¹ Koi au ko Paula, sa vesu tu ena vuku i Karisito Jisu, kei Timoci na wekada, vi Filimoni o koya kirau sa daulomania, kei na nirau i tokani, ² vi Afia voki lia na wekada yalewa, vi Akipo voki lia na nirau i tokani enai valu koya, vi ira voki lia nai soqosoqo lewe ni lotu era sa tiko ena nomu vale: ³ Me nomudou na loloma, kei na vacegu, mai vua na Kalou ko Tamada, kei na Turaga ko Jisu Karisito. ⁴ Au sa vavinavinakatakia vua na noqu Kalou, ni'u sa cavuti iko ena visiga ena noqu masu; ⁵ ni'u sa rogocia na nomu loloma kei na nomu vabautia vua na Turaga ko Jisu, kivei ira kece voki lia era sa lotu; ⁶ me mai kaukauwa na vabautia sa tu vi iko, me vatakilai kinia na ka kece lia e vinaka sa tu vi ikodou, ena vuku i Karisito Jisu. ⁷ Ni sa levu na nitou reki kei na vacegu ena vuku ni nomu loloma, na wekaqu, ni ko sa vaceguya na lomadra era sa lotu. ⁸ E dina lia sa rawa me'u doudou valevu ena vuku i Karisito me'u varotia vi iko na ka e kilikili; ⁹ ia ena vuku ni nodaru vilomani lia ka'u sa vinakatia cake me'u vamamasu lia, ni'u sa vakoya koi au ko Paula na qase, ia ka'u sa vesu voki lia ni kua ena vuku i Jisu Karisito. ¹⁰ Au sa vamasuti iko ena vuku ni luvequ ko Onesimo, ko koya ka'u sa vatuburia ni'u sa vesu tu: ¹¹ (ko koya sa yali ni yaga eliu vi iko, ia sa qai yaga vi iko, vi au voki lia:) ¹² au sa qai tala voki vi iko: ko koya koya mo vacegui koya, ni sa vaka na lewequ dina sara: ¹³ au sa via tauria lia me tiko vi au, me kemui sosomi me sa qaravi au ni'u sa vesu tu ena vuku ni tukutuku vinaka: ¹⁴ ia ni'u sa yali ni kila na yalomu, au sa yali voki lia ni via caka e dua na ka: me kakua ni vaka na ka ni vivasaurarataki na nomu loloma, me sa lomamu sara lia kinia. ¹⁵ Ni sai koya beka lia koya sa qai tani valekaleka kinia, mo tauri koya voki ka yali ni mudu; ¹⁶ me kakua ni vaka na tamata loa lia, me sa uasivi cake ena tamata loa lia, me wekamu lomani, e valevu vi au, ia ka vaevei vi iko, ena ka vavuravura, kei na ka ni Turaga voki lia? ¹⁷ Ia koya, kevaka ko sa vakasami au ni'u sai tokani, mo vacegui koya me vataki au. ¹⁸ Kevaka sa vacacani iko ko koya ena dua na ka, se sa dua na ka sa dinau kinia vi iko, mo volai au voki lia kinia; ¹⁹ koi au ko Paula, au sa vola ena ligaqu dina, au na saumia; ia ka'u sa yali ni tukunia vi iko ni sa dodonu lia mo noqu voki lia ko iko. ²⁰ Io, noqu i tokani, me'u rekitaki iko mada e na Turaga: vaceguya na lomaqu ena vuku i Karisito. ²¹ Ni ka'u sa vadinatia ni ko na talairawarawa kinia, ka'u sa vola kinia vi iko, ni'u sa kila ko na caka na ka ka'u sa tukunia, ka ko na uasivi cake kinia. ²² Mo varautakia voki lia e dua na vale me'u moce kinia: ni'u sa dinatia ka'u na soli vi ikodou ena vuku ni nomudou masu. ²³ Eratou sa loloma yani vi ikonu ko Epafira, kirau sa vesu vata kaya ena vuku i Karisito Jisu; ²⁴ ki iratou voki lia na noqu i tokani, ko Marika, ko Arisitako, ko Timasa, ko Luke. ²⁵ Me tiko ena yalomudou na loloma ni noda Turaga ko Jisu Karisito. Emeni.