19 ¹ Ia ni sa tiko mai Koronica ko Apolosi, sa qai ko Paula ki na yasana vaka ki colo ka yaco ki Efeso: a sa kunea e so na lotu, ² a sa tukunia vei ira, "sa yaco vei kodou na Yalo Tabu ni dou sa qai vakabautia, se yali?" A ra sa tukunia vua keitou sa yali mada ni rogocia se sa soli na Yalo Tabu se yali? ³ A sa tukunia vei ira ko koya, "Dou sa papitaisotaki beka e na cava?" A ra sa tukunia, "E na papitaiso i Joni." ⁴ Sa qai tukunia ko Paula, "E dina lia sa dau veipapitaisotaki ko Joni ena papitaiso ni veivutuni, ka tukunia vei ira na tamata, me ra vakabauti koya ena muri koya mai, ko koya koya ko Jisu." ⁵ Ia ni ra sa rogocia era sa papitaisotaki ena yaca ni Turaga ko Jisu. ⁶ Ia ni sa tabaki ira ko Paula ena ligana, sa yaco kivei ira na Yalo Tabu: a ra sa vosatakia na vosa ni veivanua tani, ka dau vakatavuvuli. ⁷ Ko ira kece lia na tagane era sa lewe tnikarua beka. ⁸ Ia ni ra sa vaka sa qai ko koya ki na vale ni lotu, a sa vosa doudou tikolia ka vula tolu, a sa vakavuvuli ka vakadinadinatakia na veika ni matanitu ni Kalou. ⁹ Ia ni ra sa vakalomaqatakia eso, ka yali ni vakabautia, ka sa vosavakacacatakia na Lotu ena matadra na lewe vuqa, sa qai qai tani mai vei ira ko koya, ka tawasei ira tani era sa lotu, a sa dauvakatavuvuli tiko e na veisiga ena vale ni wilivola nei Tirano. ¹⁰ A sa kitakia vakakinia na vosa ni Turaga ko Jisu ko ira vokilia era sa tiko mai Esia, ko ira na kai Jutia, kei ira vokilia na kai Kirisi. ¹¹ A sa kitaka na Kalou na ka-mana vakaidina e so ena liga i Paula: ¹² a ra sa yadia tani mai na yagona nai tavoi eso kei nai sulu eso vei ira era tauvimate, a sa takali kinia na nodra mate, a sa qai tani mai vei ira ko ira na yalo ca. ¹³ Ia ka so na kai Jutia era sa dau veiqaiyaki, ka dau ia me vakasevi ira na tevoro, eratou sa bolea me ratou cavutia na yaca ni Turaga ko Jisu vei ira ka curumi ira na yalo ca, a ratou sa tukunia, "keitou sa vakatalai kodou tani ena yacai Jisu, ko koya sa vunautakia ko Paula." ¹⁴ A ratou sa lewe vitu na luvei Siva na kai Jutia, ka bete levu, eratou sa kitaka vakakinia. ¹⁵ Sa qai vosa na yalo ca, ka tukunia, "ko Jisu ka'u sa kila, ko Paula vokilia ka'u sa kila, ia ko cei koi kodou?" ¹⁶ A sa rika vei iratou na tamata sa tiko vua na yalo ca, a sa rawai iratou, ka sa kaukauwa vei iratou, a ratou sa dro tani kinia mai na vale koya, a ratou sa luvawale ka mavoa. ¹⁷ A sa kila na ka koya ko ira kecelia na kai Jutia kei na kai Kirisi vokilia, era sa tiko mai Epeso, a sa kani ira kecelia na rere, a sa vakabekabei na yaca ni Turaga ko Jisu. ¹⁸ A sa lewe vuqa vokilia vei ira sa vakabautia era sa qai mai, ka vakatusa ka vakatakila na nodrai valavala. ¹⁹ A ra sa lewe vuqa vokilia vei ira era dau kitaka e lia na lawaki vakatevoro eso, era sa kumuna vata na nodrai vola, ka visa ena matadra kecelia; a ra sa wilikia vata na kedrai voli, a ra sa kunea ni sa limasagavulu na udolu nai lavo siliva. ²⁰ Sa tubu vakaukauwa vakakoya na vosa ni Turaga, ka sa gumatua. ²¹ Ia ni sa oti na veika koya, sa nakita ko Paula e lomana, me qaivi Masitonia mada kei Akaia, ka qai qai ki Jerusalemi, a sa tukunia, "Ni kau sa tiko mada ki kea, e dodonu me'u qai raici Roma vokilia." ²² A sa qai tala ki Masitonia e lewe rua vei ira sa dauqaravi koya, ko Timoci kei Irasito; a sa tiko vakadede vakalailai ko koya mai Esia. ²³ Ia ena gauna koya sa tubu vakalevu na ue e na vuku ni Lotu. ²⁴ Ni sa dua, na yacana ko Timitirio; a matai ni siliva, sa dau cakava ena siliva nai vakatakarakara ni bure Kalou nei Taiana, a sa vakalevutakia kinia na nodrai yau na matai; ²⁵ ni sa kacivi ira vata, kei ira na tamata era sa dau cakacaka vakakinia, sa tukunia ko koya, :Oi kodou na turaga, dou sa kila sa cakacaka koya e da sa vakaiyau kinia. ²⁶ Ia dou sa qai raicia ka rogocia, ni sa yali e Efeso duadua lia, sa vo e lailai lia me otivi Esia taucoko, ko Paula koya, ka sa lewe vuqa sara sa rawa, ka sa saumaki tani, ni sa tukunia, sa yali ni Kalou na ka sa caka ena liga: ²⁷ ni sa voleka ni beci kinia na noda cakacaka oqo, ka yali ni koya duadua koya, sa voleka vokilia me vakawaletakia na bure i Taiana na Kalou yalewa levu, ka me lutu mai na nonai tutu lagilagi, ko koya sa soro vua ko Esia taucoko kei vuravura." ²⁸ Ia ni sa rogocia, sa ka tani sara na nona cudru, a ra sa qoqolou, ka tukunia sa levu lia ko Taiana na kalou ni kai Efeso. ²⁹ A sa ka levu na ue ena koro taucoko; a ra sa tauri Keio vakaukauwa kei Arisitako, erau sa kai Masitonia, erau sa dau qai kei Paula, a ra sa curu vakaukauwa vata ki na bure levu. ³⁰ Ia ni sa via curu ko Paula, vei ira na tamata, era sa tarovia ko ira era sa lotu. ³¹ O ira vokilia eso era sa turaga mai Esia, era sa nonai to, era sa talakia vua, ka masutia me kakua ni doudou me curu ki na burelevu. ³² A ra sa dui qoqolou: ni ra sa ue nai soqosoqo era lewe vuqa; ia s lewe levu vei ira era yali kila se cava era a soqoni vata kinia. ^{33 34} Ia eso vei ira na lewe vuqa era sa vakaturi Alekisada, cake ni sa cikevi koya ko ira na Jiu. A sa vakatabataba ko Alekisada, a sa via tusanaki koya vei ira na tamata. Ia ni ra sa kila e kai Jutia ko koya, sa sosoraki vata na domodra ka oti e rua na aua, ka qoqolou vaka, "Sa levu lia ko Taiana na nodra kalou na kai Efeso." ³⁵ Ia ni sa tarovi ira na lewe vuqa na vunivola ni koro, sa tukunia, "oi kodou na kai Efeso, ko cei na tamata sa yali ni kila ni sa vakatau ki na lewe ni koro ko Efeso na bure kalou ni kaulou yalewa levu ko Taiana, kei na matakau sa lutu sobu mai vei Jupita: ³⁶ Ia ni sa yali ni vakatitiqataki rawa na vei koya, sa dodonu mo dou tiko malua, ka kua ni kitakia vakailoa e dua na ka: ³⁷ ni dou sa yali ni daubutako mai na vale ni soro, se vosavakacacatakia na noda kalouyalewa. ³⁸ Ia kevaka sa via veitakia e dua ko Timitirio, kei ira na matai era sa nonai to, sa ia na veilewai, a sa tiko na Turaga ni lewa: me ra qai veibeitaki. ³⁹ Ia kevaka sa dua tani na ka dou sa tarogia, ena lewai ena dua na soqoni me vaka na vunau. ⁴⁰ Ni na veitakia beka vei keda na ue, ena vuku ni ka sa yaco e daidai, ka ni da sa yali ni tukunia rawa e dua na ka e vuna na soqoni vata koya. Ia ni sa vosa oti vakoya, sa qai vasukai ira nai soqosoqo.