11 ¹ A ra sa rogocia ko ira nai apositolo kei ira na veiwekani mai Jutia ni ra sa vakabautia na vosa ni Kalou ko ira vokilia era sa lewe ni matanitu tani. ² Ia ni sa qai icolo mai Jerusalemi ko Pita, era sa veileti kaya kei ira sa cili, ³ a ra sa tukunia, "Ko sa curu vei ira na tamata era sa yali ni cili, ka kana vata kei ira!" ⁴ A sa vakatekivu ko Pita, ka vakamacalatakia vakamatailalai na ka vei ira, ka tukunia, ⁵ Au a tiko e na koro ko Jopa ka masu: ia ka'u a raicia na raivotu, Sa dua na ka sa qai sobu mai, e vaka nai tutuvi levu, sa tukuci sobu mai lomalagi ena tutuna vava; a sa yaco sara kivei au: ⁶ ia ni ka'u sa vakaraicia matua, ka vakananumia, au sa kunea kinia na manumanu ni vanua e yavai va, kei na manumanu kila, kei na veika sa dauqasi voli, kei na manumanu vuka. ⁷ Au sa qai rogocia e dua na vosa sa tukunia vei au, 'Tu cake, Pita; mo vakamatea, ka kania.' ⁸ Au sa qai tukunia, 'Kakua noqu Turaga; ni sa yali na ka tabu se na ka tawa-savasava sa curu ki na gusuqu e na dua na siga.' ⁹ A sa rogo voki vei au na vosa mai lomalagi, 'A ka sa vakasavasavatakia na Kalou, mo kakua ni vakatatabutakia.' ¹⁰ A sa caka vakatolu na ka koya: a sa qai yadi voki kece ki lomalagi. ¹¹ Ka raicia, e lewe tolu na tamata sa tu cake tu ena mata ni vale keitou a tiko kinia, eratou a sa talai mai Sisaria vei au. ¹² A sa tukunia vei au na Yalo Tabu, me'u qai vata kei iratou ka me kakua ni veileti na lomaqu. Keitou a qai vata vokilia kei na lewe ono na veiwekani, ka keitou sa curu ki nona vale na tamata ko ya, ¹³ a sa tukunia vei keitou ko koya ni sa raicia na agilose e na nona vale, sa watu tu, ka tukunia vua, 'mo talatala ki Jopa, me yadi mai ko Saimoni, a yacana vokilia ko Pita; ¹⁴ ko koya ena tukunia vei iko na vosa ko na bula kinia, kei ira kecelia na nomu lewe ni vale. ¹⁵ Ia ni ka'u sa vakatekivu lia me'u vosa, era a curumi ena Yalo Tabu, me vaka vei ita e na kenai vakatekivu. ¹⁶ A qai nanumia na vosa ni Turaga, ni a tukunia ko koya, 'sa dina sa veipapitaisotaki ko Joni ena wai; ia dou na papitaisotaki e na Yalo Tabu.' ¹⁷ Ia ni sa qai solia vei ita na Kalou nai solisoli me vaka vei ita, ni da sa vakabautia na Turaga ko Jisu Karisito; ko cei koi au me'u tarovia rawa na Kalou? ¹⁸ Ia ni ra sa rogocia na veika koya, era sa galu lia, a ra sa vakarokorokotakia na Kalou, ka tukunia, "Sa dina sa qai solia na Kalou vei ira voki lia na lewe veimatanitu tani na veivutuni me ra bula." ¹⁹ Ia ko ira a veiseyaki ena veivakacacani a tubu e na vuku i Sitiveni, era a qai vaka ki Finaisi kei Kipiro, kei Anitioki, a ra sa tukunia na vosa vei ira duadualia na Jiu. ²⁰ A sa so lia vei ira era sa kai Kipiro kei Kirini, ni ra sa yaco ni Anitioki, era sa vosatakia vei ira era sa vulagi mai na veimatanitu tani, a ra sa vunautakia na Turaga ko Jisu, ²¹ a sa tiko vata kei ira na liga ni Turaga: a ra sa lewe vuqa era sa vakabautia, a ra sa saumaki mai vua na Turaga. ²² Sa qai yaco na kedrai tukutuku ki vei ira nai soqosoqo lewe ni lotu mai Jerusalemi: a ra sa talai Panapasa, me lako sara ki Anitioki: ²³ ia ni sa tadu ko koya, ka raicia na cakacaka loloma ni Kalou, sa rekitakia, a sa vakarota vei ira kecelia me ra kabita matua na Turaga e na loma e gumatua. ²⁴ Ni sa tamata vinaka lia ko koya, a sa sinai e na Yalo Tabu kei na vakabauta: a sa lewe vuqa kinia na tamata sa vakaikuritaki vua na turaga. ²⁵ Sa qai qai ko Panapasa ki Tarisu, me vakasaqarai Saula: ²⁶ ia ni sa kunea, sa yadi ko ya ki Anitioki. A sa dua na yabaki taucoko era sa dausoqoni vata kinia kei ira nai soqosoqo lewe ni lotu, ka ra sa lewe vuqa erau sa vakavulicia. Ia mai Anitioki era sa vakatokai taumada ko ira sa lotu mei tokani i Karisito. ²⁷ Ia e na gauna ko ya sa qai mai na parofita eso mai Jerusalemi ki Anitioki. ²⁸ A sa tu cake e dua vei ira, ko Akapo na yacana, a sa tukunia, ka sa vakavuna na Yalo Tabu, ni na yaco taumada na dausiga levu e na vanua taucoko; a ka oqori sa yaco lia ena gauna sa tui kinia ko Kilotiu. ^{29 30} Ia era sa lewa ko ira sa lotu me ra solia yadua na nodra ka-ni-loloma, me vaka era sa dui rawatia, vei ira na veiwekani era sa tiko mai Jutia: a ra sa kitakia kinia, ka rau a yadia ko Panapasa kei Saula ve ira na qase.