¹ Ia ni ra sa toro voleka ki Jerusalemi, kei Pecifaki kei Pecani, ena ulunivanua ni violive, sa tala ko koya e lewe rua na nona tisaipeli, ² a sa tukunia vi rau, Drau qai ki na koro lailai sa donui ikodrau: ia ni drau sa curu kinia, drau na raicia sara e dua na luve ni asa sa noka tu, sa yali ni vodokia e dua na tamata; drau serekia, ka yadia mai. ³ Ia kevaka sa dua e tukunia vi ikodrau, Drau sa caka koya ena vuku ni cava? drau tukunia sa yaga vua na Turaga; ena qai talai koya sara mai vanua koya. ⁴ A rau sa qai, ka raicia na luve ni asa, sa noka tu ena mata ni katuba ena tikinia sa sota vata kinia e rua na sala; a rau sa serekia. ⁵ Ia ka so vi ira era sa tu kinia, era sa tukunia vi rau, A cava drau sa serekia kinia na luve ni asa? ⁶ A rau sa tukunia vi ira me vaka ka varotia ko Jisu: a ra sa qai daini rau me qai. ⁷ A rau sa yadia na luve ni asa vei Jisu, ka tevukia kinia na nodraui sulu, a sa vodokia ko koya, ⁸ A ra sa lewe levu era sa tevukia na nodrai sulu ena gaunisala: ka so voki era musukia eso na taba ni kau, ka dainia ena gaunisala. ⁹ Ia ko ira sa liu, ki ira sa muri, era sa kaci, ka tukunia, Osana! sa kalougata ko koya sa qai mai ena yaca ni Turaga! ¹⁰ sa kalougata na matanitu ni Tevita na noda matua, ko koya sa yaco mai! Osana ki cake sara! ¹¹ A sa curu ko koya ki Jerusalemi, ki na valenisoro voki lia: ia ni sa varaicia voli na ka kece lia, a sa qai raiyavi mai, sa qai yani ko koya ki Pecani, kei ira na lewe tinikarua. ¹² Ia ena savulaci caca, ni ra sa qai mai Pecani, sa viakana ko koya: ¹³ ia ni sa raicia vayawa e dua na vu ni lolo sa vadrauna, sa qai, de raicia kinia e dua na ka: ia ni sa yaco kinia, sa yali ni raicia e dua na ka, a drauna loa lia; ni sa yali ni yaco na vula i lolo. ¹⁴ A sa vosa ko Jisu, ka tukunia kinia, Me kakua na vuamu e kani emuri ka yali ni mudu. A ra sa rogocia na nona tisaipeli. ¹⁵ A ra sa yaco ki Jerusalemi: a sa curu ki na valenisoro ko Jisu, ka vatekivu me tovoci ira tani kinia era sa vivoli ena valenisoro; sa vukicia voki lia na nodra tepeli era sa visau i lavo, ki na nodra vitikotiko era volitaki ruve kinia; ¹⁶ a sa yali ni dainia e dua me cola e dua na ka e loma ni valenisoro. ¹⁷ A sa vavulici ira, ka tukunia, Sa yali ni volai, A noqu vale ena vatokai me nodra vale ni masu, na vimatanitu kece lia? ia dou sa caka me nodra qara na daubutako. ¹⁸ A ra sa rogocia ko ira na vunivola kei ira na bete levu, a ra sa segatia me ra vamatei koya: ni ra sa rerevakia, ni ra sa kurabui ko ira kece lia na lewe levu ena nonai vavuvuli. ¹⁹ Ia ena vi raiyavi, sa qai tani ena koro ko koya. ²⁰ Ia ena savulaci, ni ra sa qai voli, era sa raicia sa malai sara mai na wakana na vu ni lolo. ²¹ Ia ni sa nanumia ko Pita, sa tukunia vi koya, Vavuvuli, raicia, na lolo ko sa lewa me ca sa malai sara. ²² A sa tukunia vi ira ko Jisu, Dou va dinatia na Kalou. ²³ Niu sa tukunia vaidina vi ikodou, Kevaka sa dua e tukunia ki na ulunivanua koya, Mo cavu tani, ka dai ki na wasaliwa, ia ka yali ni vatitiqa na yalona, a sa vadinatia lia ni na yaco na ka sa tukunia; ena rawatia na ka kece lia sa tukunia ko koya. ²⁴ Ko koya koya kau sa tukunia kinia vi ikodou, A ka kece lia dou sa kerea, ni dou sa masu, dou vadinatia ni dou sa rawatia, ena qai nomudou lia. ²⁵ Ia ni dou sa tu me masu, kakua ni cudruvi koya sa cala vi ikodou; me kakua voki lia ni cudruvi ikodou ena vuku ni nomudoui valavala ca na Tamamudou sa tiko mai lomalagi. ²⁶ Ia kevaka dou sa cudruvia lia, ena yali voki ni bokocia na nomudoui valavala ca na Tamamudou sa tiko mai lomalagi. ²⁷ A ra sa qai voki mai ki Jerusalemi: ia ni sa qai voli ko koya ena valenisoro, sa qai mai vua ko ira na bete levu, kei ira na vunivola, kei ira na qase, ²⁸ a ra sa tukunia vua, Ko sa lesi mai vi mo caka na veika koya? ia ko cei sa solia vi iko nai lesilesi koya mo caka kinia na veika koya? ²⁹ A sa vosa ko Jisu, ka tukunia vi ira, Au na tarogi ikodou voki lia ena dua na ka, ia dou tukunia vi au; au na qai tukunia voki vi ikodou se kau sa lesi mai vi meu caka na veika koya: ³⁰ A papitaiso i Joni, sa ka mai lomalagi, se ka mai na tamata? tukunia mai vi au ³¹ A ra sa vivosakitakia vakai ira, ka tukunia, Kevaka eda na tukunia, Sa vu mai lomalagi; ena qai tukunia ko koya, Ia dou a yali ni vadinati koya ena vuku ni cava? ³² Ia kevaka eda na tukunia, sa vu mai na tamata; era sa rerevaki ira na tamata; ni ra sa vasama kece lia sa parofita dina ko Joni. ³³ A ra sa vosa, ka tukunia vi Jisu, Kitou sa yali ni kila. Sa qai vosa ko Jisu, ka tukunia vi ira, Au na yali voki lia ni tukunia vi ikodou se kau sa lesi mai vi meu caka na veika koya.