15 ¹ Ia sa qai sobu mai Jutia eso, ka vakavulici ira na veiwekani, kevaka dou sa yali ni cili me vaka nai valavala nei Mosese, dou sa yali ni bakabulai rawa. ² Ia ni ra veileti vakalevu ka veiba kei rau ko Paula kei Panapasa, era sa lesi Paula kei Panapasa, kei iratou vokilia eso mai vei ira, me rato qai cake ki Jeruisalemive iratou nai Apositolo, kei iratou na qase, ena vuku ni ka koya. ³ Ara sa talatala vei ira nai soqosoqo lewe ni lotu, a ratou sa gaivi Finiasi kei Samaria, ka tukunia tiko ni sa saumaki mai ko ira na matanitu tani: a ra sa vakamaratutaki ira vakalevu na veiwekani kecelia. ⁴ Ia ni ratou sa yaco ki Jeruisalemi, sa mai vakacegui iratou ko ira nai soqosoqo lewe ni Lotu, kei ira na Apositolo, kei ira na qase, a ratou sa tukunia na kecelia sa cakavia na Kalou ni sa veivuke kei iratou. ⁵ A sa tucake eso na nodra i tokani na Farisi era sa vakabautia, ka tukunia, "sa dodonu mera cilivi oqori, Me vakaroti vokilia vei ira me ra talairawarawa ki na i vunau i Mosese." ⁶ A ra sa soqoni vata mai ko ira nai Apositolo, kei ira na qase me ra bosea na ka koya. ⁷ Ia ni sa levu na veileti, sa tucake ko Pita, ka tukunia vei ira, oi konu na veiwekani, konu sa kila sa digitaki au mai vei keda na Kalou, ena gauna sa oti makawa yani, me na rogocia kinia na vosa ni tukutuku vinaka ko ira na vei matanitu tani me ra vakabautia. ⁸ Ia na Kalou ko koya sa kila na yaloda, ⁹ sa vakadinadinatakia vei ira ni sa solia vei ira na Yalo Tabu, me vaka lia vei ita: a sa yali ni vinakati ita cake vei ira, ia sa vakasavasavatakia na yalodra e na vakabauta. ¹⁰ Ia ka cava konu sa qai vakatovolea vakaca kinia na Kalou mo vakataqara nai vua ki na domodra era sa lotu, eda sa yali ni colatia rawa koi keda se ko ira na noda qase? ¹¹ Ia eda sa vakadinata ni da na bula ena loloma ni noda Turaga ko Jisu Karisito, me vaka vokilia kinia ko ira oqori. ¹² Sa qai galu ko ira, vakaadua lia na lewe vuqa me ra rogoci Panapasa kei Paula, ni rau sa tukunia na vei vakatakilakila kei na veika e veivakurabuitaki sa cakavia na Kalou ena ligadrau, ena kedra maliwa na veimatanitu tani. ¹³ Ia ni rau sa tinia na nodrau i tukutuku sa vosa ko Jemesa, ka tukunia, Oi konu na veiwekani, ni rogoci au mai. ¹⁴ Sa tukunia oti ko Saimoni se na laki yadia vakaevei eliu na Kalou e so na tamata mai vei ira na veimatanitu tani, me tiko vei ira na yacana. ¹⁵ Ia na ka koya sa bole vata kei na nodra vosa na parofita; me vaka na ka sa volai, ¹⁶ Ni sa oti na veika koya ka'u na qai voki mai, ka vakatura voki na vale i Tevita, ko koya sa bale sobu, Ia ka'u na vakatura tale na kena ka sa rusa. Au na vakaduria voki mai: ¹⁷ Me vakasaqara na Turaga ko ira na tamata sa vo kei ira kecelia na veimatanitu, era sa vakatokai ena yacaqu. ¹⁸ Sa tukunia vua na Turaga, ko koya sa vakatakilatakia na ka kecelia koya mai nai vakatekivu kei vuravura. ¹⁹ Okoya ka'u sa lewa kinia, me da kakua ni vakaocataki ira era sa saumaki mai vua na Kalou, mai vei ira na vei matanitu tani: ²⁰ me da volavola lia vei ira, me tabu vei ira na qaravia na matakau, na daudara vokilia kei na ka sa kuna kei na dra. ²¹ Ni ra sa tiko makawa ena vei koro kecelia ko ira sa vunautaki Mosese, ni ra sa wilikia na veivale ni lotu ena veisiga ni vakacecegu. ²² Sa ra qai vinakatia ko ira nai apositolo kei ira na qase, kei ira kecelia nai soqosoqo lewe ni lotu, me digitakia na tamata eso mai vei ira, ka vakatala me ratou qai vata kei Paula kei Panapasa ki Anitioki, ko irau ko Jutasa na yacana vokilia ko Parisapa, kei Sailasa, a tamata erau sa liu vei ira na veiwekani. ²³ a ra volavola vaka koya me ratou yadia: oi kimamu nai apositolo kei na qase kimamu sa loloma yani vei konu na veiwekani sa matanitu tani mai Anitioki kei Siria kei Silisia. ²⁴ Ni kimamu sa rogocia, era sa qai tani vei kemunu eso era vakidrotaki kodou ena nodra vosa, a ra sa vukicia tani na lomamudou, ia kimamu sa yali ni talai ira. ²⁵ Sa qai vinaka vei kimamu, ni kimamu sa soqoni vata ka lomavata, me digitakia eso na tamata, ka tala veikonu me ratou qai vata kei rau na daulomani ko Panapasa kei Paula, ²⁶ a tamata erau sa bolea na mate ena vuku ni yacana na noda Turaga ko Jisu Karisito. ²⁷ o koya kimamu sa talai Jutasa kei Sailasa, erau sa tukunia vokilia na veika koya ena gusudrau. ²⁸ Ni sa vinaka vua na Yalo Tabu, vei kimamu vokilia, me kimamu yali ni tauca vei kodou nai colacola levu, koya lia ni sa ka dodonu. ²⁹ Me tabu vei kodou na veika sa cabo, ki na matakau na dra vokilia, kei na ka sa kuna, kei na daudara: ia kevaka dou qarauni kodou mai na veika koya, dou na caka vinaka. Sa loloma. ³⁰ Ia ni ratou sa talai, eratou sa qai ki Anitioki; ia ni ratou sa vakasoqoni ira vata na lewe vuqa, eratou sa solia nai vola. ³¹ Ia ni ra sa wilikia oti, era sa reki ena vuku ni veivakacegui. ³² Ia ko Jutasa kei Sailasa, koi rau sai vakavuvuli vokilia, erau sa vakavulici ira na veiwekani ena vosa e vuqa, ka vakataudeitakia, ³³ Ia ni ratou sa tiko bogi vica, era sa qai vakatalai iratou ko ira na veiwekani ena vakacegu ki vei ira nai apositolo. ³⁴ Ia sa vinakatia ko Sailasa me tikotiko lia maikea. ³⁵ Ia ko Paula kei Panapasa, erau sa tiko mai Anitioki ka rau sa vakavuvuli ka vunautakia na vosa ni Turaga, kei ira na tani e lewe vuqa. ³⁶ Sa bogi vica, sa qai tukunia ko Paula vei Panapasa, Me daru qai voki me raicia se ra sa vakaevei ko ira na wekada ena veikoro kecelia e daru a vunautakia kinia na vosa ni Turaga. ³⁷ A sa nanumia ko Panapasa me rau yadi Joni, a yacana vokilia ko Marika. ³⁸ A sa sega ni vinakatia ko Paula me rau yadi koya, ni sa daini rau e liu mai Pamifilia ko koya, ka yali ni qai vata kei rau ki na cakacaka. ³⁹ A sa katakata kinia na veileti, a rau sa dui qai kinia: a sa yadi Marika ko Panapasa, a rau sa soko ki Kipiro: ⁴⁰ a sa digitaki Sailasa ko Paula, a sa qai yani, ni sa vatonaki rau ki na loloma ni Kalou ko ira na veiwekani. ⁴¹ A sa qai voli ko koya e Siria kei Sisilia, a sa vakataudetaki ira kinia na veisoqosoqo lewe ni lotu.