1 ¹ I CEOFILO, au a vola nai vola e liu, kei na ka kece lia sa vatekivu me caka ka vatavuvulitakia ko Jisu: ² ka yacovia na siga sa kau cake kinia ko koya, ni sa taucia oti ena Yalo Tabu na nonai vakaro vei ira lia nai apositolo, ko ira ka digitakia ko koya: ³ ka sa varaitaki koya voki lia ve ira, ka sa levu na kenai vadinadina, ni sa bula voki mai na nona mate, ka nisa daurairai lia vei ira ka bogi vasagavulu, ka vosatakia na veika ni matanitu ni Kalou. ⁴ Ia ni ratou sa soqoni vata, sa qai varotia vei iratou o koya vakoya: “Dou kakua ni daini Jerusalemi, ia dou warakia tiko lia na i solisoli ka'u a sa tukuna oti vei ikodou, na i solisoli sa yalatakia ko Tamaqu. ⁵ A sa veipapitaisotaki ena wai o Joni, ia dou na qai papitaisotaki ena Yalo Tabu ena vica lia na siga koya.” ⁶ Ni ra sa soqoni vta era sa tarogi koya ka tukunia, konu na Turaga, ko ni na vakayacori ira na Isireli me ra matanitu voki ena gauna koya se yali? ⁷ Sa tukunia vei ira o koya, sa yali ni nomudou mo dou kila na kena gauna, se na kena yabaki, sa lewa duadua lia kinia ko Tamaqu. ⁸ ia dou na rawatia na kaukauwa ni sa qai mai vei kodou na Yalo Tabu, dou na qai dautukuni au mai Jerusalemi, kei Jutia taucoko kei Samaria, ka yacovia nai yalayala kei vuravura. ⁹ Ia ni tukunia oti na veika koya o koya, sa qai yadi colo, ni ra sa vakaraicia tiko; a sa dua na lia na o sa tabonakia mai na matadra. ¹⁰ Ia ni ra sa rai matua ki lomalagi, ni sa qai yani o koya, raicia, e lewe rua voki na tamata sa tu voleka vei ira, erau vakaisulu vulavula; ¹¹ a rau sa tukunia, Oi kodou na kai Kalili, dou sa tu ka rai matua ki lomalagi, ena qai voki mai vakakinia me vaka dou sa raicia koya ni sa qai ki lomalagi. ¹² E ra sa qai lesu voki ki Jerusalemi mai na ulu-ni-vanua sa vakayacani ki na veiolive, sa voleka ki Jerusalemi me vaka lia na kena yawa sa dau lakovi ena dua na siga ni vakacecegu. ¹³ Ia ni ra sa curu lia ki loma, era sa cabe kina i taba vale e colo, era sa dautiko kina ko Pita, kei Jemesa, kei Joni, kei Adriu, Ko Filipi kei Tomasi, ko Pacolomiu, kei Maciu ko Jemesa na luvei Alifio kei Saimoni e dua vei ira sa vakatokai Na gumatua, kei Jutasa na taci Jemesa. ¹⁴ Era sa gumtua kece lia ko ira koya, era sa lomavata ena kerekere kei na dau masu, kei iratou voki lia na yalewa, kei Meri na tinai Jisu, kei iratou na tacina. ¹⁵ Ia ena gauna koya, sa tucake kinia ko Pita ena kedra maliwa na veiwekani (ni sa wili vata na yacadra era sa le dua beka na drau ka ruasagavulu) a sa tukunia, ¹⁶ Oi kodou na veiwekani, e dodonu me vakayacori na tiki-ni-Vola Tabu koya, ka vosatakia e liu na Yalo Tabu ena gusui Tevita, ena vukui Jutasa, o koya ka liutaki ira era sa tauri Jisu: ¹⁷ ni sa wili vata kei keda ko koya, a sa lesi ki na cakacaka koya. ¹⁸ (Ia na tamata koya sa volia e dua na tiki-ni-vanua e nai voli ni nonai valavala ca; a sa lutu ka saumakidule kira, a sa kacabote na boto ni ketena a sa kasabura voki lia na nona wawa: ¹⁹ a sa kilai na ka koya vei ira kece lia sa tiko mai Jerusalemi: a sa vakatokai kinia na tiki-ni-vanua gona ena nodra vosa, Akelitama, o koya koya Na vanua ni dra.) ²⁰ Ni sa volai e nai vola ni Same, 'Me lala didi na nona vale, Ia me kakua na tamata me tiko kinia'; 'ia, me dua tani me tauria na nonai tavi' ²¹ O koya sa dodonu kinia me dua mada vei ira na tamata era sa tiko vata kei keda ena gauna voki lia sa tiko kinia vei keda na Turaga ko Jisu, ²² sa vakatekivu mai na papitaiso i Joni ka yacovia na siga sa kau cake kinia vei keda o koya, me lesi o koya me tukunia vata kei keda na nona tucake voki mai na mate. ²³ A ra sa lesia e lewe rua, Ko Josefa sa vakatokai ko Parisapa, a yacana voki lia ko Jusitu kei Mataiasa. ²⁴ Era sa qai masu, ka kaya, Oi konu na Turaga, ko ni sa kila na na yalo ni tamata kece lia, mo ni vakatakila mai se ko cei vei rau koya ko ni sa digitakia, ²⁵ me nonai tavi na cakacaka vakaiapositolo koya, sa sivo tani mai kinia ko Jutasa, me qai kina nona yasana. ²⁶ A ra sa qai vakawiri madigi, ena vukudrau, a sa bale vei Mataiasa: a sa wili vata kinia o koya kei ira na i apositolo e le tinikadua.