¹ Koi au ko Paula, nai apositolo i Jisu Karisito e na lewa ni Kalou, e na vuku ni bula ka yalatakia, sa tu vi Karisito Jisu, ² vi Timoci, na noqu gone ni toko: Me yaco na loloma, na yalololoma, na vacegu mai vua na Kalou ko Tamada ki Karisito Jisu na noda Turaga. ³ Au sa vavinavinaka vua na Kalou, o koya kau sa qaravia e na yalo dina me vaka na nodra i valavala na qase eliu, niu sa yali ni mudu ni nanumi iko e na noqu masu e na bogi ki na siga; ⁴ niu sa gadrevia valevu meu raici iko, niu sa nanumia na wai ni matamu, meu vasinaiti kinia e na marau; ⁵ niu sa vananumia e na vabautia dina sara sa tu vi iko, ka tu eliu vi Loi na bumu, vi Unaisi voki lia na tinamu, au sa dinatia sa tu voki lia vi iko. ⁶ O koya ko ya kau sa vananumi iko kinia mo uqetia nai solisoli ni Kalou, sa yaco vi iko e na vitabaki ni ligaqu. ⁷ Ni sa yali ni solia mai vi ita na Kalou na yalo ni rere: a yalo ni kaukauwa lia, ki na yalololoma, ki na yalomatua. ⁸ O koya mo qai, kakua ni maduatakia na kenai tukutuku ni noda Turaga, se koi au na nona tamata sa vesu tu: ia mo vosotia na vivararawataki e na vuku ni tukutuku-vinaka me vaka na kaukauwa ni Kalou; ⁹ o koya sa vabulai ita, ka sa kacivi ita me da yalosavasava, a sa yali lia e na vuku ni noda cakacaka, e na vuku ni sa nonai naki lia ki na loloma wale lia ka soli vi ita eliu, e na vuku i Karisito Jisu, sa vatekivu emuri ko vuravura; ¹⁰ ia ka sa qai varaitakia mai ni sa rairai mai na nodai Vabula ko Jisu Karisito, o koya sa vaotia na mate, ka vavotuya na bula ki na yali mate rawa e nai tukutuku-vinaka: ¹¹ au a lesi kinia meu vunau, meu apositolo voki lia, ki na nodra i vavuvuli na vimatanitu. ¹² O koya voki lia kau sa vosotia kinia na vi ka ko ya: ia kau sa yali ni madua kinia: niu sa kilai koya kau a vararavi kinia, ia kau sa kila dina sara ni sa rawatia ko koya me maroroya na ka kau sa solia vua ka yacovia na siga ko ya. ¹³ Mo tauria matua nai varau ni vosa dina ko a rogocia maivi au, e na vabauti Karisito Jisu ki na loloma. ¹⁴ A ka vinaka sa soli vi iko mo tauria matua, ni sa vukei iko na Yalo Tabu sa tu vi ita. ¹⁵ A ka ko ya ko sa kila, ni sa daini au ko ira kece lia na kai Esia; sa vakinia ko Faijelo kei Erimojini. ¹⁶ Me yalololoma mada na Turaga kivi ira na mataqali i Onesiforo: ni sa vacegui au wasoma, a sa yali ni maduataki au niu sa vesu tu: ¹⁷ ia ni sa tiko mai Roma, sa vasaqarai au matua, a sa kunei au. ¹⁸ Me solia mada vi koya na Turaga me basikia vua na loloma mai vua na Turaga e na siga ko ya: ia na kena levu ni ka sa qaravi au kinia mai Efeso, ko sa kila vinaka sara.