¹ Ia kevaka dou sa vaturi vata ki Karisito, varaicia na vi ka sa mai cake, sa dabe tiko ena liga matau ni Kalou. ² Dou dau vananumia na vi ka mai colo, kakua lia na vika e vuravura. ³ Ni dou sa mate lia, ia na nomudou bula sa vuni vata ki Karisito ena Kalou.. ⁴ Ni na rairai mai na Karisito na noda vuni bula, ka na dou qai rairai vata enai ukuuku. ⁵ O koya mo dou qai vamatea na vitikimudou vavuravura, na dauyalewa, na valavala yali savasava, na garogaro ca, na dodomo ca, vata ki na kocokoco, kei na dauqaravia na Kalou lasu: ⁶ na vi ka koya sa yaco kinia na cudru ni Kalou, vi ira sa dau talaidredre: ⁷ ia koi ikodou voki lia, dou a ia e liu nai valavala vakinia, ni dou a bula voli vakinia. ⁸ Ia koya, mo dou luvatia na ka kece lia koya, a daucudru, na daulesa, na lomaca, na vosa ca, na vosa dukadukali mai na gusumudou. ⁹ Kakua ni dauvilasuyaki, ni dou sa luvatia tu na tamata makawa ki na nonai valavala; ¹⁰ ka dou sa vasulumia koya sa vou, o koya sa vavoui tiko ena vuku me vaka na yaloyalona ka buli koya: ¹¹ sa yali kinia ni nanumia ni kai Jutia se kai tani, se cili se yali cili, na yali vuku, na kai lekutu, na bobula, nai taukei: ia sa uasivi ena ka kece lia na Karisito. ¹² O koya mo dou qai vaisulu me vaka ni dou na nona digitaki na Kalou, oi ikodou sa yalosavasava ka daulomani, e na yalo dauloloma, e na yalovinaka, e na yalomalumalumu, e na yalomalua, e na dauvosotia vadede: ¹³ dou vivosoti vai ikodou, ka kakua ni vicudruvi, kevaka e dua na ka sa rarawa kinia e dua: me vaka sa yali ni cudruvi ikodou na Karisito, mo dou vaka voki lia kinia. ¹⁴ Ia me liu ena ka kece lia koya na dauloloma, ni sai vau vinaka sara. ¹⁵ Ia me lewa sara e na lomamudou na vacegu i Karisito, ni dou sa kacivi ki na ka koya, ni dou sa yago e dua loa lia: ia mo dou caka tiko na vavinavinaka. ¹⁶ Me tiko valevu e lomamunu na vosa i Karisito e na vuku kece lia; dou vivatavulici ka vivunauci vakai ikodou ena same ki na sere ki na meke vayalo, dou sere tiko vua na Kalou ni sa tiko ena yalomunu na loloma. ¹⁷ Ia na ka kece lia dou sa caka, se dou vosa se dou cakacaka, me caka kece lia ena yaca ni Turaga ko Jisu, ko koya dou caka tiko kinia na vavinavinaka vua na Kalou na Tamada. ¹⁸ Oi ikodou na yalewa vawati, mo dou talairawarawa vi ira na watimudou, me vaka ni sa dodonu vua na Turaga. ¹⁹ Oi ikodou na tagane vawati, mo dou lomani ira na watimudou, ka kakua ni yaloca vi ira. ²⁰ Oi ikodou na gone, mo dou talairawarawa vi ira na nomunu qase ena ka kece lia: ni sa vinaka sara koya vua na Turaga. ²¹ Oi ikodou na qase, mo dou kakua ni vacudrui ira na luvemudou, de ra datuvu kinia. ²² Oi ikodou na tamata, mo dou talairawarawa vi ira na nomudou turaga vayago ena ka kece lia; kakua ni caka loa lia e na matanavotu, me vinakati ikodou kinia ko ira na tamata; dou caka lia e na loma dina, ni dou sa rerevakia na Kalou: ²³ ia na ka kece lia dou sa caka, caka mai na vu ni yalomudou me vaka vua na Turaga, me kakua vaka vi ira loa lia na tamata; ²⁴ ni dou kila ni dou na rawatia mai vua na Turaga nai votavota me kenai i sau: dou sa qaravia na Turaga ko Karisito. ²⁵ Ia ko koya sa caka ca ena rawatia na kenai sau ni ca sa caka; ka sa yali ni vinakatia vailoa e dua na tamata.