13 ¹ Koya nai katolu ni noqu qai yani vei ikodou. Ena vadinadinataki na vosa kecelia e na gusu ni vadinadina e lewe rua, se lewe tolu. ² Au a vasalatakia eliu, kau sa qai vasalatakia,ia koya, niu me vaka e nai karua ni noqu tiko vei ikodou; ia koya, niu sa tiko tani, au tukunia vei ira sai valavala ca eliu, kei ira kece lia na tani, kevaka kau na qai voki yani, kau na yali ni vosotia: ³ ni dou sa qara e dua nai vadinadina ni sai Karisito kau sa vosa kinia, o koya sa yali ni malumalumu vei ikodou, ia sa kaukauwa lia vei ikodou: ⁴ ni sa vakoti ki na kauveilatai ko koya ni sa malumalumu, ia sa qai bula e na kaukauwa ni Kalou. Keiotu vokilia, keitou sa malumalumu vata kaya, ia keitou na bula vata kaya e na kaukauwa ni Kalou vei ikodou. ⁵ Dou dikevi ikodou, se dou tu e na vabautia, se yali; vatovolei ikodou. Dou sa yali beka ni kila ikodou, ni sa tiko vei ikodou ko Jisu Karisito? de dou sa yali dina ni vabau. ⁶ Ia kau sa dinatia ni dou na kila ni keitou sa yali ni tawa vabau. ⁷ Ia keitou sa masu vua na Kalou, mo dou kakua sara ni valavala ca; e yali me keitou rairai kinia ni keitou sa vinakati kinia, mo dou caka lia na ka e dodonu, io, kevaka keitou sa yali ni vabau. ⁸ Ni keitou sa yali ni rawa e dua na ka me tarovi kinia na dina, me totakia lia na dina. ⁹ Ni keitou sa reki, ni keitou sa malumalumu tu, ka kaukauwa koi ikodou; ia na ka voki lia koya keitou sa masulakia mo dou vinaka sara. ¹⁰ O koya koya kau sa vola kinia na veika koya niu sa tiko tani, deu ia na lewa rarawa ni da sa tiko vata, me vaka na kaukauwa sa solia mai vei au na Turaga me ia kinia na veivatataki, me kakua lia na veivarusai. ¹¹ Meu tinia, oi kodou na viwekani, mo dou vinaka! Mo dou vinaka taucoko, mo dou vacegui sara, mo dou lomavata, mo dou vivinakati tiko; ia ena tiko vata kei ikodou na Kalou ni loloma kei na vacegu. ¹² Dou veilomani ka veireguci e na yalosavasava. ¹³ Sa loloma yani vei ikodou ko ira kece lia era sa lotu. Me tiko vei ikodou kecelia na yaloloma ni Turaga ko Jisu Karisito, kei na loloma ni Kalou, kei na veilomani ni Yalo Tabu. Emeni.