12 ¹ Ia ena gauna gona sa ia ko Eroti na tui me vakararawatakia eso vei ira nai soqosoqo lewe ni lotu. ² E a vakamatei Jemesa na tuakai Joni e nai seleiwau. ³ Ia ni sa raicia ni ra taleitakia ko ira na Jiu, sa qai vesuki Pita vokilia. Ia gona na gauna sara lia ni kana madrai yali ni vakaleveni. ⁴ Ka ni sa tauria, ka dainia ki na vale ni veivesu, a sa solia ki na mata-sotia e va eratou dui le va, me ratou vakatawai koya lia; ni sa nanumia me yadi koya vei ira na tamata, ni sa oti lia na kana vata ni lako-sivia. ⁵ A sa vakatawai kinia ko Pita ena vale ni veivesu, ia era sa masulakia tiko lia ko ira nai soqosoqo lewe ni lotu vua na Kalou na nona bula. ⁶ Ia ena bogi ni bera ni qai ko Eroti me lai yadi koya ki na mataveilewai, ko Pita a moce tiko ena kedrau maliwa e lewe rua na sotia, a sa vesu e na sinucodo e rua; a ra sa tiko voki lia nai vakatawa ena mata ni darava, me ra vakatawa na vale ni veivesu. ⁷ Ka raicia, sa dua na agilose ni Turaga sa qai mai, a sa cila yani ena na rarama ki na vale ni veivesu; a sa tavia ko koya na sarisari i Pita, a sa vakaduria cake, ka tukunia "Kusa rawa mo tu cake." A sa lutu tani mai na ligana na nona sinucodo. ⁸ A sa tukunia vei koya na agilose, "daramakia na nomui sulu, ka daramakia voki lia na nomui vava. A sa kitakia vakakinia. A sa tukunia vua, "Mo vakaitutuvitaki iko mada ka muri au." ⁹ A sa curu yani na agilose ka muri koya ko Pita: a sa yali ni kila ni sa dina na ka sa caka na agilose; a sa nanumia lia ni raicia tiko ena raivotu. ¹⁰ Ia ni rau sa sivi nai matai ni vakatawa kei nai kenai karua, erau sa yacovia nai sogo kaukaumea, sa basika ki na koro; a sa tadola lia vakai koya vei rau: a rau sa qai sara kituba; ka sivia e dua na gau-ni-sala; a sa qai tani vakasauri vua na agilose. ¹¹ Ia, ni sa kilai yalona mai ko Pita, a sa tukunia, "Au sa qai kila dina sara lia, ni sa tala mai na nona agilose na Turaga, a sa vakabulai au mai na liga i Eroti, vata kei na nodra i naki voki lia na kai Jutia. ¹² Ia ni sa vakasamatakia tiko lia, sa qai ki na vale nei Meri na tinai Joni, a yacana voki lia ko Marika, era soqoni vata kinia me ra masu. ¹³ Ni sa tukituki ena sogo ni matamata-ni koro, sa qai mai e dua na yada a yacana ko Rota me rogocia. ¹⁴ Ia ni sa kila na domo i Pita, sa yali mada ni dolavia nai sogo ni sa reki, a sa cici voki ki loma ka tukunia ni sa tu ko Pita e na matamata-ni-koro. ¹⁵ A ra sa tukunia vua, "Ko sa lialia." Ia sa vakadinadinatakia o koya ni sa vaka lia kinia. A ra sa qai kaya, "Sa nona agilose." ¹⁶ Sa tukituki tiko lia ko Pita: ia ni ra sa dolavia, era sa raicia, ka ra kidacalatakia. ¹⁷ A sa vakatabataba vei ira o koya me ra tiko lo; ka sa tukunia vei ira ni sa yadi koya mai na vale ni veivesu na Turaga. A sa tukunia "Laki tukunia na veika koya vei Jemesa, vei ira voki lia na veiwekani. A sa qai dai ni ira ka qai voki ki na dua na vanua. ¹⁸ Ia ni sa siga mai, sa yali ni lailai na nodra kidroatakia na sotia, se sa qai beka kivei ko Pita. ¹⁹ Ia ni sa vakasaqarai koya ko Eroti ka yali ni kunea, sa tarogi ira lia nai vakatawa, a sa tukunia me ra vakamatei. A sa qai sobu o koya mai Jutia ki Sisaria, ka tiko kinia. ²⁰ Ko Eroti a sa cudruvi ira vakalevu sara lia na kai Taia kei Saitoni: a ra sa duavata kinia me ra qai vua: ia ni ra sa rawai Pilasito, o koya sa lewa na vale ni moce nei Eroti, me vukei ira, era sa masulakia na veivinakati; e na vuku ni sa dau yadi mai na kedra mai na nona vanua na tui. ²¹ Ia ena siga ra sa lokucia, sa vakaisulu lia ko Eroti e nai sulu vakaturaga, a sa dabe e nai dabedabe vakaturaga, ka sa vosa vei ira. ²² Sa ra qolouvakia ko ira na tamata, "Sa domo ni kalou koya, sa yali ni tamata!" ²³ A sa yaviti koya vakasauri e dua na agilose ni Turaga, baletia ni yali ni vakarokorokotakia na Kalou o koya; ka sa kani koya na baca, ka sa ciba o koya. ²⁴ Ia na vosa ni Kalou sa tubu ka levu sara mai. ²⁵ A rau sa lesu voki ki Jerusalemi ko Panapasa kei Saula, ni sa vakaoti lia na nodrau cakacaka, ka rau sa yadi Joni, a yacana voki lia ko Marika.