¹ Ia ka'u sa tataunaki Fipi yani vi ikodou, o koya na wekada, o koya sa dauqaravia nai soqosoqo lewe ni lotu mai Kenikiria: ² mo dou vacegui koya ena vuku ni Turaga, me vaka sa kilikili kei ira era sa lotu, ka mo dou vukei koya ena cakacaka kece lia dou na yaga kinia vua: ni sa dau vukei ira na lewe levu ko koya, kei au voki lia. ³ Me tukunia yani na noqu loloma vi rau ko Pirisila kei Akuila, koi rau sa cakacaka vata kei au e na veika i Karisito Jisu: ⁴ ka rau sa bolea na mate me'u bula kinia: kitou sa vavinavinaka kinia vi rau, kitou kei ira kece na visoqosoqo lewe ni lotu vi ira na vimatanitu tani: ⁵ Au loloma voki lia vi ira nai soqosoqo lewe ni lotu ena nodrau vale. Au sa loloma vi Epinito, na tamata ka'u sa daulomana, o koya nai sevu vi Karisito mai Esia. ⁶ Au sa loloma vi Meri, o koya sa daucakacaka valevu ena vukumudou. ⁷ Au sa loloma vi Adroniko kei Junia, na wekaqu, kitou a vesu vata kei rau, a rau sa rogo vi iratou nai apositolo, erau sa ni Karisito eliu, au sa muri koi au. ⁸ Au sa loloma vi Abilia, o koya ka'u sa daulomana ena vuku ni Turaga. ⁹ Au sa loloma vi Uripenu, o koya sa dauvukei kitou ena cakacaka i Karisito, kei Siteki, o koya ka'u sa daulomania. ¹⁰ Au sa loloma vi Apeli sa dauvinakati ena veika i Karisito. Au sa loloma vi ira na lewe ni vale i Arisitopulo. ¹¹ Au sa loloma vi Irotioni na wekaqu. Au sa loloma vi ira na lewe ni vale i Narikiso, era sa nona lia na Turaga. ¹² Au sa loloma vi Taraifina kei Taraifosa, erau daucakacaka ena veika ni Turaga. Au sa loloma vi Perisi sa daulomani, o koya sa daucakacaka valevu e na veika ni Turaga. ¹³ Au sa loloma vi Rufu o koya sa digitakia me nona na Turaga, kei na tinana o koya sa tinaqu voki lia. ¹⁴ Au sa loloma vi Asinikirito, kei Filekoni, kei Erima, kei Patiropa, kei Erimi, kei ira na viwekani sa tiko vata kei iratou. ¹⁵ Au sa loloma vi Filoloko, kei Julia, kei Niriu, kei na ganena, kei Olimipa, kei ira kece lia era sa lotu, era sa tiko vata kei iratou. ¹⁶ Dou caka na loloma vakai ikodou ena vireguci ena yalosavasava. Sa loloma yani vi ikodou na visoqosoqo lewe ni lotu kece lia ni Karisito. ¹⁷ a ka'u sa vamasuti ikodou, na viwekani, mo dou kilai ira era sa vatekivunia na visei ki na veika e dauvivatarabetaki, sa yali ni vaka nai vavuvuli dou sa vatavulici kinia; ia kakua ni viriti kei ira. ¹⁸ Ko ira era sa va koya, era sa yali ni qaravia na noda Turaga na Karisito, na ketedra lia; ia ena vosa vinaka ka kamikamica, era sa lawakitakia na lomadra era sa wele. ¹⁹ Ni sa kuruvaki ki na tamata kece lia na nomudou talairawarawa. Ko koya koya ka'u sa rekitaki ikodou kinia: ia sa yaloqu lia mo dou vuku ena ka vinaka, mo dou kakua voki lia ni cala ena ka ca. ²⁰ Ia na Kalou ni vivacegui ena butuki Setani vakusarawa e ruku ni yavamudou. Me tiko vi ikodou na loloma ni noda Turaga ko Jisu Karisito. Emeni. ²¹ Sa loloma yani vi ikodou ko Timoci na noqu i tokani, kei Lusiu, kei Jesoni, kei Sosipeta, ko iratou na wekaqu. ²² Koi au ko Teritiu, ka vola nai vola koya, au sa loloma yani vi ikodou ena Turaga. ²³ Sa loloma yani vi ikodou ko Keio, ko koya ka'u sa dautiko e nona vale, kei ira kece lia nai soqosoqo lewe ni lotu. Ko Erasito na dauniyau ni koro koya sa loloma yani vi ikodou, kei Kuaritu na wekada. ²⁴ Me tiko vi ikodou kece lia na loloma ni noda Turaga ko Jisu Karisito. Emeni. ²⁵ Ia vi koya sa kaukauwa me vataudeitaki ikodou me vaka na noqu i tukutuku vinaka, kei na kena vunautaki Jisu Karisito, me vaka ni sa qai vatakilai mai na ka vuni, sa vuni tu mai na gauna makawa sara, ²⁶ ia ka sa qai varaitakia mai, ka sa vatakilai ena nodra i vola na parofita, me vaka na vosa ni Kalou yali ni mudu, kei na vivanua kece lia me ra vabautia ka talairawarawa kinia: ²⁷ io, vua na Kalou sa vuku dua loa lia, me caka na varokoroko ena vuku i Jisu Karisito, ka yali ni mudu. Emeni.