¹ Ia ni sa oti na veika koya ka'u a raicia na agilose e le va eratou sa tu e na tutu i vuravura e va, ka tauria na cagi e va kei vuravura, me kakua ni liwa ki vuravura na cagi, se ki na wasawasa, se ki na dua na kau.

² Ia ka'u a raicia e dua tani voki na agilose sa qai mai na tu-i-cake, a sa tu vua na vatu ni drega nei koya na Kalou bula; a sa kaci e na domo levu ko koya vei iratou na agilose e le va, o iratou sa soli kinia me ratou vacacani vuravura kei na wasawasa, ³ ka tukunia, Tei kakua mada ni vakacacani vuravura, se na wasawasa, se na kau, ka malua me keitou vola mada na yadredra na tamata ni noda Kalou. ⁴ Au a rogocia na kedrai wiliwili era sa volai: sa lewe dua na drau ka vasagavulu ka va voki lia na udolu, sa volai vi ira kece lia na nodra viyavusa na luve i Isireli. ⁵ Vi ira na yavusa i Juta sa volai e lewe tinikarua na udolu. Vi ira na yavusa i Rupeni sa volai e lewe tinikarua na udolu. Vi ira na yavusa i Kata sa volai e lewe tinikarua na udolu. ⁶ Vi ira na yavusa i Aseri sa volai e lewe tinikarua na udolu. Vi ira na yavusa i Nafitalai sa volai e lewe tinikarua na udolu. Vi ira na yavusa i Manasa sa volai e lewe tinikarua na udolu. ⁷ Vi ira na yavusa i Simioni sa volai e lewe tinikarua na udolu. Vi ira na yavusa i Livai sa volai e lewe tinikarua na udolu. Vi ira na yavusa i Isaka sa volai e lewe tinikarua na udolu. ⁸ Vi ira na yavusa i Sepuloni sa volai e lewe tinikarua na udolu. Vi ira na yavusa i Josefa sa volai e lewe tinikarua na udolu. Vi ira na yavusa i Penijamini sa volai e lewe tinikarua na udolu. ⁹ Sa oti koya ka'u sa varaicia, ka raicia, sa dua nai soqosoqo levu sara lia, e yali e dua na tamata e wilikia rawa, mai na vivanua kece, ki na vimataqali, ki na vimatanitu, ki na duivosavosa, era sa tu e na mata ni tikotiko-vaturaga, ki na mata ni Lami, era vaisulu e nai sulu vulavula, ka tauria nai viu e na ligadra; ¹⁰ a ra sa kaci e na domo levu, ka tukunia, A vu ni bula na noda Kalou, o koya sa tiko e nai tikotiko-vaturaga, vua na Lami voki lia. ¹¹ O ira kece lia na agilose era sa duri tu ka vavolivolitia nai tikotiko-vaturaga, ki ira na matua ki na ka bula e lewe va, ka cuva vatoboicu e na mata ni tikotiko-vaturaga, ka varokoroko vua na Kalou, ¹² ka tukunia, Emeni: Na vamolimoli, ki nai ukuuku, ki na vuku, ki na vavinavinaka, ki na varokoroko, ki na kaukauwa, ki na qaqa, me nona lia na noda Kalou ka yali ni mudu. Emeni. ¹³ Sa qai tukunia e dua na matua, ka tarogi au, O cei beka ko ira koya sa vaisulu e nai sulu vulavula? ka ra qai beka maivei? ¹⁴ Au sa qai tukunia vua, O iko, saka, ko sa kila. A sa tukunia vi au ko koya, O ira koya era sa qai mai na vivararawataki levu, ia era sa sava nodra i sulu, ka vavulavulatakia e na dra ni Lami. ¹⁵ O koya era sa tiko kinia e na mata ni tikotiko ni Kalou, a ra sa qaravi koya e na siga ki na bogi e nona vale-ni-lotu; ia ena tiko vata ki ira ko koya sa tiko e nai tikotiko-vaturaga. ¹⁶ Era na yali voki ni viakana, se viasomi voki; ena yali ni kati ira na siga, se dua tani na katakata. ¹⁷ Ni na vakani ira na Lami sa tiko e na loma ni tikotiko-vaturaga, ka na tuberi ira ki nai vurevure ni wai bula: ia ena tavoya kece lia na Kalou na wai ni mata mai na matadra.