1 ¹ Koi au ko Paula, sa kacivi mei apositolo i Jisu Karisito, e na lewa ni Kalou, ki Sosiceni na wekaqu, ² vi ira nai soqosoqo lewe ni lotu ni Kalou era sa tiko mai Korinica, vi ira sa tu vata ki Karisito Jisu ka sa va savasavataki, era sa kacivi me ra yalosavasava, kei ira kece lia e na viyasana kece lia era sa masutia na yaca i Jisu Karisito na noda Turaga, io, na noda ki na nodra voki lia: ³ Me yaco vi ikodou na loloma, ki na va cegu, mai vua na Kalou ko Tamada, kei na Turaga ko Jisu Karisito. ⁴ Au sa va vinavinaka e na visiga vua na noqu Kalou e na vukumudou, e na vuku ni loloma ni Kalou sa soli vi ikodou e na vuku i Karisito Jisu; ⁵ ni dou sa va vutuniyautaki e na ka kece lia e na vukuna, e na vosa loa lia ki na vuku kece lia; ⁶ me vaka ni sa va dinadinataki vi ikodou nai tukutuku kei Karisito: ⁷ ka dou sa yali kinia ni uasivi sobu e na dua nai solisoli va yalo: ni dou sa warakia na kena va rairaitaki ni noda Turaga o Jisu Karisito: ⁸ o koya ena va taudeitaki ikodou me yaco na kenai va taotioti, mo dou yali cala e na siga ni noda Turaga ko Jisu Karisito. ⁹ Sa dina na Kalou, o koya sa kacivi ikodou mo dou nonai tokani ni Luvena ko Jisu Karisito na noda Turaga. ¹⁰ Ia kau sa va masuti ikodou, na vi wekani, e na yaca ni noda Turaga o Jisu Karisito, mo dou tauvata kece lia e na vosa, ia me kakua vi ikodou na visei; mo dou vei vinakati sara ni dou sa lomavata ka lewa vata. ¹¹ Ni sa tukuni ikodou mai vi au, ikodou na viwekani, ko ira na lewe ni vale i Kiloi, ni dou sa dauveileti vakai ikodou. ¹² Ia na ka koya kau sa vosa kinia, ni dou sa tukunia yadua, Oi au sa ni Paula; ia, Oi au sa ni Apolosa, ia, Oi au sa ni Kifa; ia, Oi au sa ni Karisito. ¹³ Sa tawase beka na Karisito? sa vakotia beka ki na kauveilatai e na vukumudou ko Paula? se dou sa papitaisotaki beka e na yaca i Paula? ¹⁴ Au sa vavinavinaka vua na Kalou niu sa yali ni papitaisotakia e dua vi ikodou, oi rau lia o Kirisipo ki Keio; ¹⁵ de tukunia e dua ni dou sa papitaisotaki e na yacaqu. ¹⁶ Au sa papitaisotaki ira voki lia na lewe ni vale i Sitifana: ia kau sa yali ni nanumia ni kau sa papitaisotakia e dua tani voki. ¹⁷ Ni sa yali ni talai au na Karisito meu vi papitaisotaki, meu vunautakia lia nai tukutuku-vinaka: ia ka yali lia e na vosa sa vuku, de vatawayagataki kinia na kauveilatai i Karisito. ¹⁸ Ni sa ka lialia vi ira sa rusa na kena vunautaki na kauveilatai, ia sa kena kaukauwa lia ni Kalou vi ita sa vabulai. ¹⁹ Ni sa volai, Au na va rusa na nodra vuku era sa dauvuku, Ka vatawayagatakia na nodra yalomatua era sa dauyalomatua. ²⁰ Evei na vuku? evei na vunivola? evei na dauvileti ni vuravura koya? sa yali beka ni va lialiatakia na vuku ni vuravura koya na Kalou? ²¹ Io, ni sa vuku tu na Kalou, a ra sa yali ni kila na Kalou na kai vuravura e na nodra vuku, sa qai vinakatia na Kalou me vabulai ira era sa vabautia, e na vosa va lialia. ²² Ni ra sa tarogia nai va takilakila ko ira na Jiu, a ra sa vaqara na vuku ko ira na kai Kirisi: ²³ ia kitou sa vunautaki Karisito ni sa lauvako ki na kauveilatai, a ka era sa tarabe kinia o ira na Jiu ka sa ka lialia vi ira na kai Kirisi: ²⁴ ia vi ira lia era sa kacivi, se ra Jiu se ra kai Kirisi, na Karisito na kaukauwa ni Kalou, ki na vuku ni Kalou. ²⁵ Ni sa ka vuku na sesewa ni Kalou ka sa uasivi vi ira na tamata; a sa kaukauwa na malumalumu ni Kalou me uasivi vi ira na tamata. ²⁶ Ni dou sa raicia, na vi wekani, na kenai valavala ni nomudou kacivi, ni sa yali ni lewe vuqa era sa vuku vayago, sa yali ni lewe vuqa era sa kaukauwa, sa yali ni lewe levu era sa turaga me sa kacivi: ²⁷ ia sa digitakia na Kalou na veika valialia e vuravura, me va maduataki ira na vuku; ia na veika sa malumalumu e vuravura sa digitakia na Kalou me va maduatakia na vei ka sa kaukauwa; ²⁸ ki na veika vakaisi e vuravura, ki na veika e beci, sa digitakia na Kalou, ki na veika sa yali loa lia, me varusa na veika sa tu dei; ²⁹ me kakua kinia na tamata me dokai koya e mata ni Kalou. ³⁰ Ia maivi koya lia dou sa tu vata kinia ki Karisito Jisu, o koya sa caka na Kalou me vu ni vuku vi ita, ka vu ni vadonui, ka vu ni vasavasavataki, ka vu ni bula; ³¹ me yaco kinia na ka sa volai, O koya sa vosa doudou, me vosa doudou e na vuku ni Turaga.