¹ Ia sa tu e na vinukunuku mai matasawa ko koya, ia ka'u a raicia e dua na manumanu sa qai cake mai na wasawasa, e vitu na uluna ka tini na nonai leu, a sa toka e na nonai leu nai sala-vaturaga e tini, a sa tu lia e na uluna na yaca ni dauvosavacacataki. ² Ia na manumanu ka'u a raicia sa vaka na lepate, a yavana sa vaka na yava ni pera, a gusuna e vaka na gusu ni laioni: a sa solia vua na nona kaukauwa dina na gata levu, kei na nonai tikotiko-vaturaga, me mai turaga levu kinia. ³ Ia ka'u a raicia e dua na uluna e vaka sa vuetaki me mate kinia: a sa bula voki mai na nona vue ka voleka ni mate kinia: a ra sa kurabui kece lia na kai vuravura e na vuku ni manumanu. ⁴ A ra sa varokoroko vua na gata levu, o koya sa solia na kaukauwa vua na manumanu: a ra sa varokoroko vua na manumanu, ka tukunia, O cei sa vaka na manumanu koya? o cei sa rawatia me rau vivala kaya? ⁵ A sa soli vua na gusu me vosatakia na ka levu ki na vosa vacaca sara; a sa soli vua me turaga ka vula vasagavulu ka rua. ⁶ A sa dalaga me vosa ca ki na Kalou, me vosavacacatakia na yacana, ki na nona vale, ki ira era sa tiko mai lomalagi. ⁷ A sa soli vua me vivala ki ira na tamata yalosavasava, ka me rawai ira: a sa soli vua me turaga vi ira na vimataqali kece, ki na vimatanitu ki na duivosavosa, ki na vivanua. ⁸ Ia ena varokoroko vua ko ira kece lia era sa tiko e vuravura, ko ira sa yali ni volai na yacadra e nai vola ni bula ni Lami sa vamatei mai nai vatekivu ki vuravura. ⁹ Kevaka e dua sa vadaligana, me mani rogocia sara. ¹⁰ O koya sa dauia na vivabobulataki ena vabobulataki; o koya sa ia na vivamatei e nai seleiwau ena mate voki lia e nai seleiwau. Koya na nodra vosotia ki na nodra vabautia na tamata yalosavasava. ¹¹ Ia ka'u a raicia e dua tani voki na manumanu sa qai cake mai vuravura; ia sa rua na nonai leu me vaka na luve ni sipi, a sa vosa me vaka na gata levu. ¹² A sa tu vua na kaukauwa kece lia ni manumanu sa liu vua, ka vasaurarataki vuravura kinia ki ira sa tiko kinia me ra varokoroko vua na manumanu sa liu, o koya ka bula e na nona vue ka voleka ni mate kinia. ¹³ Ia sa caka na ka levu e vivakidacalataki ko koya, a sa yadia mai lomalagi ki vuravura na bukawaqa e na matadra na tamata, ¹⁴ a sa temaki ira era sa tiko e vuravura e na vuku ni cakacaka mana sa caka ko koya e na mata ni manumanu; a sa tukunia vi ira era sa tiko e vuravura, me ra caka na matakau me nona na manumanu sa lautia e nai seleiwau, ka sa bula tiko lia. ¹⁵ A sa rawatia ko koya koya me solia na bula ki na matakau ni manumanu, me vosa rawa kinia na matakau ni manumanu, ka vavunia voki lia na nodra mate ko ira era sa yali ni via varokoroko ki na matakau ni manumanu. ¹⁶ A sa vasaurarataki ira kece lia, na tamata lalai ki na turaga, o ira sa vutuniyau ki ira sa dravudravua, ai taukei ki na bobula, me volai e dua nai vatakilakila e na ligadra i matau, se na yadredra: ¹⁷ ka me kakua ni vivoli e dua, o koya lia sa tu vua nai vola, se na yaca ni manumanu, se nai wiliwili ni yacana. ¹⁸ Koya lia na vuku. O koya sa yalomatua me mani wilikia nai wiliwili ni manumanu; ni sai wiliwili ni tamata; ka sa kenai wiliwili e ono na drau ka onosagavulu ka ono.