16 ¹ Ia e na vuku ni soli me nodra era sa lotu, me vaka kau sa vatotia vei ira na veisoqosoqo lewe ni lotu mai Kalatia dou caka vakakinia koi ikodou oki lia. ² E nai matai ni siga ni wiki, mo dou dui maroroya nai yau eso me tu, me vaka sa vakalougatataki kinia ko koya, me kakua kinia ni caka na soli ni kau sa qai yani. ³ Ia ni kau sa tadu yani, o iratou dou na vinakatia kau na talai iratou me ratou yadia nai vola eso kei na nomudou i loloma voki lia ki Jerusalemi. ⁴ Ia kevaka sa yaga meu qai voki lia koi au, eratou na qai vata kei au. ⁵ Ia kau na qai vei ikodou, niu sa qaivi Masitonia: ni kau na qaivi Masitonia. ⁶ Ia kau na tiko beka vei ikodou, io, kau na tiko beka kei ikodou e na veivula i liliwa, mo dou yadi au kinia e na noqu qai tu ki na vanua kau na qai kinia. ⁷ Niu sa yali ni via tiko vei ikodou e na noqu qai tu koya; ia kau sa nakitia meu tikotiko mada kei ikodou, kevaka sa vinakatia na Turaga. ⁸ Ia kau na tiko lia mai Efeso me yaco mada na siga ni Penitiko. ⁹ Ni sa dola tu vei au na darava levu ka yaga, a ra sa lewe vuqa voki lia na dauveivorati. ¹⁰ Ia kevaka sa tadu ko Timoci, dou raicia me tiko tawa rere vei ikodou; ni sa kitaka ko koya na cakacaka ni Turaga, me vakataki au voki lia. ¹¹ O koya me kakua kinia na tamata me beci koya: ia mo dou yadi koya e na nona lako tu e na vakacegu, me qai mai kinia vei au: niu sa waraki koya kei iratou na veiwekani. ¹² Ia e na vuku i Apolosa na wekada, au sa masuti koya vakalevu me qai yani vei ikodou kei iratou na veiwekani: a sa yali sara ni lomana me qai vei ikodou e na gauna koya; ia ni dua na gauna vinaka vua, ena qai qai yani. ¹³ Dou vatawa, dou tu dei e na vabautia, dou tamata qaqa, dou gumatua. ¹⁴ Me caka na ka kece lia dou caka e na yalololoma. ¹⁵ Ia kau sa masuti ikodou, na veiwekani, (dou sa kila na lewe ni vale i Sitifana, ni sai sevu mai Akaia, a ratou sa soli iratou me ratou qaravi ira era sa lotu:) ¹⁶ mo dou vamalumalumutakia ikodou vei ira sa va koya, vei ira yadua voki lia era sa veivuke, ka daucakacaka. ¹⁷ Ia kau sa reki e na nodratou qai mai ko Sitifana kei Forituneto kei Akaiko: ni ratou sa caka na ka sa yali ni rawa vei ikodou. ¹⁸ Ni ratou sa vaceguya na yaloqu kei na yalomudou voki lia; o koya mo dou qai kilai ira era sa va koya. ¹⁹ Sa loloma yani vei ikodou na veisoqosoqo lewe ni lotu mai Esia. Sa loloma vakalevu yani vei ikodou ko Akuila kei Pirisila e na Turaga, kei ira nai soqosoqo lewe ni lotu e na nodrau vale. ²⁰ Era sa loloma yani vei ikodou na veiwekani kece lia. Dou dui veireguci yadua vakai ikodou e na yalosavasava. ²¹ Oi au ko Paula, au sa vola e na ligaqu dina na noqu loloma yani. ²² Kevaka sa dua sa yali ni lomania na Turaga ko Jisu Karisito, me cudruvi ko koya. Sa lako mai na Turaga. ²³ Me tiko kei ikodou na loloma ni Turaga ko Jisu Karisito. ²⁴ Me tiko kei ikodou kece lia na noqu loloma e na vuku i Karisito Jisu. Emeni.