16 ¹ Sa qai tadu ko koya ki Tapi kei Lisitira: ka raicia sa tiko kinia e dua sa lotu, ko Timoci na yacana, a luveni yalewa ni Jutia sa vakabauta; ia sa kai matanitu tani na tamana: ² a sa rogo vinaka ko koya koya vei ira na veiwekani mai Lisitira kei Ikoniona. ³ Sa vinakati koya ko Paula me rau qai kaya: a sa yadia mada ka cilava, e na vukudra na Jiu era sa tiko e na yasana koya: ni ra sa kila kecelia sa kai matanitu tani na tamana. ⁴ Ia ni rau sa qaivia na vei koro, erau sa tukunia vei ira, me ra vakabautia nai vakaro ka lesia ko ira nai apositolo kei ira na qase sa tiko mai Jeruisalemi. ⁵ A sa vakataudeitakia vakakinia na veisoqosoqo lewe ni lotu ena vakabautia, a ra sa tubu vokilia ena veisiga me na lewe vuqa. ⁶ Ia ni rau sa qaivi Firijia kei na vanua ko Kalatia, a sa tarovi rau na Yalo Tabu me rau kakua ni vunautakia na vosa mai Esia, ⁷ ni rau sa yaco mada ki Misia, e rau sa vakatovolea sara me qai ki Picinia: a sa yali ni laivi rau na Yalo i Jisu. ⁸ A rau sa sivi Misia, ka qai sobu ki Tiroa. ⁹ A sa rairai na vei Paula ena bogi na raivotu: Sa tu edua na kai Masitonia, ko koya sa vakamasuta, ka tukunia, "Qai mai ki Masitonia mo vukei kimamu." ¹⁰ Ia ni sa raicia oti na raivotu ko koya, Keitou sa vakatovolea sara me qai ki Masitonia, ni keitou sa vakananumia e dina sara sa kacivi keitou na Turaga me keitou vunautakia vei ira nai tukutuku vinaka. ¹¹ Ia ni keitou sa vakarewa mai Tiroa, keitou sa vue yani ki Samoceresa, ka ia ena sa vulaci ki Niapoli; ¹² ia mai kea ki Filipai, a koro levu ena yasayasa vaka-Masitonia koya, a koro vaka-Roma: ka keitou sa tiko ena koro koya ka bogi vica. ¹³ Ia ena siga ni vakacecegu keitou sa qai ki nai bili ni koro ena bati ni uciwai, ki na yasana keitou nanumia sa dau ia kinia na lotu masumasu, ka keitou sa tiko sobu, ka tukunia vei ira na yalewa era sa soqoni vata kinia. ¹⁴ A sa vakarogocia e dua na yalewa ko Litia na yacana, mai na koro ko Ceataira, sa dau volitakia na ka lokaloka ko koya sa daulotu vua na Kalou: a sa dolavia na yalona na Turaga, ka sa vakabautia kinia ko koya na veika sa tukunia ko Paula. ¹⁵ Ia ni sa papitaisotaki ko koya, kei ira vokilia na nona lewe-ni-vale, sa vakamamasu ko koya ka tukunia," kevaka dou sa lewa niu sa dina vua na Turaga, curu kina noqu vale, ka tiko kinia." A sa cikevi keitou sara ko koya. ¹⁶ A sa yaco, ni keitou sa qai ki na yasana sa ia kinia na masumasu, keitou sa sota kei na dua na vada sa tiko vua na yalo i Paiconi, ko koya sa dauvakavutuniyautaki iratou vakalevu na nona turaga ena nona parofisai vakailasu: ¹⁷ a sa muri Paula kei keitou ko koya oqo. a sa qoqolou, ka tukunia, "Sai talatala ni Kalou cecere sara ko iratou na tamata koya, a ratou sa vakatakila vei kodou na sala ni bula." ¹⁸ A sa bogi vuqa ka kitakia tiko na ka koya, A sa qai rarawa na lomai Paula, a sa rai vuki, ka tukunia vua na yalo, "Au sa vakarotakia vei iko ena yacai Jisu Karisito mo qai tani mai vua." A sa qai tani sara ena tiki-ni-siga ko ya. ¹⁹ Ia ni sa raicia ko iratou na nona turaga ni sa takali na ka eratou a vakararavi kinia me rawa kinia na nodratou i yau, eratou sa tauri Paula kei Sailasa, ka yaratakia ki na rara ni veivoli vei ira na turaga; ²⁰ ka yadi rau ki na mataveilewai, ka tukunia, O irau na tamata la koya, erau ka Jutia, erau sa vakidriotakia na noda koro, ²¹ ka vakarotakia nai valavala eso sa yali ni dodonu vei keda me da vakabautia, se muria ni sa kai Roma. ²² Era sa qai tucake vata vakaukauwa vei rau ko ira na lewe vuqa: a ra sa luvatia sara na nodrai sulu ko ira na mataveilewai, a ra sa tukunia me rau warolaki. ²³ Ia ni ra sa warolaki rau vakalevu, era sa qai dainia ki na vale ni veivesu, a ra sa vakarotakia vua nai vakatawa me rau tauria matua: ²⁴ ko koya, ni sa vakarotakia vaka koya, sa bilitaki rau ki na tiki ni vale ni veivesu e loma, a sa vesukia matua sara na yavadrau enai vesu kau. ²⁵ Ia ni sa lomaloma ni bogi na vanua, sa masu ko Paula kei Sailasa, ka sere vua na Kalou, a ra sa rogocia ko ira na tamata sa vesu tu. ²⁶ A sa tavuki vakalevu vakasauri na vanua, a sa yavala kinia na yavu ni vale ni veivesu: a sa tadola vakasauri kecelia nai sogo ni darava, a sa sereki yadua na kedra i vesu na tamata. ²⁷ A sa yadra mai na moce nai vakatawa ni vale ni veivesu; ia ni sa raicia sa tadola tu nai sogo ni darava ni vale ni veivesu, sa ucuna na nonai seleiwau, ka nakitia me vakamatei koya, ni sa nanumia era sa dro ko ira na tamata era sa vesu tu. ²⁸ A sa kaci ena domo levu ko Paula, ka tukunia "kakua ni ko vakacacani iko: keitou sa tiko kecelia koya. ²⁹ Sa qai kaci ko koya me kau mai na cina, a sa rika ki loma a sa sautaninini mai, a sa cuva sobu vei Paula kei Sailasa, ³⁰ a sa yadi rau ki tuba, ka tukunia, oi kodrau na turaga, a cava me'u kitakia me'u bula kinia?" ³¹ A rau sa tukunia, vakabautia na Turaga ko Jisu Karisito, ko na bula kinia, kei ira vokilia na nomu lewe ni vale. ³² A rau sa tukunia vua na vosa ni Turaga, vei ira vokilia era sa tiko e nona vale. ³³ A sa yadi rau ko koya ena tiki-ni-bogi koya, a sa quarakia na we ni kuita: a sa papitaisotakia sara, ko koya kei ira vokilia na kai nona. ³⁴ Ia ni sa yadi rau ki nona vale sa taucia na kakana e matadrau, a sa reki vakalevu ni sa vakabautia na Kalou, kei ira vokilia na nona lewe ni vale. ³⁵ Ia ni sa siga mai, era sa tala na ovisa ko ira na mataveilewai, ka tukunia, sereki rau na tamata oqori me rau qai. ³⁶ A sa tukunia vei Paula na vosa koya na i vakatawa ni vale ni veivesu, sa talakia mai na mataveilewai mo drau sereki: drau qai cavu tu, ka qai ena vakacegu. ³⁷ A sa tukunia vei ira ko Paula, Era sa warolaki keirau votu ka ra sa yali ni lewai keirau mada eliu, ia keirau sa kai Roma koi keirau; ka ra sa daini keirau ki na vale ni veivesu; ka ra sa qai daini keirau vuni, oi? me kakua sara; ia me ra qai lia mai ka yadi keirau yani ki tuba. ³⁸ A ra sa tukunia na vosa koya ko ira na ovisa vei ira na mataveilewai; era sa qai rere, ni ra sa rogocia erau sa kai Roma. ³⁹ A ra sa qai mai ka vakamasuti rau, ka yadia ki tuba, ka vakamamasu me rau qai tani ena koro. ⁴⁰ A rau sa qai tani ena vale ni veivesu, ka curu ki na vale i Litia; ia ni rau sa raici ira na veiwekani, erau sa vakacegui ira ka qai yani.