¹ Kabili Mose atile, “Imwe muli bana bakwa Yawe Lesa wenu. Tecakwesha ukuitetaula mwe bene, nangu ukubeya inkuso, pa mulandu waufwile, ² pantu imwe muli bantu bamushilo abakwa Yawe Lesa wenu. Yawe alimusala ukufuma mu bantufye bonse mpanga yonse pano isonde lyonse ukuba abantu bakwe abo acindamika. ³ Tecakwesha ukulya conse icamuselu.  ⁴ Ishi e nama mulingile ukulya, iŋombe, impaanga, imbushi, insebula, nasele, impombo, mula, icibushi mabwe, inkonshi ne mpelembe.  ⁵ Kuti mwalya inama ishapwililika ukupanduka ifibondo, elyo ishibukula ifyakulya. ⁶ Kuti mwalya inama ishapwililika ukupanduka ifibondo, elyo ishibukula ifyakulya. ⁷ Nomba pa nama ishibukula nangu ishapanduka ifibondo, pamo nga ingamila, kalulu nangu pati, mwilalya. Ishi nelyo shibukula, tashapanduka fibondo, nasho shintu shakowela kuli imwe. ⁸ Mwilalya nkumba, pantu intu yakowela nangu yapanduka ifibondo, nomba taibukula ifyakulya iyoo. Tecakwesha kulya inama yaiko nangu ukukumya ku citumbi caiko. ⁹ “Pali fyonse ifipema ifyaba mu menshi, kuti mwalya conse icakwata utulebelebe na mamba. ¹⁰ Lelo consefye icishakwata tulebelebe na mamba tecakwesha kulya pantu cintu cakowela kuli imwe. ¹¹ “Kuti mwalya icuni conse icishakowela.  ¹² Lelo ifi e fyuni ifyo mushili nakulya, ¹³ kapumpe, ikubi likalamba ne kubi ilyafiita, bapungwa abali bonse, pumbwa, akapata makanga imisango yonse, ¹⁴ mwankole imisango yonse,  ¹⁵ imbuni, akambasa, ¹⁶ isela ne nkoshi sha misango yonse,  akapululu kanono, icipululu, swelelele,  ¹⁷ intitimushi, ikubi lyabuuta, inondo, ¹⁸ icipansankola, inkoba isha misango misango na pupute elyo na kasusu. ¹⁹ “Ifishishi fyonse ifipupuka, fintu fyakowela kuli imwe, tecakwesha ukulya.  ²⁰ Lelo ifipema fimbi ifyakwata amapindo ifishili fyakowela, fyena kuti mwalya. ²¹ “Mwilalya fyonse mwasanga nafiifwila. Ifi fyena kuti mwapeela abenafyalo muleikala nabo mu musumba uuli onse, bena kuti balya, nangu kuti mwashitisha ku benafyalo. Pantu imwe muli bantu bamushilo abakwa Yawe Lesa wenu. “Mwilaipikila akana ka mbushi mu mukaka wakwa nyina.” ²² “Cila mwaka pafyo mukalasombola mu mabala yenu, mukalebuulapo icekumi pekumi limo. ²³ Mukalelya icapekumi ca ŋanu shenu, umwangashi upya na mafuta, kabili ne beli lya ŋombe ne fitekwa fyenu fyonse pa cinso cakwa Yawe Lesa wenu pa ncende akasala nge cifulo ce shina lyakwe, pakuti mukasambilile ukukwatila Yawe Lesa wenu akatiina inshita yonse. ²⁴ Nomba nga ilya ncende yaba ukutali noko mwikala, icakuti mwafilwa no kusenda ifyekumi pafyo Yawe Lesa wenu amupaala, (pantu incende iyo Yawe Lesa wenu akasala nge cifulo ce shina lyakwe ili ukutali nganshi),  ²⁵ lyena mulekabula ifyapekumi ne ndalama, elyo mukalesenda isho ndalama no kuya nasho ku ncende iyo Yawe Lesa wenu akasala. ²⁶ Isho shine indalama esho mukalebomfya ukushitamo fyonse ifyo mulefwaya pamo nge ŋombe, impaanga, umwangashi nangu icakunwa icikola, nangu fimbi ifyo mwingatemwa. Kulya kwine pa cinso cakwa Yawe Lesa wenu, imwe pamo na ba mu ŋanda yenu eko mukalelya no kusansamuka. ²⁷ Nomba mwikalaba kubaka abena Levi mukalaikala nabo mu misumba yenu, pantu tabaikwatila citungu nangu icacishilano cabo. ²⁸ “Pa mpela ya mwaka walenga butatu, mukaleleta icipande ca pa fyekumi fyonse pa fintu mwasombwele mu mwaka wine uyo, mukatutile na mu misumba yenu,  ²⁹ pakuti abena Levi abashaikwatila citungu nangu icacishilano cabo, abenafyalo, bakashiwa na bamukamfwilwa abakalaikala mu misumba yenu baleisa mukupokako icakulalya conse balekabila epakuti Yawe Lesa wenu akalemupaala muli fyonse ifyo mukalabomba.”