¹ Ia kau sa varotia, e na mata ni Kalou, ki Jisu Karisito, o koya ena lewai ira na bula ki ira na mate e na nona rairai mai ki na nona matanitu; ² mo vunautakia na Vosa; gumatua e na gauna vinaka, e na gauna ca; mo tukunia na ka e ca, mo vunauci ira sa cala, mo dauvarotia tiko e nai vavuvuli ka vosotia valevu sara. ³ Ni na yaco na gauna era na yali ni vosotia kinia nai vavuvuli dodonu; ia ena vaka na nodra gagadre ca, era na valewevuqataki ira kinia na nodra i vavuvuli, ni sa qasikanunu na daligadra; ⁴ a ra na vagolea tani na daligadra mai na ka dina, ka lesu ki nai tukutuku wale. ⁵ Ia ko iko, mo yalomatua e na ka kece lia, mo vosotia na ka rarawa, mo caka na cakacaka ni vavuvuli, vayacoria sara na ka ko sa lesi kinia mo i talatala. ⁶ Niu sa varau tu meu liviraki, ka sa voleka na siga ni noqu toki yani. ⁷ Au sa vala oti e nai valu vinaka, au sa cicivia oti na cere, au sa tauria matua na vabautia: ⁸ emuri, sa maroroi me noqu nai sala vaturaga ni valavala dodonu, o koya ena solia mai vi au na Turaga, o koya na turaga-ni-lewa dodonu, e na siga ko ya; ia ena yali vi au duadua loa lia, vei ira kece voki lia era sa vinakatia na nona rairai mai. ⁹ Gumatua mo qai vatotolo mai vi au: ¹⁰ ni sa daini au ko Timasa, ni sa lomani vuravura ko koya, ka sa qai ki Cesalonaika; ko Kirisiki ki Kalatia, o Taito ki Talimetia. ¹¹ Sa tiko vi au ko Luke dua loa lia. Yadi Marika mo drau qai vata kaya mai: ni sa yaga vi au ko koya e na cakacaka. ¹² Au sa talai Tikiko ki Efeso. ¹³ Ai tutuvi kau a dainia mai Tiroa vi Karipo, ni ko sa qai mai, mo yadia mai, ki nai vola, ia mo nanumia sara nai vola kuli-ni-sipi. ¹⁴ Sa levu na ka ca ka caka vi au ko Alekisada na matai ni parasa; ena saumia vi koya na Turaga me vaka na nona cakacaka: ¹⁵ mo qarauni iko voki lia mai vua; ni sa qatia valevu na nitou vosa ko koya. ¹⁶ Niu a tukuni au mada eliu, sa yali e dua na tamata kirau sa tu vata kaya, ia sa daini au ko ira kece lia: mo kakua ni wili vi ira. ¹⁷ Ia sa tu vata ki au na Turaga, a sa vakaukauwataki au; me kilai sara e na vukuqu na ka sa vunautakia, me ra rogocia voki lia na vimatanitu kece lia; ia kau a vabulai mai na gusu ni laioni. ¹⁸ Ena vabulai au na Turaga mai na ka ca kece lia, ka na vayacori au voki lia ki na nona matanitu valomalagi: me ia vua na varokoroko ka yali ni mudu. Emeni. ¹⁹ Au sa loloma yani vi Pirisila ki Akuila, vi ira voki lia na lewe-ni-vale i Onesiforo. ²⁰ Sa tiko mai Korinica ko Erasito: ia kau sa daini Tirofimo mai Milito ni sa tauvi-mate. ²¹ Gumatua mo liu mai ni sa bera na vula i liliwa. Sa loloma yani vi iko ko Upolo, ki Putena, ki Laino, ki Kilotia, ki ira kece lia na viwekani. ²² Me tiko vata ki na yalomu na Turaga ko Jisu Karisito. Me nomudou na loloma. Emeni.