14 ¹ A rau sa yaco ki Ikoniona, ko Paula kei Panapasa ka rau gole vata sara lia ki na nodra vale ni lotu na Jiu, ka rau sa vosa, ka sa lewe vuqa na Jiu kei ira na kai matanitu tani era sa vakabautia. ² Ia ko ira na Jiu era vakatitiqatia, era sa vakatubura na lomadra na kai matanitu tani, me ra lomacatakia na wekadra. ³ A rau sa tiko vakadede kinia ka vosa doudou e na vuku ni Turaga, ko koya sa vakatakila ni sa dina na vosa ni nona loloma, ka solia me caka ena ligadrau ko Paula kei Panapasa eso nai vakatakilakila lia kei na veika e veivakurabuitaki. ⁴ Ia, ko ira na lewe ni koro, a ra sa tawase rua, eso sa totaki ira na Jiu, ka so sa totaki rau nai apositolo. ⁵ Ia era sa qai nakita e so na kai matanitu tani kei ira na Jiu vata kei ira vokilia na nodra Turaga me ra vakacacani rau ka vakaviriki rau ena vatu, ⁶ ia ena gauna lia rau sa kila kinia, rau sa dro ki na koro ko Lisitira kei Tapi mai Likeonia kei na yasana vakavolivolitia: ⁷ ka rau sa vunautakia vokilia, maikea nai tukutuku-vinaka. ⁸ A sa tiko mai Lisitira e dua na tamata ka malumalumu na yavana ni a sucu lokiloki mai na kete i tinana, a sa yali ni qai rawa e na dua na siga: ⁹ a sa rogocia ni vosa tiko ko Paula; A sa wanonovi koya matua ko Paula ka raicia ni sa tu vua na vakabauta me vakabulai kinia, ¹⁰ a sa vosa e na domo levu, "Tu vakadodonu cake." A sa rika lia ko koya, ka tekivutakia kinia na nona qai. ¹¹ Ia ni ra sa raicia ko ira na tamata na ka sa kitakia ko Paula, era sa tabalakia icoloi na domodra, ka tukunia "na kalou era sa lia tamata mai ka sa qai sobu mai vei ita." ¹² A ra sa vakatokai Panapasa mei Jupita kei Paula mei Makuri, ni sa dau ni vosa ko koya. ¹³ O koya vokilia na bete i Jupita, ka tiko e mata ni koro na nona bure kalou sa yadia mai ki na matamata-ni-koro e so na bulumakau kei na salusalu, ka vinakatia, vata kei ira na lewe vuqa me ra vakacoboisoro. ¹⁴ Ia ni rau sa rogocia koi rau nai apositolo ko Panapasaa kei Paula, erau sa dresulakia na nodraui solu, ka cici sara vei ira na tamata, ka qolouvakia ¹⁵ ka tukunia "Oi kemunu na turaga, a cava ko nu sa kitakia kinia na veika koya? eda sa tamata vata lia kai tovo vata vokilia kei kemunu, ia keirau sa vunau vei kemunu mo ni saumaki tani mai na veika koya ka yali ni yaga, ki vei koya na Kalou bula, o koya ka bulia na lomalagi kei na vuravura kei na wasawasa, kei na ka kecelia sa tu kinia: ¹⁶ o koya ka vosotia na lewe ni veivanua kecelia ena gauna gona me ra qai lia ena nodra sala. ¹⁷ Ia ka yali lia ni dainia me yali na nonai vakadinadina ni sa caka vinaka tiko ko koya, a sa solia mai vei keda na uca mai lomalagi, kei na vuata ena kena gauna lia, a sa vakamamautakia na lomada e na kakana kei na marau." ¹⁸ Ia na veivosa koya, a yali ni tarovia na nodra via vakacaboisoro na lewe vuqa vei rau. ¹⁹ A sa qai mai eso na Jiu mai Anitioki kei Ikoniona, a ra sa vakauqeti ira na tamata, ka ra a vakaviriki Paula ena vatu, ka yaratakia ki nai bili ni koro, ni ra sa nanumia ni sa mate o koya. ²⁰ Ia ni ra sa tu vakavolivoliti koya ko ira sa lotu, sa tu cake ko koya, ka qai ki na koro. Ia ni sa vulaci caca ka taravia, erau sa qai kei Panapasa ki Tapi. ²¹ Ia ni rau sa vunautakia oti nai tukutuku-vinaka e na koro ko ya, ka vakalotutaki ira kinia e lewe vuqa, erau sa qai lesu voki ki Lisitira, kei Ikoniona, kei Anitioki, ²² a rau sa vakadeitakia na yalodra era sa lotu ni rau sa vakarota lia vei ira me ra tudei ena vakabauta, ka tukunia "ni sa kilikili me da sotavia e so na ka rarawa ni da curumia sa matanitu ni Kalou." ²³ Ia ni rau sa lesia eso me nodra qase e nai soqosoqo lewe ni lotu, ni rau sa masulakia ka lolovakia vokilia, erau sa tataunakia vua na Turaga, ko ira era sa vakabautia. ²⁴ E rau sa qai qaivia na vanua ko Pisitia, ka rau sa yaco ki Pamifilia. ²⁵ Ia ni rau sa vunautakia na vosa mai Perika, erau sa qai ki Atalia: ²⁶ ka rau sa soko mai kea ki Anitioki, erau a vatonaki kinia me nodrau na loloma ni Kalou e na vuku ni cakacaka era sa qai mai vakaotia. ²⁷ Ia ni rau sa yaco kinia, ka vakasoqoni ira vata nai soqosoqo lewe ni lotu, erau sa tukunia na ka kecelia sa caka na Kalou ni sa vukei rau, ka sa dolavia na darava me ra vakabautia na veimatanitu tani. ²⁸ A rau sa tiko vakadede kei ira sa lotu.