¹ Na matanitu valomalagi sa tautauvata ki na tamata sa taukenia e dua na vale, a sa qai ko koya e na savulaci caca me voli ira eso na tamata me mai cakacaka e nona were-ni-vaini. ² Ia ni sa vivosaki kei ira na tamata cakacaka me ra tauyadua na pene ena dua na siga me kedrai voli, sa qai talai ira ki na nona were-ni-vaini. ³ A sa qai ko koya enai katolu ni aua, a sa raici ira eso voki era sa tu loa lia ena rara ni vivoli, ⁴ a sa tukunia vi ira, Dou qai voki lia ki na were-ni-vaini, caka na ka e dodonu, kau na solia vi ikodou. A ra sa qai. ⁵ Sa qai voki ko koya enai kaono kei nai kaciwa ni aua, a sa caka vakinia. ⁶ Sa qai qai ko koya enai katinikadua ni aua, a sa raici ira eso voki era sa tu loa lia, a sa tukunia vi ira, Dou sa tu loa lia vacava gona ena siga ka yacovia na bogi? ⁷ Era sa tukunia vua, Ni sa yali e dua sa lavakia vi itatou. Sa tukunia vi ira ko koya, Dou qai voki lia ki na were-ni-vaini ⁸ Ia ni sa raiyavi mai, sa tukunia na turaga ni were-ni-vaini vua na nona tamata, Kacivi ira mai na tamata cakacaka, ka solia vi ira na kedrai voli, mo vatekivu vi ira sa muri, mo tinia vi ira sa liu. ⁹ Ia ni ra sa qai mai ko ira na tamata ni kenai katinikadua ni aua, era sa tauyadua, na pene. ¹⁰ Ia ni sa qai mai ko ira era sa liu, era sa nanumia era na rawatia valevu cake; ia ka ra sa yadua lia na pene. ¹¹ Ia ni ra sa tauria, era sa qai didi vua nai taukei ni vale, ¹² ka tukunia, Ko ira koya era sa muri, sa dua loa lia na aua era sa cakacaka kinia, ia ko sa vatautauvatataki kimamu kei ira, ia kimamu sa colatia na kena bibi kei na todra ni siga. ¹³ A sa vosa ko koya vua e dua vi ira, ka tukunia, Noqui tau, au sa yali ni vacacani iko: edaru sa yali li ni vivosaki me dua lia na nomu pene? ¹⁴ mo yadi koya sa nomu, ka qai; sa lomaqu meu solia vua koya ka muri, me vaka vi iko; ¹⁵ sa yali beka ni tara meu vitaliatakia na noqu ka? se sa ca beka na matamu niu sa yalovinaka? ¹⁶ Ena sa vakinia, ena liu ko ira sa muri, ka na muri ko ira sa liu. ¹⁷ Ia ko Jisu sa qai cake ki Jerusalemi ko Jisu, ka sa yadi ira vatikitiki tani na tisaipeli e lewe tinikarua mai na salatu, ka tukunia vi ira. ¹⁸ Raicia, eda sa qai cake ki Jerusalemi; ka na soli yani na Luve ni tamata vi ira na bete levu, kei ira na vunivola; ia era na lewai koya me mate, ¹⁹ era na qai solia vi ira na matanitu tani me ra valialia, ka vakanakuitatakia, ka vakotia ki na kauveilatai; ena qai tu cake voki mai ko koya enai katolu ni siga. ²⁰ Sa qai qai mai vua na tinadrau na luve i Sepete, kei rau na luvena-tagane, ka cuva, ka kerea vua e dua na ka. ²¹ A sa tukunia vua ko koya, A cava ko sa vinakatia? Sa tukunia vua ko koya, Mo ni lewa me rau tiko na luvequ koya, e dua ena ligamu i matau, ka dua e na ligamu i mawi, ena nomuni matanitu. ²² A sa vosa ko Jisu, ka tukunia, Dou sa yali ni kila na ka dou kerea: drau sa rawatia beka mo drau somia na bilo kau na somi kinia? Erau sa tukunia vua, Kirau sa rawatia. ²³ A sa tukunia ko koya vi rau, Drau na somia dina na mequ bilo: ia me tiko e na ligaqu i matau, ki na ligaqu i mawi, sa yali ni noqu meu solia vailoa, vi ira lia sa varautakia ko Tamaqu me nodra. ²⁴ Ia ni ra sa rogocia ko ira na lewe tini, era sa cudru sara vi rau na vitacini. ²⁵ A sa kacivi ira mai ko Jisu, ka tukunia, Dou sa kila, ni ra sa lewai ira na vimatanitu na nodra turaga, ka sa vitalia vi ira ko ira sa qaqa. ²⁶ Ia ena yali ni vakinia vi ikodou; ia me nomudou tamata lia ko koya yadua vi ikodou sa viavialevu: ²⁷ ka me nomudou tamata ko koya yadua vi ikodou sa viaviaturaga: ²⁸ me vaka sa yali ni qai mai na Luve ni tamata me qaravi, ka me dauviqaravi lia, ka me solia na nona bula me kedrai voli e lewe levu. ²⁹ A ra sa qai tani mai Jeriko, a sa lewe levu sara sa muri koya. ³⁰ Ka raicia, e lewe rua na tamata mataboko sa tiko ena bati ni sala, ia ni rau sa rogocia sa qai voli yani ko Jisu, erau sa kacikaci, ka tukunia, Mo ni lomani kirau mai, na Turaga, na Luve i Tevita. ³¹ A sa vunauci rau ko ira na lewe levu me rau tiko lo: a rau sa qai kaci valevu kinia, ka tukunia, Mo ni lomani kirau mai, na Turaga, na Luve i Tevita. ³² A sa qai tu vadua ko Jisu, ka kacivi rau, ka tukunia, A cava drau sa vinakatia meu caka vi kodrau? ³³ Erau sa tukunia vua, Na Turaga, me rai rawa na mata i kirau. ³⁴ A sa yalololoma ko Jisu, a sa tara na matadrau: a sa rai vinaka vasauri na matadrau, a rau sa muri koya.