¹ A sa dua na ka levu e vivakurabuitaki sa rairai mai lomalagi; sa dua na yalewa sa vaisulu e na mata-ni-siga, a sa tu e ruku ni yavana na vula, a sa vaisala e na kalokalo e tinikarua: ² ia ni sa bukete sa qoqolou, ni sa taratara me vasucu. ³ A sa dua voki na ka e vivakurabuitaki sa rairai mai lomalagi; sa dua na gata levu e damudamu, sa vitu na uluna ka tini na nonai leu, ka vitu nai sala-vaturaga sa toka e uluna. ⁴ A sa yaratakia nai katolu ni wase ni kalokalo ni lomalagi na buina, ka daini ira ki vuravura: a sa tu e na mata ni yalewa na gata levu ni sa varau me vasucu, ka me kania sara na luvena ni sa qai sucu mai. ⁵ A sa vasucumia ko koya na gonetagane, sa lesi me lewai ira na vimatanitu kece lia e nai titoko kaukamea: a sa yadi yani na luvena vua na Kalou, ki na nonai tikotiko-vaturaga voki lia. ⁶ A sa dro na yalewa ki vikau, ki na dua na tikina ka varautakia na Kalou, me nona me ra vakani koya kinia ka dua na udolu ka rua na drau ka onosagavulu na siga. ⁷ A sa tubu nai valu mai lomalagi; o Maikeli ki ira na nona agilose era sa vivala ki na gata levu; a sa ia vata nai valu na gata levu ki ira na nona agilose, ⁸ a ra sa yali ni gumatua: a sa yali voki ni kune e dua na nodra tikina mai lomalagi. ⁹ A sa dai tani na gata levu, na gata makawa, a yacana na Tevoro, ki Setani, o koya sa temaki ira kece lia na kai vuravura: a sa dai ki vuravura, a ra sa dai vata kaya na nona agilose. ¹⁰ Au sa rogocia e dua na domo levu mai lomalagi, sa tukunia, Sa qai yaco na bula, ki na kaukauwa, ki na matanitu ni noda Kalou, ki na kaukauwa ni nona Karisito: ni sa dai sobu ko koya sa daubitaki ira na wekada, o koya koya sa bitaki ira tiko lia e na mata ni Kalou e na siga ki na bogi. ¹¹ Era sa rawai koya e na vuku ni dra ni Lami, ki na vuku ni vosa era sa tusanakia; ia era yali ni taleitakia na nodra bula, era sa bole mate lia. ¹² O koya koya mo reki kinia na lomalagi, ki ikodou sa tiko kinia. Dou na ca koi ikodou sa tiko e vuravura ki na wasawasa: ni sa qai sobu vi ikodou na tevoro, a sa cudru valevu, ni sa kila ko koya ena yali ni dede na nona gauna. ¹³ Ia ni sa kunea na gata ni sa dai ko koya ki vuravura, sa qai vacacania na yalewa sa vasucumia na gonetagane. ¹⁴ A sa rua na taba ni ikeli levu sa soli vua na yalewa, me vuka kinia ko koya ki na vikau ki na nona tikinia, sa laki maroroi kinia e na dua na gauna, kei na gauna voki eso, ki na vimama ni gauna, mai na mata ni gata. ¹⁵ Ia na gata levu sa luarakia na wai mai na gusuna e vaka na dobui, me dave muria na yalewa, me vacirimia tani e na waluvu. ¹⁶ A sa vukei koya na yalewa ko vuravura, ni sa dalaga na gusuna ko vuravura, ka sa tilomia na dobui sa luarakia na gata levu mai na gusuna. ¹⁷ A sa cudru vua na yalewa na gata levu, ka laki ia na vivala ki ira na kena vo ni nona kawa, o ira sa vabautia na vosa ni Kalou, ka tauria tiko lia nai tukutuku ki Jisu. ¹⁸ Ia na gata levu sa duri tu ena nuku ni matasawa.