¹ Lelo webo, ule kusambilisha ifya kuti tafipusene naku mafunde aya cine. ² Ule kusamblisha abaume abakulu ukulekuba aba kutekanya, ne misango iya bune, aba mano, tabali na kunenuka mu cisumino, mu kutemwa elo namu kushipikisha. ³ Mu musango umo wine ule kusambilisha na banakashi abakulu ifyo fine balekuba ne misango nga abanakashi, tabafwile ukule kubepeshanya ubufi, nangu ukuba abasha ba bwalwa, lelo bali no kulekufunda ifya bune, ⁴ elo no kukambisha aba kashana uku lekutemwa abalume babo elo noku lekutemwa abana babo, ⁵ ba lekuba aba kutekanya, aba kaele, aba kusunga ama yanda yabo bune bune, elo no kulekuba ne cumfwilo ku balume babo, epa kweba ati pela kulandikwa ifya bubi pa mashiwi yakwa Lesa. ⁶ Mu musango umo wine, ule kukoselesha abalumendo ukule kutekanya. ⁷ Muli fyonse webo wine ule kuba icilangililo ica milimo ya bune. Mu kusambilisha kobe, ule kulanga ubu mpomfu, ukushipa, ⁸ elo ule kubomfya amashiwi aya bune aya kweba ati tekuti pabe uwa kuyasalusha, epa kweba ati abalwani bobe bale kuikwatila insoni pa mulandu wakuti bafilwa ukukwata ifya bubi ifya kulanda pali fwebo. ⁹ Abasha bali nokuba aba cumfwila kuli bashikulwibo muli fyonse, ule kuba sansamusha elo tali kulekulaka nabo, ¹⁰ tali kubebila, lelo bafwile uku lekuilanga ukweba ati bantu aba bune inshita fye yonse, epa kutila ati muli fyonse ifyo bakocita filekuleta umucinshi pa fisambilishiwa pali Lesa Kalubula wesu. ¹¹ Pantu icikuuku cakwa Lesa cali sokolokela mwi pusukilo lya bantu bonse. ¹² Ici icikuuku cali tusambilisha ukuleka imibele iitali ya bwina Lesa elo no lunkumbwa ulwa fya pano pa calo, elo uku lekwikala aba kutekanya, abololoke, elo ukulekwikala muli bu Lesa muli shino inshiku, ¹³ ulo tukopembela uku pokelela isubilo lyesu ilya paalwa, ukwisa ukwakucindama ukwa kwa Lesa Mukulu elo Umupusushi Yesu Kristu. ¹⁴ Yesu ali ipele umwine ilambo pa mulandu wesu pakweba ati atulubule ku bubi bwesu bonse elo tube aba kaele epa kweba ati tube fye abantu bakwe abasakama ukucita ifintu ifya bune. ¹⁵ Ule kulanda pali ifi fintu, ule kukoselesha abantu uku lekuficita, elo ule kubabwelesha mu nshila pamo nga uuli ne nsambu shonse. Wilakuleka nangu umo ukuti akusuule.