kabili ali nokucipansa pakati, tekufumyako amapindo iyoo. Lyena shimapepo ali nokucoca pa mulilo wa bulambo. Ili e lambo lyakoca, e mutuulo wa cakoca, uwa cena cisuma icisekesha Yawe.”