¹ Ia na vabautia sa vaka ni sa vayacoria na veika sa vanuinuitakia, e vaka ni sa varaitaki na veika sa yali ni virai. ² Ni sa ka koya sa rogo vinaka kinia eliu ko ira na qase. ³ Na vabautia eda sa kila kinia ni sa ia na vibuli ena Vosa ni Kalou, ia sa yali ni caka na veika sa rairai mai ena veika sa virai tiko. ⁴ Ni sa vabautia sa vacaboria ko Epeli nai soro sa vinaka vua na Kalou ka ca na nei Keni, ka sa rawatia kinia nai vadinadina ni sa yalododonu, ni sa vatakila na Kalou ni sa vinakatia na nonai madrali: ia na ka koya sa vosa tiko lia kinia ko koya ni sa mate tu. ⁵ Ni sa vabautia sa kau yani kinia ko Inoki ka yali ni mate; a ra sa yali ni kunei koya, ni sa yadi koya yani na Kalou: ia ni sa bera ni kau yani, sa tu lia vua nai vadinadina ni sa vinakati koya na Kalou. ⁶ Ia kevaka sa yali na vabautia, sa dredre sara me da vinakati: o koya sa torovia na Kalou e dodonu me vabautia ni sa bula ko koya, ni sa saumi ira voki lia era sa dauvaqarai koya. ⁷ Ni sa vabautia sa rere kinia ko Noa, ni sa vasalatakia oti na Kalou ena vuku ni veika sa bera ni rairai mai, a sa taya e dua na waqa ko koya me vabulai ira kinia na nona lewe-ni-vale; a sa valewai ira kinia na kai vuravura, ka yaco mei taukei ni vivadonui sa yaco ena vabautia. ⁸ Ni sa vabautia sa talairawarawa kinia ko Eparaama, ni sa kacivi me qai ki na vanua sa bera ni soli vua me taukenia; ka sa qai yani, ia sa yali ni kila na vanua sa qai kinia. ⁹ Ni sa vabautia sa qai ka tiko vulagi kinia e na vanua ka yalatakia, me vaka sa yali ni nona, ka tiko lowa lia ena vivale laca, ko Aisake voki lia vata kei Jekope, eratou taukenia vata emuri na ka koya ka yalatakia: ¹⁰ ni sa nuitakia ko koya na koro sa tauyavutakia, ka tara na Kalou ka caka. ¹¹ Ni sa vabautia sa vakaukauwatakia kinia ko Sera me kunekunetakia na kawa, a sa vasucu gone ni sa oti na kena gauna, ni sa nanumia lia sa yalodina ko koya ka yalatakia: ¹² o koya sa tubu kinia mai vua e lewe dua, o koya e vaka sa mate, e lewe levu me vaka na vikalokalo ni lomalagi, e va voki lia na nuku mai matasawa e yali ni wili rawa. ¹³ Sa mate ena vabautia ko ira kece lia koya ia ka sa yali ni nodra dina na veika ka yalatakia, era sa raicia vayawa, ka ciqomia, ka tukuni ira ni ra a tiko vulagi lia ka viqaiyaki voli e vuravura. ¹⁴ Ia ko ira sa vosa vakoya era sa vatakila sara ni ra sa vaqara na vanua sa nodra. ¹⁵ E dina lia, kevaka era sa nanumia na vanua ko ya era sa dainia tu, sa rawarawa lia mera lesu voki kinia. ¹⁶ Ia era sa qai gutia sara e dua na vanua sa vinaka cake, koya sa valomalagi: o koya lia koya e yali kinia ni madua na Kalou me vatokai me nodra Kalou: ni sa tara ko koya e dua na koro me nodra. ¹⁷ Ni sa vabautia sa vacabori Aisake kinia ko Eparaama, ni sa vatovolei, ia ko koya ka vosatakia kinia na yalayala sa vacaboria koya na lewe dua loa lia o koya ka vatuburia ko koya ¹⁸ ia ka sa kainaki ena vukuna eliu, Na kawa i Aisake ena vatokai me nomu kawa: ¹⁹ ni sa vadinatia ko koya sa rawarawa vua na Kalou me vabulai koya voki mai na mate; a sa tauri koya voki vakinia enai vatakarakara. ²⁰ Ni sa vabautia sa vosavakalougatataki Jekope vata kei Iso kinia ko Aisake ena veika sa bera. ²¹ Ni sa vabautia sa vosavakalougatataki rau kinia na luve i Josefa ko Jekope, ni sa voleka ni mate; a sa cuva sobu ena nonai titoko. ²² Ni sa vabautia sa tukunia kinia ko Josefa, ni sa voleka ni mate, ni na qai tani ko ira na luve i Isireli; a sa tataunakia na suina. ²³ Ni sa vabautia sa vunitaki Mosese ka vula tolu koi rau na nona matua, ni sa sucu ko koya, ni rau sa raicia sa matavinaka na gone; a rau sa yali ni rerevakia nai varo ni tui. ²⁴ Ni sa vabautia sa bese kinia ko Mosese, ni sa qai tamata bula mai, me vatokai me luvena na luve i Fero na goneyalewa; ²⁵ ni sa digitakia me vosotia na vivacacani kei ira na tamata ni Kalou, ia ka catia ni bau marau loa lia enai valavala ca ena siga eso; ²⁶ ni sa vadinatia sai yau levu me valialiai ena vuku i Karisito, ia na ka lailai nai yau mai Ijipita: ni sa varaicia tu na kenai sau. ²⁷ Ni sa vabautia sa daini Ijipita kinia ko koya, ka yali ni rerevakia na cudru ni tui; ni sa gumatua me vaka sa raici koya sa yali ni vi rai. ²⁸ Ni sa vabautia sa caka kinia ko koya na kana vata ni qai-sivia, ki na kureitakia na dra, me kakua ni tarai ira ko koya sa vamatei ira na ulumatua. ²⁹ Ni sa vabautia era sa qai kinia eloma ni Wasawasa Damudamu me vaka sa vanua mamaca: ia ni sa vatovolea ko ira na kai Ijipita mera qai vakinia, era sa luvu. ³⁰ Na vabautia sa bale kinia na bai mai Jeriko, ni sa buku na druadrua ka bogi vitu. ³¹ Ni sa vabautia sa yali kinia ni rusa vata kei ira sa yali ni vabautia ko Reapi, na yalewa dautagane, ni sa yadi rau ena vivacegui rau na yamata. ³² Ia a cava voki me'u tukunia? ni sa dede sara kevaka ka'u sa tukuni Kitioni vata kei Peraki vata kei Samisoni vata kei Jefica vata kei Tevita vata kei Samuela vata kei ira na parofita: ³³ o ira, ni ra sa vabautia, era sa vamalumalumutakia na matanitu eso, era sa caka na ka e dodonu, era sa rawatia me nodra na veika ka yalatakia, era sa sogotia na gusu ni laioni, ³⁴ era sa bokocia na bukawaqa rerevaki, era sa bula mai nai seleiwau, era sa vakaukauwatakia voki ni ra sa malumalumu, era sa qaqa enai valu, era vasavi ira nai valu ni kai tani. ³⁵ Sa tauri ira voki ko ira na yalewa eso na kai nodra, era sa tu cake voki mai na mate: ia ka so sa vararawatakia valevu, a ra sa bese lia ni bula; me vinaka cake kinia na nodra tu cake voki mai na mate; ³⁶ ia sa vatovolei eso ena vivalialiai ki na vakanakuitatakia, kei na vesu voki lia kei na biu ki na vale ni vivesu; ³⁷ era sa lauviri ena vatu, era sa varomusukia rua, era sa dauveretakia, era sa vamatei enai seleiwau: era sa vilqaiyaki voli ka sa vaisulu ena kuli ni sipi kei na kuli ni me; era sa dravudravua sara, era sa vararawatakia, era sa vacacania; ³⁸ (ia sa yali ni yaga ko ira na kai vuravura me ra tiko vata ki ira:) era sa se ki na vivanua liwa lala, ki na viulu-ni-vanua, ki na qara eso, kei na viqaravatu e vuravura. ³⁹ Ia ko ira kece lia koya era sa rogo vinaka ena vuku ni vabautia, ia ka yali ni nodra dina na ka ka yalatakia: ⁴⁰ Ia sa varautakia na Kalou vi ita na ka e vinaka cake, me ra kakua kinia ni vavinakatakia sara dua loa lia me da vavinakataki sara vata lia.