¹ Ia ka'u a rogocia e dua na domo levu mai na vale-ni-lotu, sa tukunia vi iratou na agilose e lewe vitu, Dou qai, ka sovarakia yani na bilo e vitu ni cudru ni Kalou ki vuravura. ² A sa qai na kenai matai, a sa sovarakia na nona bilo ki vuravura; a sa tauvi ira na tamata na vidikoso ca e rarawa sara, o ira sa tu kinia nai vatakilakila ni manumanu, ki ira sa varokoroko ki na nona matakau. ³ Ia nai karua ni agilose sa sovarakia na nona bilo ki na wasawasa; a sa vuki kinia me vaka na dra ni tamata mate: ia sa mate na ka kece lia sa bula voli e na wasawasa. ⁴ Ia nai katolu ni agilose sa sovarakia na nona bilo ki na viuciwai ki na vivurevure-ni-wai; a ra sa vuki kinia me dra. ⁵ Ia ka'u a rogocia na agilose ni viwai ni sa tukunia, Oi ikonu na yalododonu, o ni sa bula ni kua, o ni a bula eliu, o ni sa yalosavasava, ni ikonu sa lewa va koya. ⁶ Ni ra sa vadavea na dra ni tamata yalosavasava ki na dra ni parofita ko ira koya, ko ni sa qai solia vi ira na dra me ra somia; sa dodonu me vakinia vi ira. ⁷ Ia sa dua tani voki ka'u a rogocia mai nai cabocabo-ni-soro, sa tukunia, E vaka lia koya, na Turaga na Kalou Kaukauwa, sa dina ka dodonu na nomuni lewa. ⁸ Ia nai kava ni agilose sa sovarakia na nona bilo e na mata-ni-siga; a sa soli vua me vakatakatai ira sara lia na tamata e na bukawaqa. ⁹ A ra sa qesa na tamata ni sa katakata valevu, a ra sa vosavacacatakia na Kalou, o koya sa lewa rawa na vimate ca koya: a ra sa yali ni vivutuni me ra varokorokotakia na nona lewa. ¹⁰ Ia nai kalima ni agilose sa sovarakia na nona bilo ki nai tikotiko ni manumanu; a sa butobuto na nona matanitu; a ra sa katia na yamedra e na vuku ni rarawa, ¹¹ ka vosavacacatakia na Kalou ni lomalagi e na vuku ni nodra rarawa ki na nodra vidikoso, a ra sa yali ni vivutunitakia na nodra i valavala. ¹² Ia nai kaono ni agilose sa sovarakia na nona bilo ki na uciwai levu ko Uferetisi; a sa maca kinia na kena wai, me caramakia na nodra sala na tui mai na tu-i-cake. ¹³ Ia ka'u a raicia e lewe tolu na yalo velavela eratou sa vaka na boto, eratou sa qai mai na gusu ni gata levu, mai na gusuna voki lia na manumanu, mai na gusuna voki lia na parofita vailasu. ¹⁴ Ni ratou sa yalo ni tevoro ko iratou, eratou sa caka na cakacaka mana, a ratou sa qai yani vi ira na tui ni vivanua ki vuravura taucoko, me vasoqoni ira vata ki nai valu ni siga dina ko ya ni Kalou Kaukauwa. ¹⁵ (Raicia, au sa qai mai me vaka na daubutako. Sa kalougata ko koya sa vatawa, a sa tauria na nonai sulu, de qai voli ka televua, ia ka ra raicia na nona televua.) ¹⁶ A ratou sa vasoqoni ira vata e na vanua na yacana e na vosa va-Iperiu ko Amaketone. ¹⁷ Ia nai kavitu ni agilose sa sovarakia na nona bilo e na macawa; a sa rogo mai kinia na domo levu, mai na vale-ni-lotu mai lomalagi, mai nai tikotiko-vaturaga voki lia, a sa tukunia, Sa cakati oti. ¹⁸ A sa rogo na domo ni vosa, ki na kurukuru, ka tibi na livaliva; a sa tavuki valevu na vanua, sa yali ni vakinia mai nai vatekivu ni nodra tiko e vuravura na tamata, ka me tavuki vakaukauwa, ka valevu vakinia. ¹⁹ A sa tawase vatikitolu na koro levu, ia sa bale na vikoro e na vivanua; a sa mai vananumi ko Papiloni na koro levu e na mata ni Kalou, me soli kinia na bilo ni waini ni nona cudru waqawaqa. ²⁰ A sa tuba tani yani na viyanuyanu kece lia, ia na viulu-ni-vanua sa yali ni kune. ²¹ A sa lutuki ira na tamata na uca-cevata levu mai lomalagi, a kena bibi e dua na taledi: a ra sa vosavacacatakia na Kalou ko ira na tamata e na vuku ni mate ca ni uca-cevata; ni sa ka levu sara na mate ca koya.