17 ¹ Ia ni ratou sa qaivi Amifipoli kei Apolonia, eratou sa yaco ki Cesalonaika, a sa tu kinia edua na nodra vale ni lotu na kai Jutia: ² a sa curu kinia vei ira ko Paula, me vaka na nonai valavala, ka sa tolu na siga ni vakacecegu sa vakavulici ira kinia mai nai Vola Tabu, ³ ni sa vakatakila ka vakadinadina, ni sa kilikili kei na Karisito me vosotia na mate; ka tucake voki mai na mate, ka vaka ni sai koya na Karisito, ko Jisu oqo, ko koya ka'u sa vunautakia veikodou. ⁴ A sa vakabautia ko ira eso, ka laki veitokani kei Paula kei Sailasa; kei ira e lewe vuqa na ka Kirisi era a lotu vaka Jiu, kei ira na marama era sa yali ni lewe lailai. ⁵ Sa qai vuvu ko ira na Jiu, a ra sa yadia e so vei ira na kaisi botoboto, a ra sa vakasoqoni ira vata na lewe vuqa, ka vakatubu ue ena koro; a ra sa cici vakaukauwa ki na valei Jesoni, a ra sa segata me ra yadi iratou vei ira na lewe ni koro. ⁶ Ia ni ra sa yali ni kunei iratou, era sa yarataki Jesoni kei ira na veiwekani eso vei ira na turaga ni koro, ka kaci, "O iratou koya eratou sa vukici vuravura me ca, eratou sa tadu vokilia mai kike; ⁷ ka sa yadi iratou ko Jesoni ki nona vale; ka ra sa talaidredre ko ira kecelia koya ki nai vunau i Sisa, a ra sa tukunia sa dua voki na tui, ko Jisu. ⁸ A ra sa vakidroataki ira na lewe ni koro kei ira na kena turaga, ni ra sa rogocia na veika oqori. ⁹ Ia ni ra sa vakabautia na yalayala i Jesoni kei ira na tani, era sa sereki ira me ra qai. ¹⁰ Ia ko ira na veiwekani era sa kusarawa me ra talai Paula kei Sailasa ki Peria e na bogi; ia ni rau sa yaco kinia; erau sa qai ki na nodra vale ni lotu na kai Jutia. ¹¹ A ra sa uasivi vei ira na kai Cesalonaika ko ira koya ena yalo vakaturaga, ni ra sa vakarogocia na vosa e na loma e vinakatia sara, a ra sa dauvakasaqaqara enai Vola Tabu ena veisiga, se sa vakakinia na ka oqori, se yali? ¹² O koya lia koya era sa lewe vuqa kinia era sa vakabautia, kei ira vokilia na marama ni Kirisi kei ira na tagane, e ra sa yali ni lewe lailai. ¹³ Ia ni ra sa kila ko ira na Jiu mai Cesalonaika ni sa vunautakia na vosa ni Kalou ko Paula mai Peria, era sa qai vokilia kinia, ka vakayavalati ira na lewe vuqa. ¹⁴ A ra sa kusarawa kinia na veiwekani me ra talai Paula yani me qai vaka ki na wasawasa: a rau sa tiko laivi lia maike ko Sailasa kei Timoci. ¹⁵ Ia ko ira sa vakaraici Paula era sa yadi ki Aceni: ia ni sa tau vei ira nai vakaro vei Saula kei Timoci me rau qai kusarawa mai vua, era sa qai qai. ¹⁶ Ia ni sa waraki rau tiko mai Aceni ko Paula, sa katakata vakalevu na lomana, ni sa raicia sa oso na koro ena veimatakau. ¹⁷ O koya sa veileti kinia ko koya kei ira na kai Jutia ena nodra vale ni lotu, kei ira vokilia era sa sota kaya e na rara ni veivoli ena veisiga. ¹⁸ Sa qai veileti kaya, e so na nodra vuku nai tokani i Epikuro, kei ira na Sitoike. Ka sa tukunia eso "A cava mada sa via tukunia o la na dau vosa koya?" e so tani, "Ko koya koya sa vaka e dua sa vakatakilatakia mai e so na kalou vou:" ni sa vunautaki Jisu vei ira ko koya, kei na tu cake voki mai na mate. ¹⁹ A ra sa qai tauria ka tubera ki na vanua cecere nei Arisi, ka tukunia, "E rawa beka me kimamu kila se cava nai vakavuvuli vou koya ko sa mai tukunia? ²⁰ ni ko sa yadia mai eso na veika e veivakurabuitaki ki na daligai kimamu: kimamu sa via kila kinia, se cava nai balebale ni veika koya." ²¹ Ni sa yali na ka tani era sa dau kitakia ko ira kecelia na kai Aceni, kei ira na vulagi era sa tiko kinia, me ra veitukutukunitakia lia se rogocia, e dua na ka vou. ²² Sa qai wavu tu ko Paula ena loma ni vanua cecere nei Arisi, ka tukunia Oi kemunu na kai Aceni, au sa kunea e na ka kecelia ni kemunu sa dausoro vakalevu. ²³ Ia, niu sa qai voli, ka raicia na veika kemunu sa soro kinia, au sa kunea vokilia e dua nai cabocabo-ni-soro sa volai kinia VUA NA KALOU E TAWA KILAI." Ia ko koya ko nu sa soro kinia ni kemunu sa yali ni kila, au sa qai tukunia veikemunu. ²⁴ A Kalou ka buli vuravura kei na ka kecelia sa tukinia, sa Turaga lia ko koya mai lomalagi kei vuravura, a sa yali ni tiko ena veivale ni soro sa caka ena liga; ²⁵ a sa yali vokilia ni qaravia ena liga ni tamata, me vaka e bau yaga vua e dua na ka, ni sa solia lia ko koya vei keda kecelia na bula, kei na cegu, kei na ka kecelia; ²⁶ a sa buli ira era sa dra vata, na lewe ni veivanua kecelia, me ra tiko ena delai vuravura taucoko, a sa lesia na veigauna ka digitakia e liu, kei nai yalayala ni nodra veiyasana; ²⁷ me ra vakasaqara na Kalou, de ra vakayayamo beka vua, ka kunea, ia sa yali lia ni yawa ko koya vei keda yadua; ²⁸ ni sa bula vei koya ka yavala, ka rawata mai vua na noda bula; me vaka vokilia sa tukunia ko ira na nomunu dau-ni-vucu eso, sa nona kawa vokilia ko keda. ²⁹ Koya ni da sa kawa ni Kalou, e yali ni dodonu me da nanumia sa tautauvata na Kalou kei na koula se na siliva, se na vatu sa ceuta na matai se na tamata vuku. ³⁰ Ia na gauna ni lialia sa vosotia oti na Kalou, a sa vakarotakia e na gauna edaidai vei ira na tamata kecelia e na veivanua kecelia me ra veivutuni; ³¹ ni sa lokuca ko koya na siga, ena lewai vuravura kinia e na lewa dodonu, vei koya na tamata sa lesia ko koya; a sa vakadinadina kinia vei ira na tamata kecelia, e na nona vakaturi koya cake voki mai na mate. ³² Ia ni ra sa rogocia na tucake voki mai na mate, sa vakalialia ko ira eso; ka so sa tukunia, keitou sa rogoci iko voki ena ka koya. ³³ Sa qai qai tani yani ena kedra maliwa ko Paula. ³⁴ A sa kabiti koya eso na tamata, a ra sa vakabautia, e dua vei ira ko Taionisio mai na mataveilewai mai na vaua cecere nei Arisi, kei na yalewa sa vakatokai ko Tamarisi, koi rau kei ira voki eso.