¹ Mo volavola voki lia vua nai talatala ni soqosoqo lewe ni lotu mai Efeso; Sa tukunia na veika koya ko koya sa tauria na kalokalo e vitu e na ligana i matau, o koya sa qai voli e na maliwa ni tutu-ni-cina koula e vitu: ² Au sa kila na nomu i valavala, ki na nomu oca ki na nomu dauvosotia, ni ko sa yali voki ni vosoti ira era sa ca; o sa vatovolei ira voki lia era sa tukunia era sai apositolo, a ra sa yali, o sa kilai ira ni ra sa daulasu lia: ³ ia ko sa lomavinaka lia, ka vosotia tiko, ka oca e na vuku ni yacaqu, ka yali ni guca. ⁴ Ia ka so lia na ka ko sa ca kinia, e na vuku ni ko sa dainia na nomu loloma ka tu vi iko eliu. ⁵ Mo nanumia lia na ka ko sa lutu tani mai kinia; ia mo vivutunitakia, ka caka na cakacaka taumada; ia kevaka sa yali, ka'u na qai vasauri mai vi iko, ka yadia tani na nomu i tutu-ni-cina mai na kena tikina, kevaka ko sa yali ni vivutuni. ⁶ Ia na ka voki lia koya sa tu vi iko, ni ko sa catia na nodra i valavala nai tokani i Nikola, koya ka'u sa catia voki lia koi au. ⁷ O koya sa vadaligana, me mani rogocia sara na ka sa tukunia na Yalo Tabu vi ira na visoqosoqo lewe ni lotu: Vi koya sa gumatua ka'u na solia me kania na kau ni bula, ko ya sa tu e loma ni Parataisi ni Kalou. ⁸ MO volavola voki lia vua nai talatala ni soqosoqo lewe ni lotu mai Simurina: Sa tukunia na veika koya ko koya sa liu sara ka muri sara, o koya ka mate, a sa qai bula voki: ⁹ A sa kila na nomu cakacaka, ki na nomu dauvararawataki, ki na nomu dravudravua (ia ko sa vutuniyau lia), ki na nodra vosa vacaca era tukunia era sa Jiu, ka ra sa yali, era sai vavakoso voki lia i Setani. ¹⁰ Kakua ni rerevakia e dua na ka ko na vosotia: raicia, na tevoro ena daini ikodou eso ki na vale ni vivesu, mo dou vatovolei kinia; ia dou na vararawataki ka bogi tini: dou gumatua mo dou yacovia na mate, au na qai solia vi ikodou nai sala ni bula. ¹¹ O koya sa vadaligana, me mani rogocia sara na ka sa tukunia na Yalo Tabu vi ira na visoqosoqo lewe ni lotu. O koya sa gumatua sara ena yali ni ca e nai karua ni mate. ¹² MO volavola voki lia vua nai talatala ni soqosoqo lewe ni lotu mai Perikamo: Sa tukunia na ka koya ko koya sa tauria nai seleiwau batirua: ¹³ Au sa kila na nomu cakacaka, ki na yasana ko sa tiko kinia, sa tiko voki lia kinia nai tikotiko i Setani: ia ko sa tauria matua na yacaqu, ia ko sa yali ni cakitakia na noqu lotu e na siga sa vatusai au dina kinia ko Anitipasa, o koya sa vamatei e na ikodou maliwa, a yasana sa tiko kinia ko Setani. ¹⁴ Ia ka so lia na ka ko sa ca kinia, e na vuku ni sa tiko vi iko ko ira era sa vabautia nai vavuvuli i Pelami, o koya ka vavulici Pelaki me dainia na vivacalai e na matadra na luve i Isireli, me ra kania na ka sa vacabori ki na vimatakau, me ra dauyalewa voki lia. ¹⁵ Sa tiko voki lia vi iko ko ira sa vatavulicia tiko na nodra i vavuvuli nai tokani i Nikola, koya na ka ka'u sa catia. ¹⁶ Mo vivutuni mada; kevaka e yali, au na qal vatotolo sara yani vi iko, ka vivala ki ira e nai seleiwau ni gusuqu. ¹⁷ O koya sa vadaligana, me mani rogocia sara na ka sa tukunia na Yalo Tabu vi ira na visoqosoqo lewe ni lotu: Au na solia vi koya sa gumatua, me kania na mana vuni, au na solia voki lia vua na vatu vulavula, a vatu lia ko ya ena volai kinia na yaca vou e yali e dua me kila, o koya lia sa tauria sara. ¹⁸ Mo volavola voki lia vua nai talatala ni soqosoqo lewe ni lotu mai Caetaira: Sa tukunia na veika koya na Luve ni Kalou, o koya sa vaka na yameyame ni buka na matana, ki na yavana e vaka na parasa makumakualiliva: ¹⁹ Au sa kila voki lia na nomu cakacaka, ki na dauloloma, ki na dauviqaravi, ki na vadinatia, ki na nomu dauvosotia, ki na nomu daucakacaka; ia koya emuri sa uasivia ko ya sa liu. ²⁰ Ia sa vica lia na ka ko sa cala kinia, ni ko sa vosotia na yalewa ko ya ko Jesepeli, o koya sa vatokai koya voki lia me parofita, me vavulici ira ka daini ira na noqu tamata me ra dauyalewa, ka kania na ka sa vacabori ki na vimatakau. ²¹ Ia ka'u a solia vua na gauna me vivutunitakia kinia na nona dautagane; a sa yali ni via vivutuni. ²² Raicia, ka'u na daini koya ki nai mocemoce, ki ira era sa dauyalewa vata kaya ki na rarawa levu, kevaka era sa yali ni vivutunitakia na nodra i valavala. ²³ Ia ka'u na vamatei ira na luvena e na mate; ia ena kila kinia na visoqosoqo lewe ni lotu kece lia ni'u sa dikevia na ivi ki uto ni tamata; ia ka'u na solia voki lia vi ikodou yadua me vaka na nomudou i valavala. ²⁴ Ia ka'u sa tukunia kivi ikodou, ki ira sa vo mai Caetaira, ko ira kece voki lia era sa yali ni vabautia nai vavuvuli koya, ko ira era sa yali ni kila na ka titobu ki Setani, me vaka voki lia na ka era sa vosatakia; au na yali ni taucia vi ikodou na ka tani e bibi. ²⁵ Ia na ka sa tu vi ikodou, dou tauria matua ka malua ka'u na qai voki yani. ²⁶ Ia ko koya sa gumatua sara, ka vabautia na noqu cakacaka me yaco mada nai vataotioti, au na solia vua me lewa na vimatanitu: ²⁷ ia ena lewai ira ko koya e nai titoko kaukamea: ena vorolaki ira me ra matailalai me vaka na vibilo ni dautuli bilo: io, me vaka na ka ka'u sa rawatia mai vi Tamaqu. ²⁸ Ia ka'u na solia voki lia vua na kalokalo i vola siga. ²⁹ O koya sa vadaligana, me mani rogocia sara na ka sa tukunia na Yalo Tabu kivi ira na visoqosoqo lewe ni lotu.