¹ O koya ke era sa reva kinia ni lewai me cudruvi o ira era sa tu vata ki Karisito Jisu, era sa reva ni muria jiko nai tovo vayago, era sa muria liga na Yalo Tabu. ² Ni sa sereki au mai na vunau ni ca vata ki na mate, na vunau ni Yalo ni bula vi Karisito Jisu. ³ Ia ni sa reva ni rawarawa ki na vunau, ni sa malumalumu i na vuku ni tovo vayago, sa qai lewa na Kalou me mate na ca i na yago, ni sa tala na Luvena i nai tovo ni yago sa tu kinia na ca, ka mei soro ni valavala ca: ⁴ me da caka rawa kinia nai valavala dodonu ni vunau, ni da sa reva ni muria jiko nai tovo vayago kita sa muria liga na Yalo: ⁵ ni ra sa gadrevia na vika vayago o ira era sai tovo vayago; ia na vika vayalo o ira era sai tovo vayalo. ⁶ Ni sa vu ni mate na gadrevia ni tovo vayago; ia sa vu ni bula vata ki na vacegu na gadrevia ni tovo vayalo. ⁷ Ni sa vimecaki nai tovo vayago vata ki na Kalou: ni sa reva ni varogocia na vunau ni Kalou, ia sa mama sara liga me vakinia. ⁸ Ia o ira era sai tovo vayago, era sa reva ni caka rawa na ka e vinakatakia vua na Kalou. ⁹ Ia ma reva ni vakayago na nomudou i tovo, sa vayalo liga, ke sa djina ni jiko i na lomamudou na Yalo ni Kalou. Ia ke sa dua na tamata sa reva ni jiko i lomana na Yalo i Karisito, ma reva ni nona o koya ke. ¹⁰ Ia ke sa jiko i na lomamudou na Karisito, sa djina liga sa mate na yago i na vuku ni valavala ca; ia na yalo sa bula i na vuku ni vivadonui. ¹¹ Ia ke sa jiko vadua i na lomamudou na Yalo i koya ma vaturi Jisu cake voki mai na mate, o koya ma vaturi Karisito voki mai na mate, ena vabula voki na yagomudou sa mate rawa, i na Yalona sa jiko vadua i na lomamudou. ¹² O koya, ikodou na viwekani, kita ma reva kinia ni vauci ki nai tovo vayago, me da muria nai tovo vayago: ¹³ ni dou na mate ke dou sa muria nai tovo vayago; ia ke sa vivuke vata ki ikodou na Yalo Tabu me vaojia nai valavala vayago, dou na bula kinia. ¹⁴ Ia o ira liga sa tuberi ira na Yalo ni Kalou era sa luve ni Kalou. ¹⁵ Ni dou sa reva ni rawajia voki na yalo ni bobula mo dou rere; ia dou sa rawajia na Yalo Tabu dou sa vabau kinia me gone, o koya kita sa kaci kinia, Apa, Tamada. ¹⁶ A Yalo ke sa tukunia mai ki na yaloda, ni da sa luve ni Kalou: ¹⁷ ia ke kita sa gone, kita na qai taukei; kita na taukenia na vika ni Kalou, kita sai taukei vata ki Karisito; ke kita sa vosotia vata kaya na ca, kita na vakalougatataki vata kaya vokiliga. ¹⁸ Ni'u sa va sa reva ni yaga me rau vatauvatani na ka ca sa vosojia i na bula ke ki na kalougata ena varairaitakia vi kita emuri. ¹⁹ Ni sa gadrevia valevu o vuravura ka wawa tikoliga me ra varairaitakia o ira na luve ni Kalou. ²⁰ Ni sa vamalumalumutakia o vuravura me ca, ma reva ni vinakatakia,i na vuku i koya liga sa vamalumalumutakia, ni ma vanuinui jiko ²¹ ni na sereki vokiliga o vuravura mai na kena vabobulataki ki na rusa, ka me lalaga tu ka vaiukuukutakia vata ki ira na luve ni Kalou. ²² Ni da sa kila, sa vutugu vata o vuravura taucoko, ka sa yaluma i na rarawa, ka yacovia na siga ke. ²³ A sa reva ni koya laliga, oi kita vokiliga, kita sa rawajia nai sevu ni Yalo Tabu, kita sa vutugu jiko e lomada ni da sa warakia me da vabaujia me gone, ni na vabulai na yagoda. ²⁴ Ni da sa bula i nai nuinui: ia nai nuinui sa bale ki na ka sa qai raici sa reva ni nuinui djina: ni sa nuitakia vacava na tamata na ka sa qai raicia? ²⁵ Ia ke kita sa nuitakia na ka kita sa reva ni raicia, kita sa vosojia liga me warakia jiko. ²⁶ Ia na Yalo Tabu vokiliga sa vukea na noda malumalumu: ni da ma reva ni kila na ka e kilikili vata ki kita me da kerea: a sa masulaki kita na Yalo Tabu i na vutugu e reva ni cavujia rawa. ²⁷ Ia o koya sa daudikevia na yaloda sa kila na loma ni Yalo Tabu, ni sa masulaki ira na tamata lotu me va na loma ni Kalou. ²⁸ Ni da sa kila ma vivuke na ka keceliga me ra vinaka kinia era sa lomana na Kalou, o ira era sa kacivi me va na ka sa nakijia oji. ²⁹ Ia o ira kece sa kilai ira eliu o koya, sa lesi ira iliu me ra tautauvata ki na Luvena, me ulumatua kinia o koya vi ira na tacina era lewe levu: ³⁰ ia o ira sa lesi ira eliu o koya, sa qai kacivi ira: ia o ira sa kacivi ira o koya, sa vadonui ira: ia o ira sa vadonui ira o koya, sa vaiukuukutaki ira. ³¹ A cava me da qai tukunia i na vika ke? Ke sa totaki kita na Kalou, o cei me noda meca? ³² Ena vaivei o koya sa reva ni bureitakia na Luvena djina, ia sa soli koya yani me kita sosomi keceliga, ena mama vacava vua me solia laliga vi kita na ka keceliga vata kaya? ³³ O cei me beitaki ira sa djigitaki ira na Kalou? Na Kalou sa vadonuya. ³⁴ O cei ena lewa me ra cudruvi? O Karisito Jisu liga sa mate, io, sa bula cake voki, ma iko vokiliga i na liga i matau ni Kalou, ka sa masulaki kita. ³⁵ O cei me na tawasei kita mai na loloma i Karisito? a ka rarawa li, se na yaluma, se na dauvivacacani, se na dausiga, se na luvawale, se na dauvivarerei, se nai seleiwau? ³⁶ Me va na ka sa volai, I na vukumuni kitou sa vamatei kinia i na siga taucoko ka bogi: Kitou sa vatauvatani vata ki na sipi ena vamatei. ³⁷ E reva, i na ka keceliga ke kita sa gumatua sara kinia, i na vuku i koya sa lomani kita. ³⁸ Ni'u sa kila vaidjina, ni na reva ni rawajia na mate, se na bula, se o ira na agilose, se o ira sa liu, se o ira sa kaukauwa, se na vika sa yaco ni kua, se na vika ena yaco imuri, ³⁹ se na ka cecere, se na ka jitobu, se dua tani na ka, me tawasei kita mai na loloma ni Kalou, sa yaco i na vuku i Karisito Jisu na noda Turaga.