¹ Dou kakua ni daulelewa, de dou lewai. ² Ia na lewa, dou na caka, dou na lewai kinia: ki na varau dou sa varautakia, ena varautaki voki lia vi ikodou. ³ Ia ka vaevei, ni iko sa raicia, na malamala e na mata ni wekamu, ka ko sa yali ni nanumia na kau e matamu? ⁴ Se ko na tukunia vaevei vua na wekamu, Me'u leutia mada na malamala mai na matamu; ka raicia, sa tu e matamu na kau? ⁵ Na dau vivakaisini, mo cavutia mada eliu na kau mai na matamu; ia ko na qai raicia vinaka mo leutia na malamala mai na mata ni wekamu. ⁶ Dou kakua ni solia na ka tabu vi ira lia na koli, se dainia na nomudou mata-ni-civa e matadra na vuaka, de ra butukia sobu e yavadra, ka vuki mai ka basuraki ikodou. ⁷ Dou kerekere, ka na soli vi ikodou: dou vaqara ka dou na raicia; dou tukituki, ka na dolavi voki lia vi ikodou. ⁸ ni sa rawatia ko koya yadua sa kerekere; ka sa raicia ko koya sa vaqara ka na dolavi lia vua sa tukituki. ⁹ Se ko cei lia vi ikodou, kevaka e kere madrai na luvena, ena solia vua e dua na vatu? ¹⁰ se kere ika, ena solia vua e dua na gata? ¹¹ Ia kevaka dou sa kila koi ikodou na tamata ca, mo dou solia na ka vinaka vi ira na luvemudou; sa na gu valevu cake, me solia na veika vinaka na Tamamudou mai lomalagi vi ira voki lia sa kerekere vua. ¹² O koya, na ka vayadua lia, dou sa vinakatia me ra caka lia vi ikodou na tamata, dou caka va voki lia vi ira; ni sa vakoya na vunau kei ira na parofita. ¹³ Dou curu ki na matamata ni koro qiqo: ni sa galala na matamata-ni-koro, ka rabailevu na sala, sa basika kinia ki na rusa, a ra sa lewe levu sa curu sara kinia; ¹⁴ ni sa qiqo na matamata-ni-koro, ka rabalailai na sala, sa basika kinia ki na bula, a ra sa lewe lailai sa raicia. ¹⁵ Ia dou qarauni ikodou vinaka mai vi ira nai vavuvuli vailasu, era sa qai mai vi ikodou ka vaisulu lia vaka na sipi, a ra sa wolifa daukata e lomadra. ¹⁶ Dou na kilai ira sara lia ena vuadra, Sa taucia li na vua-ni-vaini mai na co- vavotona, se na lolo mai na soni? ¹⁷ sa vakinia sa vuatakia na vua vinaka na kau vinaka kece sara lia, a sa vuatakia na vua ca na kau ca. ¹⁸ E yali na kau vinaka me vuatakia rawa na vua ca, se na kau ca me vuatakia rawa na vua vinaka. ¹⁹ Na kau va yadua sara lia sa yali ni vuatakia na vua vinaka sa ta laivi, ka dai ki na bukawaqa. ²⁰ E dina sara lia, dou na kilai ira ena vuadra. ²¹ Ena yali ni curu sara ki na matanitu valomalagi ko ira kece lia sa tukunia vi au, Turaga , Turaga; ko koya lia sa caka na loma i Tamaqu sa tiko lia mai lomalagi. ²² Era na lewe levu ena tukunia vi iko ena siga koya, Ikonu na Turaga, na Turaga, kimamu sa yali lia ni vavuvuli ena yacamuni? ka tovoci ira na tevoro ena yacamuni? ka caka na cakacaka mana e levu ena yacamuni? ²³ Ia ka'u na qai tukunia vi ira, Au sa yali sara ni kilai ikodou; dou qai tani vi au, koi ikodou sa dau caka nai valavala ca. ²⁴ Ia ko koya yadua sa rogocia na noqu vosa koya, ka caka, ka'u na vatautauvatakia ki na tamata vuku, sa tara na nona vale ena dela ni vatu: ²⁵ a sa tau mai na uca, ka coka lia mai na dobui, ka liwa na cagi, ka tabakia sara lia na vale ko ya; a sa yali ni bale: ni sa tauyavutaki voki lia ena vatu. ²⁶ Ia ko koya yadua sa rogocia na noqu vosa koya? ka yali ni caka, ena tautauvataki lia ki na tamata lialia, sa tara na nona vale ena dela ni nuku. ²⁷ a sa tau mai na uca, ka coka mai na dobui, ka liwa voki lia na cagi, ka tabakia na vale ko ya; a sa bale kinia: ia na ka levu lia na kena bale. ²⁸ A sa yaco, ni sa tinia lia na nona vosa koya o Jisu, era sa kurabui sara lia na lewe levu ena nonai vavuvuli. ²⁹ Ni sa vatavulici ira me vaka e dua na sa tu lia vua na lewa, ka yali sara lia ni vataki ira na nodra vu-ni-vola.