¹ Sa oti koya kau a qai raicia, sa dola e dua na darava mai lomalagi: ia na vosa taumada kau a rogocia sa vaka sa vosa vei au na davui; ka tukunia, qai cake mai ke, au na vatakila vei iko na veika ena yaco ena gauna mai muri. ² Sa qai curumi au vasauri na yalo tabu ka raicia, sa caka nai tikotiko vaturaga mai lomalagi, a sa dua sa tiko kinia. ³ Ia ko koya sa tiko kinia sa vaka nai rairai me vaka vokilia na vatu jasipa kei na satiusa; A sa dua na drodrolagi sa vavolivolita nai tikotiko vaturaga, sa rairai me vaka na emeralita. ⁴ A sa ruasagavulu ka va nai tikotiko sa vavolivolitia na i tikotiko vaturaga; ia kau a raicia e lewe ruasagavulu ka va na matua sa tiko enai tikotiko; era sa vaisulu vulavula; a sa vaisala voki lia na uludra ena i sala koula. ⁵ A sa qai mai nai tikotiko vaturaga na livaliva kei na kurukuru kei na vosa; a sa vitu na cina ni buka sa caudre tiko ena mata ni tikotiko vaturaga, o ira koya na yalo ni Kalou e ratou lewe vitu. ⁶ A sa tu voki lia ena mata ni tikotiko vaturaga e dua na ka sa vaka na wasa iloilo, sa makare sara me vaka na karisitala. A sa tiko e va na ka bula e loma ni tikotiko vaturaga, ka vavolivolitia a sa vamatana kece lia na yagona na matadra kei na dakudra. ⁷ Ia sa vaka na laioni nai matai ni ka bula, a sa vaka voki lia na luve ni pulumokau nai karua, a sa mata vatamata nai katolu, a sa vaka na ikeli vatabana nai kava. ⁸ O iratou koya na ka bula eratou sa lewe va eratou sa tauyaono na tabadratou; a sa robotia na lomadratou na matadra; ia eratou sa yali ni bau cegu e na siga se na bogi, era tukunia tiko lia, E dodonu, e dodonu, e dodonu, na Turaga na Kalou Kaukauwa, o koya ka bula eliu, ka sa bula edaidai, ena bula voki lia emuri. ⁹ Ia ni ratou sa varokoroko ko iratou na ka bula ko ya vi koya sa tiko e nai tikotiko-vaturaga, o koya sa bula yali ni mudu, ka ratou sa dokai koya, ka vavinavinaka vua, ¹⁰ sa qai cuva sobu ko ira na qase e lewe ruasagavulu ka va e na mata i koya sa tiko e nai tikotiko-vaturaga, ka varokoroko vi koya sa bula lia ka yali ni mudu, ka dainia na nodra i sala e na mata ni tikotiko-vaturaga, ka tukunia, ¹¹ Ikonu na nitou Turaga ki na nitou Kalou, sa dodonu me caka vi ikonu na varokoroko ki na vidokadokai, ki na kaukauwa: ni sai ikonu ka bulia na ka kece lia, era sa buli lia ka tu dei voki lia e na nomuni lewa.