¹ Ko ira kece lia na tamata era sa tiko bobula, me ra kilai ira na nodra turaga me ra varokorokotaki ira valevu, me kakua ni vosavacacatakia kinia na yaca ni Kalou kei na lotu. ² Ia ko ira sa qaravia na turaga era sa vabautia, me ra kakua ni beci ira, ni ra sa viwekani; ia mera qaravi ira valevu cake, ni ra sa vabautia ka ra lomani ko ira sa nodra na ka yaga. A veika ko ya mo vatavulicia ka varotia. ³ Kevaka e dua sa vavuvuli vatani, ka yali ni vinakatia na vosa vinaka, io na nona vosa na noda Turaga ko Jisu Karisito, ki nai vavuvuli sa valotu; ⁴ sa viavia levu ko koya, ka sa na ka e kila, a sa dauvinakatia na vileti ki na vibatakia na vosa loa lia, sa tubu kinia na vuvu, na vivala, na vosavacaca, na daunanumia ca, ⁵ a nodra vileti yali yaga na tamata lomaca, sa takali kinia nai vavuvuli dina, era sa vakasama ni sa ka ni yau na lotu: mo qai tani vi ira sa vakoya. ⁶ Ia sai yau levu na lotu vata kei na lomavinaka. ⁷ Ni sa yali na ka eda sa yadia mai ki vuravura, a sa dina sara ni sa yali voki lia na ka eda na yadia rawa. ⁸ Ia kevaka sa tu vi ita na kakana ki nai sulu, meda lomavinaka kinia. ⁹ Ia ko ira era sa gadrevia me ra vutuniyau, era sa bale ki na dauvere kei nai vesu, kei na gagadre ca e levu, ka lialia, ka dauvivacacani, ko ya sa luluvuraki ira na tamata ena mate kei na rusa. ¹⁰ Ni sa vu ni ka ca kece lia na daulomania nai lavo: era sa dau kocovia eso, a ra sa vacalai kinia ena vabautia, a ra sa cokai ira sara vakai ira ena yaluma valevu. ¹¹ Ia ko iko, na tamata ni Kalou, mo dro tani mai na veika koya; mo muria na yalododonu, na lotu, na vabautia, na loloma, na vosotia, na yalomalua. ¹² Mo caka lia nai valu vinaka ni vabauta, tauria na bula yali ni mudu, o koya ko sa kacivi kinia, ko sa vatusa voki lia kinia na vatusa vinaka ena matadra na dauvadinadina era sa lewe levu. ¹³ Au sa varotia vi iko ena mata ni Kalou, o koya sa vu ni bula kece lia, ki Karisito Jisu, o koya ka vatusa na vatusa vinaka ena mata i Ponitio Pailato; mo tauria matua nai varo, ¹⁴ mo kakua ni tauvi duka, mo yali ni cala, ka malua mada me rairai mai na noda Turaga ko Jisu Karisito: ¹⁵ ko koya ena vatakila ena nona gauna na Turaga levu dua loa lia ka daumakia, na nodra Tui na tui, ki na nodra Turaga na turaga; ¹⁶ ko koya sa tu vi koya dua loa lia na bula yali ni mudu, sa tiko ena rarama sa yali ni torovia rawa: sa yali na tamata sa raicia, se raicia rawa: me nona lia na varokoroko vata kei na kaukauwa e yali ni mudu. Emeni. ¹⁷ Varotia vi ira era sa vutuniyau ena gauna koya, mera kakua ni dokadokai ira se vararavi enai yau sa yali ni tu dei, vua lia na Kalou bula, o koya sa solia valevu vi ita na ka kece lia eda marau kinia; ¹⁸ me ra caka vinaka, me ra vutu ni cakacaka e yaga, me ra lomasoli, me ra via vivuke; ¹⁹ me ra binia tu me nodra na yavu ena yaga ena gauna e muri mai, me ra tauria kinia na bula sai koya na bula dina. ²⁰ I Timoci, tauria matua na ka sa soli vi iko, ka qai tani mai na dau talanoa ca ka yali ni yaga vata kei nai vavuvuli tani sa vatokai vailasu me vuku: ²¹ ni ra sa tukunia eso era sa vadinatia, a ra sa cala ena vabautia. Me nomu na loloma. Emeni.