¹ Ia ka'u sa lewa va koya ena lomaqu, me'u kakua ni qai voki vi ikodou ena vivararawataki. ² Io, kevaka ka'u sa vararawatakia na lomamudou, ko cei sa vamarautaki au, ko koya dua loa lia ka'u sa vararawatakia? ³ Ia ka'u a vola vakinia vi ikodou, de vararawataki na lomaqu, ni'u qai yani, ena vukudra sa dodonu me'u reki kinia; ka'u sa vararavi lia vi kodou kece lia ni sa nomudou kece lia na noqu reki. ⁴ Ni sa rarawa valevu ka yaluma na lomaqu ni'u a vola vi ikodou, a sa vawai valevu na mataqu; sa yali ni dou rarawa kinia, ia mo dou kila lia ni sa levu sara na noqu loloma vi ikodou. ⁵ Ia kevaka e dua sa caka na vivararawataki, sa yali ni vararawataki au lia ko koya, ia (me'u kakua ni bitakia valevu) koi ikodou kece voki lia. ⁶ Sa rauti koya sa vakinia na kenai sau koya, sa yaco vua mai vi ira na lewe levu: ⁷ ka sa kilikili cake kinia mo dou kua soti ni cudruvia, ka mo dou vaceguya, de luvuci koya sa vakoya na nona rarawa levu sara. ⁸ Ko koya koya ka'u sa masuti ikodou kinia, mo dou vadinadinatakia na nomudou loloma vi koya. ⁹ Ni sa ka voki lia koya ka'u vola yani kinia, meu kilai ikodou kinia se dou sa talairawarawa ena ka kece lia, se yali. ¹⁰ Ia kevaka dou sa yali ni cudruvia e dua ena dua na ka, au sa va voki lia kinia koi au; ia kevaka kau sa yali ni cudruvakia e dua na ka, sai ikodou lia ka'u sa yali ni cudruvakia e dua na ka, sai ikodou lia kau sa yali ni cudruvakia kinia ena mata i Karisito; ¹¹ me kakua ni rawai ita ko Setani: ni sa yali ni guilecavia na nona daulawaki. ¹² Ia ni'u a qai ki Tiroa ena vuku ni tukutuku-vinaka kei Karisito, a sa dolavia vi au na darava na Turaga, ¹³ sa yali ni cegu na yaloqu, ni'u sa yali ni raici Taito na wekaqu; au sa qai tatau vi ira, ka qai tani ki Masitonia. ¹⁴ Me caka na vavinavinaka vua na Kalou, ko koya sa tuberi kitou tiko lia ena reki ena yaca i Karisito, ka sa vatakilatakia vata kei kitou ena yasana kece lia ni sa boi vinaka na kilai koya. ¹⁵ Ni sai Karisito kitou sa boi vinaka kinia ena mata ni Kalou, vi ira era sa vabulai tiko, vi ira voki lia era sa varusai tiko: ¹⁶ vi ira koya sa boiboi vivamatei me ra mate kinia; vi ira koya sa boiboi vivabulai me ra bula kinia. Ia ko cei sa rawatia na veika koya? ¹⁷ Ni kitou sa yali ni dauvatanitakia na vosa ni Kalou, me vataki ira na lewe levu; ia kitou sa vataki ira era sa dina sara, me vaka sa mai vua na Kalou, ena mata ni Kalou, kitou sa vosa ena yaca i Karisito.