¹ Sa dina lia sa tu ki na viyalayalati ka taumada eso nai varo ni lotu, kei na vale-ni-soro vavuravura. ² Ni sa caka lia na vale tabu; o koya sa taumada, sa tu kinia nai tutu-ni-cina, kei na tepeli, kei na madrai dauraici; a yacana koya na tikinia tabu. ³ Ia sa sivi nai karua ni lati, sa qai tu na vale tabu sa vatokai na loqi tabu sara; ⁴ sa tu kinia na miqa koula, kei na kato ni viyalayalati sa botani na yasana kece ena koula, sa tu kinia na bilo koula sa tawa e na mana, ki nai titoko voki lia i Eroni o koya sa kubu, ki na vatu raraba ni viyalayalati; ⁵ sa tu lia e cake koi rau na jerupi vaiukuuku sa varurugia nai cabocabo-ni-bulubulu; ia ka sa dredre ni kua me tukunia yadua na veika koya. ⁶ Ia ni sa varautakia oti na veika koya, sa curu ko ira na bete ena visiga ki nai matai ni vale tabu, ka ia kinia na lotu: ⁷ ia sa curu ki na kenai karua na bete levu dua loa lia vadua lia ena viyabaki, ka yadia na dra, a sa vacaboria ena vukuna, ena vuku voki lia ni nodra vacala ka na tamata: ⁸ a sa vatakila na Yalo Tabu na ka koya, ni sa yali ni varairaitakia mai na sala ki na loqi tabu sara, ena gauna sa tu lia kinia na vale tabu ka taumada. ⁹ A kenai vatakarakara loa lia koya, ka yacovia na gauna koya, sa vacabori kinia nai madrali ki nai soro, o koya sa yali ni vasavasavatakia rawa na nona lewa-eloma ko koya sa mai lotu; ¹⁰ (ena kakana ki na ka-ni-somi, ki na vuivui valevu) ki na vivaro vavuravura, sa lesi me yaco mada na gauna ni vivadodonutaki. ¹¹ Ia sa qai mai na Karisito, a sa bete levu ena ka vinaka ena muri mai, ena vale tabu levu ka uasivi cake na kena vinaka, e muri ni tara ena liga, ni sa yali ni caka vakinia; ¹² e yali voki lia ena dra ni me kei na luve ni bulumokau, ena nona dra lia sa curu vadua ki na loqi tabu sara, ni sa rawatia me solia na bula sa yali ni mudu. ¹³ a kevaka sa yaga na dra ni bulumakau kei na me, kei na dravusa ni bulumakau yalewa ni sa kureitakia vi ira sa dukadukali, me savasava kinia na yagodra: ¹⁴ ena vabekai evei na dra ni Karisito, o koya ka vacaboria koya vua na Kalou ena vuku ni Yalo Tabu yali ni mudu ia ka yali vua na ca, ena yali beka ni rawarawa sara me vui laivi kinia na nomudou lewa-eloma mai na cakacaka sa ka ni mate, mo dou qaravia na Kalou bula? ¹⁵ O koya koya sa yaco kinia ko koya me dautataro ena viyalayalati vou, mera rawatia kinia ko ira ka kacivi nai votavota yali ni mudu ka yalatakia, ena vuku ni nona mate, sai soro ni valavala ca ka caka oti ena gauna ni viyalayalati taumada. ¹⁶ Ia kevaka sa dua na viyalayalati, sa yaga me mate o koya sa ia kinia na viyalayalati: ¹⁷ ni sa mate sa vataudeitakia kinia na viyalayalati; ia ka sa yali ni yaga valailai ni sa bula tiko ko koya sa ia na viyalayalati. ¹⁸ Ko koya koya sa yali kinia ni vatabui loa na viyalayalati sa taumada, sa caka lia ena dra: ¹⁹ io, ni sa cavutia oti ko Mosese nai vavuvuli kece lia ni vunau vi ira kece liga na tamata, sa qai yadia ko koya na kedra dra na luve ni pulumokau kei na me, ki na wai, ki na vuti ni sipi sa vadamudamutakia, kei na isopa, ka kureitakia ki nai vola, kivei ira kece voki lia na tamata, ²⁰ ka tukunia, Koya na dra ni viyalayalati sa caka vi ikodou na Kalou. ²¹ Sa kureitakia vaka voki lia kinia na dra ki na vale tabu, kei na bilo kece lia ni lotu. ²² Ia ka vica na ka sa yali ni vasavasavatakia ena dra me vaka na vunau; ia kevaka sa yali ni vadavei na dra, sa yali ni bokoci nai valavala ca. ²³ Ia sa dodonu kinia me vasavasavatakia nai vatakarakara ni veika mai lomalagi e na veika koya; ia na veika dina sa valomalagi sa vasavasavataki e nai soro e uasivi cake vi ira. ²⁴ Ni sa yali ni curu na Karisito ki na loqi tabu sa caka e na liga, koya sai vatakarakara lia ni ka dina; sa curu ki na lomalagi dina lia, me rairai ni kua e na mata ni Kalou e na vukuda; ²⁵ sa yali voki lia ni vacabori koya valevu, me vaka sa curu na bete levu ki na loqi tabu ena viyabaki, ka yadia na dra ni ka tani; ²⁶ ia ke sa vakinia ke sa dodonu me mate valevu mai nai vatekivu ki vuravura: sa qai varairaitakia vadua ko koya e nai vataotioti ni vigauna sa loku me yadia tani nai valavala ca ni sa vacabori koya. ²⁷ Ia me vaka sa lesi me mate vadua ko ira na tamata, ka me qai muri na siga ni lewa: ²⁸ sa vacabori vadua vavoki lia kinia na Karisito me cudruvi ena vuku ni valavala ca ni lewe levu; ka na rairai mai varua ko koya kivi ira sa waraki koya me ra bula, ia ena yali lia mei soro.