12 ¹ E dina lia meu valevulevui au ia sa yali beka ni yaga; ia kua na cavutia na viraivotu kei na vivakarairai ni Turaga. ² Au sa kila e dua na tamata o koya sa tu vata kei Karisito, ni sa yadi cake mada ko koya koya ki nai katolu ni lomalagi, a sa qai oti na yabaki e tinikava (se vayago beka, se yali, au sa yali ni kila; sa yali beka ni vayago, au sa yali ni kila; sa kila na Kalou;) ³ io, au sa kila na tamata sa vakoya, (se vayago lia, se yali ni vayago, au sa yali ni kila; sa kila na Kalou;) ⁴ ni sa yadi cake ki Parataisi, a sa rogocia na vosa sa yali ni tukuni rawa, sa yali ni tara me tukunia na tamata. ⁵ Au na valevulevui au e na vukuna sa vakakoya; ia e na vukuqu lia, kau na yali ni valevulevui au; e na vuku lia ni noqu malumalumu. ⁶ Ia kevaka kau sa vinakatia meu dokai au, au na yali ni lialia kinia; niu na kaya lia na ka e dina: ia kau sa kua so lia, de dua sa vasami au niu sa uasivi cake e na ka sa raicia vei au, se rogocia vei au. ⁷ Ia deu valevulevui sara ni sa levu sara na veivakarairai, sa dua na voto ni kau sa valauti kinia na lewequ, e dua nai talaki i Setani me vararawataki au, deu valevulevui sara. ⁸ E na vuku ni ka koya, kau a masu vatolu vua na Turaga, me yadi tani vei au. ⁹ A sa tukunia vei au ko koya, Sa rauti iko na noqu loloma: ni sa valevui na noqu kaukauwa, ni sa malumalumu e dua. O koya koya sa yaloqu sara kinia meu rekitakia na noqu malumalumu, me tiko kinia vei au na kaukauwa i Karisito. ¹⁰ O koya koya kau sa vinakatia kinia na malumalumu, na vasewasewani, na vadravudravuataki, na vivacacani, na vivararawataki, e na vuku i Karisito: ia niu sa malumalumu, au sa qai kaukauwa. ¹¹ Au sa yaco meu lialia; oi ikodou lia sa vavuna; ni ka dodonu mo dou vosavavinakataki au; niu sa yali ni uasivi sobu vei ira nai apositolo era sa uasivi cake; ia sa dina lia niu sa ka wale. ¹² E dina sa vayacori e na ikodou maliwa na vivatakilakila ni apositolo e na dauvosotia kece lia, e na veika-mana, kei na veika e vivakurabuitaki, kei na cakacaka mana. ¹³ A cava beka dou sa uasivi sobu kinia vi ira na visoqosoqo lewe ni lotu tani, e na vuku lia ni ka koya, niu sa yali ni vaogai ikodou? ia mo dou kakua ni cudruvi au e na vuku ni ka ca koya. ¹⁴ Raicia, au sa varau meu qai vatolu yani vei ikodou; ia kau na yali ni vaogai ikodou: ni kau sa yali ni vasaqara na nomudou ka, koi ikodou lia: ni sa yali ni kilikili kei ir na gone me ra binia nai yau me nodra na qase, ko ira lia na qase, me nodra na gone. ¹⁵ Ia sa yaloqu sara meu soli au kei na ka sa tu vei au e na vuku ni yalomudou; io kevaka sa ka levu na noqu loloma vei ikodou kau na lomani kinia valailai beka? ¹⁶ Ia me vaka lia ko ya, au sa yali ni beitaki ikodou: ia niu a yaloqaseqase, kau sa rawai ikodou e nai lawaki. ¹⁷ Au sa vaiyau maivei ikodou li vei ira kau a tala vi ikodou? ¹⁸ Au a masuti Taito, ka tala vata kaya e dua vei ira na viwekani. Sa vaiyau maivei ikodou li ko Taito? kei rau a yali li ni valavala e na yalovata? keirau a yali li ni muria e dua loa lia nai varau? ¹⁹ Dou sa vasama tiko beka ni keitou sa vosavinakataki keitou vei ikodou? keitou sa vosa e na mata ni Kalou, ni keitou sa tu vata kei Karisito: ia na ka kece lia, ikodou sa daulomani, mo dou vatataki cake kinia. ²⁰ Niu sa rere, deu qai yani ka yali ni raici ikodou me vaka kau sa vinakatia, ia kau na qai laurai vei ikodou me vaka dou sa yali ni vinakatia: de sa tiko na vileti, kei na vuvu, ke ina cudrucudru, kei na viba, kei na kakase, kei na vasolokakana, kei na viavualevu, ke i na ue: ²¹ de vamalumalumutaki au e na matamudou na noqu Kalou, niu sa qai voki yani, ka deu tagicaki ira kinia era lewe vuqa era sai valavala ca oti, ka yali ni veivutunitakia na dukadukali kei na dauyalewa, kei na daudara, era a caka.