¹ A sa curu voki ko koya ki na valenilotu; a sa tiko kinia e dua na tamata sa malai na ligana. ² A ra sa varaici koya, se na vabulai koya ena siga ni vacecegu, se yali; me ra qai beitaki koya ³ Sa qai tukunia ko koya vua na tamata sa malai na ligana, Tu cake mai. ⁴ A sa tarogi ira, Sa tara beka me caka na ka vinaka ena siga ni vacecegu, se me caka na ka ca? me caka na vivabulai, se na vivamatei? A ra sa galu lia. ⁵ Ia ni sa rai voli vacudrucudru vi ira ko koya, ni sa rarawa na lomana ena vuku ni kaukauwa ni yalodra, sa tukunia vua na tamata, Dodokia mai na ligamu. A sa dodokia yani: a sa vabulai na ligana ka yaco me vaka na ligana kadua. ⁶ A ra sa qai yani na Farisi, ka bosei koya sara ko ira vata kei ira nai tokani i Eroti, se ra na vamatei koya vaevei. ⁷ A sa qai tani ko Jisu vaka ki wai kei ira vata kaya na nona tisaipeli: a ra sa lewe levu sara sa muri koya mai Kalili, kei Jutia, ⁸ mai Jerusalemi voki lia, ke Itumia, kei na tai kadua ni Joritani; ko ira voki lia e na viyasana i Taia kei Saitoni, era lewe levu sara, ni ra sa rogocia na levu ni veika sa caka ko koya, era sa qai mai vi koya. ⁹ A sa tukunia ko koya vi ira na nona tisaipeli, me toka e dua na waqa lailai ko koya ena vukudra na lewe levu, de ra drigiti koya. ¹⁰ Ni ra sa lewe levu sa vabula ko koya; a ra sa drigiti koya kinia me ra tarai koya, ko ira kece lia era sa tauvi mate. ¹¹ Ko ira voki lia na yalo velavela, ni ra sa raici koya, era sa cuva sobu e matana, a ra sa qoqolou, ka tukunia, O iko na Luve ni Kalou. ¹² A sa varotia matua vi ira ko koya, me ra kakua ni tukuni koya. ¹³ A sa cabe ki na ulu-ni-vanua, ka kacivi ira mai sa digitakia: a ra sa qai mai vua. ¹⁴ A ra sa lewe tinikarua sa lesia ko koya, me ra tiko vata kaya, ka me vatalai ira ko koya me ra vunau, ¹⁵ me tu voki lia vi ira na kaukauwa me ra tovoci ira na tevoro: ¹⁶ A sa vayacani Saimoni ko koya me ko Pita. ¹⁷ kei Jemesa na luve i Sepete, kei Joni na taci i Jemesa, a sa vayacani rau ko koya mei Poanaji, e kenai balebale, A luve ni kurukuru: ¹⁸ kei Adriu, kei Filipi, kei Pacolomiu, kei Maciu, kei Tomasi, kei Jemesa na luve i Alifio, kei Cateo, kei Saimoni e dua vi ira sa vatokai Na gumatua, ¹⁹ kei Jutasa Isikarioti, ko koya sa soli koya yani. A sa curu ko koya ki na dua na vale. ²⁰ A ra sa lewe levu sa soqoni vata voki, a ra sa yali kinia ni kania rawa na kedra. ²¹ Ia ni ratou sa rogocia ko iratou na wekana, eratou sa qai mai me ratou tauri koya: ni ratou sa tukunia, Sa lialia ko koya. ²² Ia ko ira na vunivola ka qai sobu mai Jerusalemi, era sa tukunia, Sa tiko vua ko Pielisipupi, a sa tovoci ira na tevoro ena kaukauwa ni nodra turaga na tevoro. ²³ A sa kacivi ira mai ko koya, ka tukunia vi ira e na vosa vatautauvata, E rawatia vacava ko Setani me tovocii Setani? ²⁴ Ia kevaka sa dua na matanitu sa vivala vakai koya, ena yali ni tu dei rawa na matanitu koya: ²⁵ ia kevaka sa dua na vale sa vivala vakai koya, ena yali voki lia ni tu dei rawa na vale koya. ²⁶ Ia kevaka sa caka ko Setani me vivala vakai koya, ka tovoci, ena yali ni tu dei rawa, ena oti lia. ²⁷ Sa yali na tamata me curumia rawa na vale ni qaqa, ka kovea na nonai yaya, kevaka sa yali mada ni vesukia na qaqa, ena qai kovea emuri na nonai yau. ²⁸ Au sa tukunia vaidina vi ikodou, Sa rawa me bokocia laivi na nodrai valavala ca kece lia na luve ni tamata, kei na nodra vosa ca kece lia era sa vosavacacatakia kinia na Kalou: ²⁹ ia ko koya sa vosavacacatakia na Yalo Tabu ena yali tiko lia ni bokoci na nonai valavala ca, ia sa tu vua na nona cala ka yali ni mudu: ³⁰ ni ra tukunia, Sa dua na yalo velavela sa tu vua. ³¹ Sa qai qai mai ko iratou na tinana, kei na tacina, a ratou sa tu e tuba, ka talaki vua me qai mai. ³² Ia era sa lewe levu sa tiko vavolivolitia; ka ra sa tukunia vua, Raicia, na tinamu kei iratou na tacimu eratou sa tu e tuba, eratou mai qarai iko. ³³ A sa vosa vi ira, ka tukunia, Ko cei na tinaqu se ko iratou na taciqu? ³⁴ A sa varaici ira era sa tiko vavolivoliti koya, ka tukunia, Raicia na tinaqu kei ira na taciqu! ³⁵ ko koya yadua ena muria na loma ni Kalou, sai koya koya na taciqu, se na ganequ, se na tinaqu.