¹ Ia ni sa raicia na lewe levu ko koya, sa cabe ki na ulunivanua; ia ni sa tiko sobu, sa qai mai vi koya ko ira na nona tisapeli: ² a sa vosa ko koya, ka vatavulici ira, ka tukunia: ³ Sa kalougata ko ira sa yalomalumalumu: ni sa nodra na matanitu valomalagi. ⁴ Sa kalougata ko ira sa dautagi: ni ra na vacegui. ⁵ Sa kalougata ko ira sa yalomalua: ni ra na taukenia na vanua. ⁶ Sa kalougata ko ira sa viakana ka viasomia nai valavala dodonu ni ra na vamaumautaki. ⁷ Sa kalougata ko ira e dauloloma: ni sa na lomani. ⁸ Sa kalougata ko ira sa yalosavasava: ni ra na raicia na Kalou. ⁹ Sa kalougata ko ira sa dau tataro; ni ra na vatokai me luve ni Kalou. ¹⁰ Sa kalougata ko ira era sa dau vacacani ena vuku ni valavala dodonu: ni sa nodra na matanitu valomalagi. ¹¹ Dou sa kalougata, ni dou sa vasewasewani, ka vacacani, ka vosavacacataki vailasu ena ka kece sara lia e ca, ena vukuqu: ¹² dou reki, ka marau valevu: ni sa levu na kenai sau vi ikodou mai lomalagi: ni sa vakoya na nodra vacacani ira na parofita era sa bula eliu vi ikodou. ¹³ Koi ikodou na masima ki vuravura; ia kevaka sa seavu mai na masima na kena tuituina, ena vatuituinataki voki ena cava? sa qai yali ni yaga e dua na ka, me dai sara lia ki tautuba, ka me butukia sobu ko ira na tamata. ¹⁴ Koi ikodou na rarama ki vuravura. Na koro sa tara toka ena ulu-ni-vanua sa yali ni tabonaki rawa. ¹⁵ Sa yali voki lia ni tutuvakia na cina, ka me qai dai toka e ruku ni varau ni sila, ena kenai tutu lia; sa qai cinavi ira kece sara lia sa tiko e vale. ¹⁶ Me caudre vakinia na nomudou rarama ena matadra na tamata, me ra raicia na nomudoui valavala vinaka, ka varokorokotakia na Tamamudou sa tiko mai lomalagi. ¹⁷ Dou kakua ni vakasama niu sa qai mai meu vaotia na vunau, se na nodra vavuvuli na parofita; au sa yali ni qai mai meu vaotia, meu vayacoria lia. ¹⁸ Ni'u sa tukunia vaidina vi ikodou, Ena takali mada ko lomalagi ki vuravura, ia ena yali ni takali mai na vunau, e dua na mata-ni-vola lailai se dua na tikinia lailai sara, ena yaco mada lia na ka kece. ¹⁹ O koya ena vatokai kinia me lailai sara na matanitu valomalagi, ko koya yadua ena talaidredre mai na vunau koya sa lailai sara lia, ka vatavuvuli kinia vi ira na tamata; me levu ena matanitu valomalagi. ²⁰ Niu sa tukunia vi ikodou, Kevaka sa yali ni uasivi cake na nomudoui valavala dodonu ena nodra na vunivola kei ira na Farisi, dou sa yali sara lia ni curu kinia na matanitu valomalagi. ²¹ Dou sa rogocia ni sa kainaki vi ira eliu, Mo kakua ni laba; ia ko koya ena laba, ena cudruvi koya na matavilewai; ²² ia ko koya , ka'u sa tukunia vi ikodou, O koya yadua sa cudru loa lia vua na wekana, ena cudruvi koya sara lia na matavilewai: ia ko koya ena vosavacacatakia na wekana, ni sa beitakia me ca, ena cudruvi koya na matavilewai levu: ia ko koya ena rurulialiataki koya, ena cudruvi e na bukawaqa mai eli. ²³ Ko koya, kevaka ko sa yadia na nomui madrali ki nai cabocabo ni soro, a sa nanumia mai kinia sa dua na ka sa beitaki koya kinia na wekamu; ²⁴ dainia tu na nomui madrali ena mata ni cabocabo ni soro, ka mo qai, mo drau vivinakati mada eliu ki na wekamu, mo qai mai ka vacaboya na nomui madrali. ²⁵ Kusarawa mo drau vivinakati kaya sa beitaki iko, ni drau sa qai vata kaya ena gaunisala; de soli iko ko koya sa beitaki iko vua na turaga-ni-lewa, ka soli koya vua na turaga-ni-lewa vua na ovisa, ko na qai biu ki na vale ni vivesu. ²⁶ Au sa tukunia vaidina vi koya, O na yali sara lia ni sereki mai kinia, ko na saumia kece mada nai lavo. ²⁷ Dou sa rogocia sa kainaki vi ira eliu, Mo kakua ni dauyalewa: ²⁸ ia ko koya, au sa tukunia vi ikodou, O koya yadua ena raicia na yalewa ka me dodomo kinia, sa dauyalewa oti kaya e lomana. ²⁹ Ia kevaka sa vacalai iko na matamu i matau, leutia tani, ka dainia tani vi iko: ni sa vinaka vi iko me yali laivi e dua na tikimu, ka me kakua ni dai ki eli na yagomu taucoko. ³⁰ Ia kevaka sa vacalai iko na ligamu i matau; mudukia tani; ka dainia tani vi iko; ni sa vinaka vi iko me yali laivi e dua na tikimu, ka me kakua ni dai na yagomu taucoko. ³¹ Sa kainaki voki lia, Ko koya sa dainia tani na watina; me solia vua nai vola ni vibiu: ³² ia koi au, ka'u sa tukunia vi ikodou , Ko koya sa dainia na watina, ke sa yali ni dautagane, sa vavunia na nona dautagane; ia ko koya erau sa viwatini kaya sa dai, sa dauyalewa. ³³ Dou sa rogocia voki lia, ni sa tukunia vi ira eliu, Mo kakua ni bubului vailasu, ia mo vayacoria vua na Turaga na ka ko sa bubului kinia. ³⁴ ia koi au, kau sa tukunia vi ikodou, Dou kakua sara lia ni bubului: kakua. ki lomalagi, ni sa i tikotiko vaturaga ni Kalou: ³⁵ kakua ki vuravura; ni sai tutu-ni-yavana: kakua, ki Jerusalemi; ni sa nona koro na Tui levu. ³⁶ Mo kakua ni bubului ki na ulumu; ni ko sa yali ni vukicia rawa e dua na drauna me vulavula se loaloa. ³⁷ Ia me io, na io, me yali na yali, na nomudou vosa; ia na ka sa levu cake, sa tubu ena ca. ³⁸ Dou sa rogocia sa kainaki, Me kenai sau ni mata na mata, ka me kenai sau ni bati na bati, ³⁹ Ia koi au, kau sa tukunia vi ikodou, Dou kakua ni visausaumitakia na ca: ia kevaka e dua sa sabicia na balumu i matau, solia voki lia na kena i karua. ⁴⁰ Ia kevaka e dua sa via yadi iko vi ira na matavilewai, ka me yadia tani na nomui curucuru, dainia me yadia tani voki lia na nomui tutuvi. ⁴¹ Ia kevaka e dua sa vasaurarataki iko mo drau qai voki lia e dua na maili, drau qai lia na kena i karua. ⁴² Solia vua sa mai kerekere vei iko, ia kakua ni vuki tani vua sa via kerea mada e dua na nomu ka. ⁴³ Dou sa rogocia sa tukuni lia, Mo lomania na wekamu, ka catia na nomu meca: ⁴⁴ ia koi au, ka'u sa tukunia vi ikodou, Dou lomani ira na nomudou meca, vosavinaka vi ira sa rulaki ikodou, caka vinaka vi ira sa cati ikodou, ka masulaki ira sa valialiai ikodou, ka vacacani ikodou; ⁴⁵ mo dou luvena na Tamamudou sa tiko mai lomalagi; ni sa vacabea ko koya na nona matanisiga vi ira na tamata ca kei ira voki lia na tamata vinaka, a sa vataucia mai na uca vi ira na tamata yalododonu, kei ira voki lia na tamata yali ni yalododonu. ⁴⁶ Ia kevaka dou lomani ira sa lomani ikodou, a cava ena ikodoui sau? era yali lia ni caka vakoya ko ira sa kumunia na vacavacava? ⁴⁷ Ia kevaka dou vikidavaki dua loa lia ki ira na wekamudou, a cava dou sa uasivi cake kinia? era yali lia ni caka vakoya ko ira na lewe ni vimatanitu tani? ⁴⁸ O koya lia mo dou qai vinaka sara lia, me vaka voki lia sa vinaka sara lia na Tamamudou sa tiko mai lomalagi.