¹ Au sa vosa dina e na mata i Karisito, au sa yali ni vosa lasu, sa vadinadina voki lia vi au na noqu lewa-e-loma e na Yalo Tabu, ² ni'u sa rarawa valevu, a sa yaluma tiko lia na lomaqu. ³ Ni ka'u sa daugadrevia me'u tawase tani vei Karisito, e na vukudra na wekaqu, o ira era sa wekaqu dina vayago: ⁴ era sa luvei Isireli; sa nodra voki lia na vabau me ra gone, kei nai ukuuku, kei na veiyalayalati, kei na soli vunau, kei nai valavala ni soro vua na Kalou, kei na vosa ni yalayala: ⁵ sa nodra ko ira na qase, a sa tubu mai vei ira na Karisito me vaka na yagona, o koya sa lewa na ka kece lia, na Kalou sa varokorokotaki ka tawa mudu. Emeni. ⁶ Ia sa yali ni vaka sa yaco na vosa ni Kalou. Ni ra sa yali ni Isireli dina ko ira kece sa mai vei ira na Isireli: ⁷ era yali voki lia ni luvena ko ira kece lia na kawa i Eparaama: ia Na kawa i Aisake lia ena vatokai me nomu kawa. ⁸ Sa kenai balebale koya, O ira na luvena vayago, era sa yali ni luve ni Kalou; ia na luve ni yalayala lia era sa vabau me kawa. ⁹ Ni sa vakakoya na vosa ni yalayala, E na gauna vakakoya ka'u na qai mai, ka na sucu vei Sera e dua na gonetagane. ¹⁰ A sa yali ni koya lowa lia; ia ko Repeka voki lia sa kunekune mai vua e dua, a tamada ko Aisake; ¹¹ ni rau sa bera ni sucu, se rau caka na ka vinaka se na ka ca, me tu dei kinia na ka sa lesia eliu ka digitakia na Kalou, sa yali lia e na vuku ni cakacaka, e na vukuna lia sa kacivia, ¹² sa tukuni vua na yalewa ko ya, O koya sa qase vei rau e na qaravi koya sa gone. ¹³ Sa vakinia na ka sa volai, Au sa vinakati Jekope, ia ka'u sa cati Iso. ¹⁴ A cava me da qai tukunia? Sa tu beka vua na Kalou nai valavala tawa dodonu? E yali sara. ¹⁵ Ni sa tukunia vei Mosese ko koya, Au na lomani koya ka'u sa lomana, ia ka'u na yalovinaka vua ka'u sa yalovinaka kinia. ¹⁶ Sa qai yali ni yaco e na vukuna sa gadrevia, se na vukuna sa cici, ia e na vukuna lia na Kalou sa yalovinaka mai. ¹⁷ Ni sa tukunia vei Fero nai Vola Tabu, E na vuku ni ka koya ka'u sa vaturi iko cake kinia, me'u vatakila vei iko na noqu kaukauwa, me tukuni voki lia na yacaqu ki vuravura taucoko. ¹⁸ O koya koya sa yalovinaka kinia ko koya vua sa yalona kinia, a sa vadomoqataki koya sa yalona kinia. ¹⁹ O na qai tukunia vei au, E na vuku ni cava sa ia tiko kinia na veibeitaki ko koya? ia ko cei sa voratia na nona lewa? ²⁰ Kakua ni vakakoya, o iko na tamata; o cei o iko mo veileti vata kei na Kalou? Ena tukunia beka na ka sa caka vei koya sa cakava, O sa cakavi au vaka koya e na vuku ni cava? ²¹ E yali beka ni veitaliatakia na tete ko koya sa dautuli kuro, me caka kinia e na dua lowa lia na buli tete, e dua na bilo me talei, ka dua voki me yali ni talei. ²² Ia ka vaevei ke sa vinakatia na Kalou, me varaitakia na nona cudru, me vatakila voki lia na nona kaukauwa, a sa vosotia vadede sara kinia na vei bilo ena cudruvi sa varau tu me rusa: ²³ me vatakila voki lia na kena levu ni nona vinaka ki na veibilo sa lomani, o koya sa varautakia e liu ko koya ki nai ukuuku, ²⁴ io vi ita lia, sa kacivi ita ko koya, sa yali lowa lia mai vei ira na Jiu, mai vei ira voki lia sa matanitu tani: ²⁵ me vaka voki lia na ka sa tukunia o koya enai vola i Osea, Au na vatokai ira sa yali ni noqu tamata eliu, me ra noqu tamata; Ko koya voki lia ka yali ni lomani eliu, me qai lomani: ²⁶ Ena yaco voki lia ena vanua sa kainaki kinia eliu vei ira, Sa yali ni noqu tamata koi ikodou; Era na qai vatokai kinia me ra luve ni Kalou bula. ²⁷ Sa kacivaki ira na Isireli ko Aisea voki lia, kevaka sa tautauvata na kedrai wiliwili na Isireli kei na nuku ni waitui, ia ena bula lia na kena vo: ²⁸ ni na vayacoria na nona vosa ko Jiova e vuravura, ka na vaotia ka valekalekatakia. ²⁹ Me vaka voki lia na ka sa tukunia eliu o Aisea, Kevaka ka yali ni dua na kawa sa vadainia vi ita o Jiova ni lewe levu, Eda sa vataki Sotoma, eda sa tautauvata voki lia kei Komora. ³⁰ A cava meda qai tukunia? O ira na veimatanitu tani, ko ira era sa yali ni muria na veivadonui, era sa yaco me ra vadonui, ni ra sa vadonui e na vabauta. ³¹ Ia ko ira lia na Isireli, o ira era sa muria na vunau me ra vadonui kinia, era sa yali ni yaco ki na vunau ko ya. ³² E na vuku ni cava? ni ra sa yali ni muria e na vabautia, e na cakacaka lia ni vunau: ni ra sa tarabe e na vatu e dauveivatarabetaki; ³³ me vaka na ka sa volai, Raicia au sa dainia mai Saioni na vatu e dauveivatarabetaki kei na vatu ni veivalomacataki: Ia ko koya yadua sa vabautia ena yali ni vamaduataki.