¹ Umfweni mwe myulu, na ine nalalanda, umfwa we calo, amashiwi ya mu kanwa kandi. ² Lekeni ukufunda kwandi kuloke nge mfula, na mashiwi yandi yalewa ngo mume, ngo kumima kwa mfula pa mulemfwe, nge mfula iyingi ileloka pa lulembelya. ³ Ine nkalasabankanya ishina lyakwa Yawe. Mulelondolola ubulumbwa bwa bucindami bwakwa Lesa wesu! ⁴ Ena e cilibwe, ne milimo yakwe yaba iyapwililika, kabili ne nshila shakwe shintu shalungama. Lesa wacishinka uushicita cilubo, mololoke kabili wamulinganya. ⁵ Bena bacitile ifyalubana ku nsoni shabo, tabali nomba bana bakwe, lelo bantu baulungana kabili inkulo yabucenjeshi. ⁶ Bushe uyu e musango mwingatashishamo Yawe, mwe fipumbu kabili mwe mpelwamano sha bantu? Bushe te Shinwe, Kabumba wenu, uwamupanga no kumubumba? ⁷ Ibukisheni inshiku shakale ishapita, tontonkanyeni pa nkulo shapita kale, ipusheni bashinwe nabo balamweba, abakalamba benu, nabo balemulondolwela. ⁸  Ilyo Lesa Mukulu apeele imishobo ifyacishilano fyabo, ilyo apatulwile abantu bonse, ewapakenye imipaka ku bantu ukulingana ne mpendwa ya bana baume bakwa Lesa. ⁹ Pantu icakaniko cakwa Yawe bantu bakwe, Yakobo e cishilano cakwe. ¹⁰ Mu calo ca matololo emo asangile Yakobo, mu ciswebebe kabili umwakungulika ku cimwela ca lukungu. Amucingilila no kumusunga. Alamusunga nge imboni ya linso lyakwe, ¹¹ kwati ni kapumpe uulesunga icisansala cakwe no kulelemba pali bamwane, ayansa amapindo yakwe pakubaanka kabili abasenda pa mapindo yakwe. ¹² Yawe ekafye ewamutungulwile, takwali mulungu wa benafyalo uwali nankwe. ¹³ Alenga Yakobo ukunina pa ncende ishasansuka pa calo, no kumulisha ifisabo fya mu mabala. Amulisha no buci bwa mu mabwe, na mafuta ku miolifa ya mu nsakalabwe, ¹⁴ no mukaka uwatikama no wasongoloka uwalefuma ku fitekwa, imbushi ne mpaanga ishaina, na basukusuku abasalwa aba ku Bashani, pamo ne mitwe ya ŋanu ishisuma. Wanwene no mwangashi uwabila. ¹⁵ Yeshuruni aliinine, elyo alaitutumuna, ilyo aleikuta ifyakulya, atuluka no kutelela. Asangukile Lesa uwamubumbile no kusuule Cilibwe, Umupusushi wakwe. ¹⁶ Balengele Yawe ukuba no bufuba pa mulandu wa milungu yabo iya benafyalo, kabili balimukalifye pa mulandu wa tulubi twabo utushaibipila. ¹⁷ Baletuula amalambo ku mipashi iyakowela, iyishali imilungu, imilungu bashatalile abeshiba, imilungu iyalifye iyipya, imilungu ifikolwe fyenu fishatalile afitiina. ¹⁸ Mwasuulile Icilibwe, icali Shinwe. Mwalabile Lesa intulo ya bumi bwenu. ¹⁹ Ilyo Yawe amwene ifi, abakaana, pantu balimukalifye umutima abana bakwe abaume na banakashi. ²⁰ Epakusosa ati, “Nkafisa icinso candi uko bali, elyo nkamona impela yabo ifyo ikaba. Pantu ni nkulo iyaulungana, abana ababula icishinka. ²¹ Banengele ukuba no bufuba pa mulandu wa cishili umulungu, kabili bankalifye ku tulubi twabo utwaciwelewele. Nkalenga ukuti bakabe no mufimbila ku bantu abashaba mushobo wine wine, Nkalenga ukuti bakafulwe ku mushobo wa fiwelewele fya bantu. ²² Pantu umulilo naukoshiwa ku bukali bwandi, uwaka ukufika na ku calo ca bafwa, Ukonaula icalo no busomboshi bwaciko, kabili ukoca napo impili shaiminina. ²³ “Nkatulika ifinkunka pali bena, kabili nkapwisha imifwi yandi pali bena. ²⁴ Nkabaletela icipowe icakubapwa icinkunka cakubonaula ne cikuko icikali. Nkabaletela ameno ya fiswango, no busungu bwa nsoka ishikulaika mu lukungu. ²⁵ Panse ulupanga lukalenga ukufwilwa abana, mu mayanda mukalaletesha umwenso. Abalumendo na bakashana bakafwa, utwa ku mabele na bakote abaume bakafwila kumo. ²⁶ Ine natile nkabapasa, pakuti bekalaibukishiwa ku bantu, ²⁷ Lelo natiinine ukusonsomba kwa balwani, epali umulwani afilwa ukumfwa, elyo asosa ati, ‘Ukuboko kwesu nakucimfya. Yawe teucitile ifi, iyoo!’ ” ²⁸ Umushobo uyu tawakwata mano, Tamwaba kwiluka muli bena. ²⁹ Nga cakutilafye bali bamano kabili kuti baishiba umo cilolele ici no kwiluka pafyo impela yabo ingaba! ³⁰ Bushe umuntu umo kuti afulumuna shani abantu ikana limo (1,000), nangu abantu babili kuti babutusha shani abantu abali amakana ikumi (10,000)? Kanofye ninshi Icilibwe cabo nacibashitisha, kanofye ninshi Yawe nabasuulako. ³¹ Pantu ilibwe lyabo talyaba nge Cilibwe cesu, apo na balwani besu balisumina. ³² Umwangashi wabo ufuma ku mwangashi wa ku Sodoma, kabili ufuma mu mabala ya mu Gomora. Ifitwalo fyaiko fyaisulamo ubusungu, kabili ifisansangu fyaiko fintu fyalula. ³³ Umwangashi wabo busungu bwa nsoka, ubusungu ubukali ubwa bangoshe. ³⁴ “Bushe nshabika ifi mu butala, kabili no kufimashilila mu cipao? ³⁵ Ne mwine wacilandushi nine, kabili nkabakanda. Inshita ikafika ilyo amakasa yabo yakashelela, ubushiku bwabo ubwa finkunka nabupalama, kabili ne shamo lileisa ulubilo pali bena.” ³⁶ Yawe akapokolola abantu bakwe, kabili akakwatila ababomfi bakwe uluse ilyo akamona ukuti nomba amaka yabo nayapwa, kabili tapali nangu umo uushelepo, umusha nangu umuntungwa. ³⁷ Elyo Yawe akatila, “Nomba imilungu yabo ili kwi, iyi balebutukilako nge cilibwe cakubacingililako? ³⁸ Imilungu ili kwi iyalelya amafuta ya malambo yabo, kabili iyalenwa umwangashi wa mutuulo wa fyakunwa? Lekeni eyo ime imwafweko! Lekeni eyo imucingilile! ³⁹ “Moneni nomba ukuti ine wine nine Lesa. Takwaba umulungu umbi ukucila pali ine. Ndepaya kabili ndabusha ku bafwa, ndacena kabili ndaposha, kabili takwaba nangu umo uwingapokolola ukufuma mu minwe yandi. ⁴⁰ Naimya ukuboko kwandi mu mulu no kusosa ukuti, apofye ine ndi Lesa Umumi wape, ⁴¹ ilyo nanona ulupanga lwandi ulwabeka, kabili no kuboko kwandi kwalwikata pakupingula, nkacita icilandushi pa balwani bandi, nkakanda na balya abampata. ⁴² Nkalenga imifwi yandi ikaletona imilopa, ilyo ulupanga lwandi lulesantaula iminofu, umulopa wa baipaiwa no wa bankole, imitwe ya ntungulushi sha balwani.” ⁴³ Sansamukeni, mwe mishobo pamo na bantu bakwe.  Pantu akalandula umulopa wa babomfi bakwe. Ali nokucita icilandushi pa balwani bakwe, elyo akafutileko icalo na bantu bakwe. ⁴⁴ Mose baishile na Yoshua mwana Nuni no kulanda amashiwi yonse aya ulu lwimbo ninshi abantu baleumfwa.  ⁴⁵ Ilyo Mose apwile ukusosa amashiwi yonse aya ku bena Israeli bonse, ⁴⁶ atile kuli bena, “Mulebika mu mitima amashiwi yonse ayo nasosa mu cine ilelo, pakuti mulekonkomesha abana benu ukulabeela bwino amashiwi yonse aya mafunde aya.  ⁴⁷ Te mashiwi yafyefye kuli imwe, e bumi bwenu. Muli yena emo mukekala inshiku ishingi mu calo mwalayabukila Yordani mukucipoka.” ^{48 49} Pa bushiku bumo bwine Yawe aebele Mose ati,  “Nina ulupili lwa Nebo, ulwa mu mpili sha Abarimu, mu calo ca Moabu, ukulungatana no musumba wa Yeriko, utambe icalo ca Kenani, ico ine nalapeela abena Israeli ukuba icuma cabo. ⁵⁰ Pali lulya lwine lupili walanina epo uleya fwila no kuya lala ukwalala abantu bobe, nga filya fine munonko Aroni afwilile pa lupili lwa Hori no kuya lala ukwalala abantu bakwe.  ⁵¹ Pantu imwe bonse babili tamwancetekele pa cinso ca bena Israeli pa cishima ca ku Meriba Kadeshi mu matololo ya Sini, kabili pantu tamwalangile ukuti ndi wamushilo pa cinso ca bena Israeli.  ⁵² Eico ulemonakofye cilya calo akatalamukila, tawakengilemo mu calo ndepeela abena Israeli.”