¹ Ia na bete levu yadua sa digitakia mai vi ira na tamata, sa lesi vua na Kalou ena vukudra na tamata, me vacaboi madrali vata ki nai soro ena vuku ni valavala ca: ² sa rawarawa vua me lomani ira era sa sesewa, ka cala; ni sa tiko voki lia vi koya na malumalumu. ³ Ia ena vuku ni ka koya, me vaka e na vukudra na tamata sa vaka voki lia kinia ena vukuna, sa dodonu me vacaboi soro ko koya ena vuku ni valavala ca. ⁴ A sa yali e dua sa tauria vai koya na cakacaka varokoroko koya, o koya lia sa lesi koya na Kalou, me vataki Eroni. ⁵ Sa va voki lia kinia na Karisito sa yali ni dokai koya me via bete levu vataki koya; ena vukuna lia sa tukunia vua, "O iko na Luvequ; ni kua au yaco meu Tamamu." ⁶ Me vaka voki lia na nona vosa e na tikinia tani, "A bete yali ni mudu ko iko me vataki Melikiseteki." ⁷ O koya koya ena visiga ni nona tiko vatamata, ni sa caboria oti na kerekere vata ki na masumasu vata ki na tagi vararawa, ni sa vawai na matana, vua na Kalou, sa rawatia me vabulai koya mai na mate, a sa rogoci lia ena ka sa rerevakia ko koya; ⁸ ia sa dina lia sa Luvena ko koya, a sa vatavulici lia enai valavala ni talairawarawa, ni sa vosotia tiko na ka rarawa; ⁹ ia ni sa varautakia oti, sa yaco me vu ni bula yali ni mudu vi ira kece lia sa talairawarawa vua; ¹⁰ sa kacivia na Kalou me bete levu me vaka nai valavala i Melikiseteki. ¹¹ E levu na ka sa vo me kitou tukuni koya kinia, ia ka sa dredre lia na kenai balebale, ni sa yali vi ikodou na daliga rogo. ¹² Ni sa dodonu mo dou rawatia makawa mo dou i vavuvuli, ia ka sa qai yaga mo dou vatavulicia voki se cava na vu ni vavuvuli ni Kalou; sa yaga voki lia vi ikodou na wai-ni-sucu, ka yali na kakana dina. ¹³ Ni sa yali ni kila vinaka nai vavuvuli ni vivadonui, ko koya sa somicia wale lia na wai-ni-sucu; ni sa gone lailai lia. ¹⁴ A sa yaga vi ira sa matua na kakana dina, o ira era sa varautakia na yalodra e nai valavala, me ra valewa rawa na ka se vinaka se ca.