¹ O koya ke, ni da sa vadonui i na vabaujia, me da sa qai vivinakaji vata ki na Kalou i na vuku ni noda Turaga o Jisu Karisito: ² i na vukuna vokiliga eda sa torovia rawa kinia, i na vabaujia na loloma ke ita sa qai tu kinia; me da sa marau vokiliga ni da sa nuitakia na vivakalougatataki ni Kalou. ³ A sa reva ni koya laliga, me da sa dau marau vokiliga i na vuku ni vika rarawa: ni da sa kila sa tubu na dauvosojia mai na ka rarawa; ⁴ ia na dauvivatovolei mai na dauvosojia; ia nai nuinui mai na dauvivatovolei. ⁵ Ia sa reva na madua i na vuku ni nuinui; ni sa sovarakia ki na yaloda na loloma ni Kalou ni sa soli vi kita na Yalo Tabu. ⁶ Ni sa mate na Karisito me nodra i sosomi na tamata i valavala ca i na gauna sa lokuci iliu, ni da sa malumalumu jiko. ⁷ Ni sa reva beka e dua me mate mei sosomi ni tamata yalododonu: ia ka sa dua beka sa doudou me mate mei sosomi ni tamata dauloloma. ⁸ Ia na Kalou sa vatakila na nona loloma vi kita, ni sa mate na Karisito me nodai sosomi ni da sa tamata ca. ⁹ Ia ni da sa qai vadonui i na vuku ni nona dra, ena qai rawarawa cake me da vabulai mai na cudru i na vukuna. ¹⁰ Io, kevaka ita sa vivinakaji vata ki na Kalou i na vuku ni nona mate na Luvena, ni da sa vimecaki, ena qai rawarawa cake, ni da sa vivinakaji tu, me da vabulai jiko i na vuku ni nona bula. ¹¹ A sa reva ni koya laliga, ia kita sa daureki vokiliga i na Kalou i na vuku ni noda Turaga o Jisu Karisito, o koya kita sa yaco kinia me da vivinakaji tu. ¹² Ia me va sa curu ki vuravura nai valavala ca i na vuku ni tamata e lewe dua, vata ki na mate i na vuku ni valavala ca; a sa yaco vakinia na mate ki na tamata keceliga, ni sa cala na tamata keceliga: ¹³ Sa tu iliu e vuravura nai valavala ca, sa yaco imuri na vunau: a sa reva ni okaji nai valavala ca ni sa reva na vunau. ¹⁴ Ia mai na gauna i Atama ka yacovia na gauna i Mosese sa dauvitalia o mate vi ira vokiliga ra sa reva ni valavala ca me va na talaimama i Atama, o koya sa nonai vatakarakara sa qai mai imuri. ¹⁵ Ia rau sa reva ni tautauvata sara na talaimama, vata ki nai solisoli laliga. Ia kevaka sa mate na lewe levu i na vuku ni nona talaimama na lewe dua, sa qai rawarawa cake sara me yaco valevu vi ira na lewe levu na loloma ni Kalou, vata ki nai solisoli ni loloma, i na vukuna liga na tamata e le dua, o Jisu Karisito. ¹⁶ Rau ma reva ni tautauvata na ka sa yaco i na vuku ni nona cala e dua bau, vata ki nai solisoli: ni sa dua bau liga sa yaco kinia na lewa me da cala, ia nai solisoli laliga sa yaco vi ira sa levu na nodra i valavala ca me ra vadonui kinia. ¹⁷ Ia kevaka sa gumatua na mate i na vukuna na lewe dua, i na talaimama ni le dua; ena qai rawarawa valevu cake vi ira sa yacovi ira na loloma levu vata ki nai solisoli ni vivadonui, me ra gumatua i na bula i na vukuna na le dua, o Jisu Karisito. ¹⁸ O koya ke, me va sa lewai me cudruvi na tamata keceliga i na vuku ni dua bau liga na cala; sa va vokiliga kinia i na vuku ni dua bau liga nai valavala dodonu sa rawa me ra vadonui na tamata keceliga me ra bula: ¹⁹ ka me va sa vacalai na lewe levu i na nona talaimama e dua bau na tamata, sa vadonui va vokiliga kinia na lewe levu i na vuku ni nona talairawarawa na le dua. ²⁰ A sa qai kau mai na vunau, me vinaka kinia nai valavala ca. Ia ni sa vinaka mai nai valavala ca sa qai vinaka cake valevu sara na loloma: ²¹ me va ni sa gumatua nai valavala ca ki na mate, me gumatua va vokiliga kinia na loloma, i na vadonui, ki na bula reva ni mudu, i na vuku i Jisu Karisito na noda Turaga.